《再見了，還會再見嗎？》: 第43章 – 合拍

咔嚓〜

大門應聲打開。

行入嚟嘅係著住隔離學校校服嘅Lily。

你冇睇錯，真係Lily。

但係，乜Lily有出過去外面咩？





「你做咩換咗隔離學校校服嘅？」我問佢。

「我突登拎咗家姐嗰套著出嚟俾你睇㗎，你覺得我靚唔靚女啊？」

一返嚟就問我覺得佢靚唔靚女，係咪傻咗……

但係我印象中又好似冇見過Lily出去。

「都靚嘅。By the way 我練好喇，你跳得未？」我對佢講。





佢行咗過嚟，雙手放喺我兩邊膊頭。

「咁心急做咩啫〜 你識唔識跳呀，起身一齊陪我跳啦〜」

「我唔識㗎……」

「喂，你搞咩呀！！！」房入面又有個Lily行咗出嚟。

點解有兩個Lily嘅，我心諗。





「放開我朋友啦，佢好純情㗎，唔好玩人哋」

「唓，唔玩囉，我以為佢係Brian嘛」

跟住著校服嗰個Lily就行咗去房嗰邊。

Brian？？

唔通係同我同班嗰個？？

算喇，人哋嘅私事我都係唔好理。

「Sorry啊，佢以為你係我鍾意嗰個男仔，所以想玩下你」

果然係孖生姊妹…… 





連玩人嘅習慣都好似……

「我哋開始啦，你彈咗第一首先〜」

夾咗個幾鐘，我哋都叫做係練好咗。

「估唔到我哋咁夾，咁快就練好」Lily對我講。

Lily真係跳得好好，基本上每一次都係冇咩錯漏就完成。

睇嚟佢父母當年對佢都好嚴格，唔係都冇乜可能可以次次1 take pass咁完美。

相反可能係我太耐冇彈，所以有啲生疏，間唔時都有啲位彈錯咗。





「都係你跳得好啫」我回應返佢。

「我送埋你去西鐵站啦，話晒過門都係客」

「哦，好啊，唔該晒」

一路行去西鐵站途中，我都有同Lily傾下偈，

「係呢，啱啱你啊妹講嗰個Brian，係咪就係我嗰班嗰個？」

「喂，你唔好亂咁同人講啊，我從來都冇講過俾學校朋友知呢件事㗎」

「如果俾我發現你爆呢單嘢出去，你以後唔使指意再有大脾可以摸」

「好似講到隨時我都有得摸咁……」我細細聲地講。





「你理得我，入閘啦你〜」

希望下星期個表演順順利利啦〜〜