《再見了，還會再見嗎？》: 第33章 – 新環境

「原來聽日就開學……」我自言自語。

話晒聽日都要去新環境面對新嘅人，揾埋小雲一齊返去好似好啲喎。

「小雲，聽日開學我哋一齊返好冇呀？」我喺Facebook問小雲。

小雲好快就覆返我。

「好呀，一齊食早餐？」





「嗯，咁都係XX茶餐廳見啦」

覆完小雲我就上咗床瞓覺。

〜開學日〜

「喂，你去到邊呀？」我打電話問小雲。

「我到咗好耐喇，見到阿天同雯雯所以過咗去一齊坐咋嘛，你都過嚟啦」





「哦，好呀」

行到上去，有2個我未見過嘅一男一女都坐咗喺同一枱。

個男仔高高瘦瘦一睇就知有玩開運動，連第一日返學都已經帶住塊球拍。

而個女仔就短頭髮冇戴眼鏡，同小雲身型差唔多。

「坐低啦，做咩企喺到」阿天叫我。





「你係車仔？」嗰個男仔問我。

點解佢會知我係邊個嘅？

我：「係啊……」

男：「我叫Anson，我隔離呢個係盈仔」

盈：「咩盈仔呀，你就仔。叫我阿盈得㗎喇」

阿盈一邊講一邊meet Anson隻手臂。

Anson：「車仔你睇下佢，成個男人咁，仲話唔係仔」

睇嚟佢哋應該前兩年都係同班，所以先會咁熟。





Anson：「我講個秘密俾你聽啊，阿盈佢好鍾意啲數學叻嘅男仔㗎，佢話呢啲男仔好型喎，所以你要小心啲呀」

阿盈：「咩啫，邊係喎」

阿盈臉都紅晒。

阿天：「前幾日一出分班結果你就喺我哋個group話有車仔入嚟同班好開心，仲話……」

阿盈：「收聲！！再講打死晒你哋！！」

坐我對面嘅小雲聽到之後，好似突然冇咗笑容。

雯雯見到個情境有啲尷尬，即刻講啲嘢轉轉話題。





雯雯：「陣間我哋坐埋一堆好冇啊？可以幫你哋兩個識下新朋友嘛」

小雲：「不過要留個位俾Choco喎」

Anson：「Choco就係第三個由你哋嗰班轉入嚟嘅同學？」

我：「係啊，係小雲個好朋友嚟㗎」

阿盈：「快啲食埋少少就行喇，得返10分鐘咋！！」

行返學校途中，我一直都有同小雲傾計。

「我哋又會咁快就識到新朋友嘅」我對小雲講。

「傻仔嚟嘅，而家咁咪幾好，起碼唔使對住以前班人先啦」





「我見你好似唔係好鍾意阿盈咁嘅」我細細聲問小雲。

小雲冇回應我。

入到課室，周圍都係一啲生面孔。

班房入面我認得嘅人就只有Choco同嗰個成日同Zoe一齊嘅男仔，好似係叫Simon。

「咁遲返嘅你哋，又唔叫埋我一齊食早餐」Simon一邊向我哋揮手一邊講。

「仲好意思講，係你自己尋日話約咗人先唔同我哋食嘅」阿天拖住雯雯講。

「唓，揾個新同學嚟同我坐啦，等我識下人嘛」





「就你坐我隔離啦車仔，唔介意呀嘛？」Simon向我招手。

又會揀中我嘅……

都叫到我個名啦，唔通唔過去咩。

「靚女，過嚟坐我前面啦〜」

Simon叫緊嘅應該係小雲。

「我哋都過去坐啦，唔好企晒喺到。Choco，你都過埋嚟一齊坐啦」雯雯對所有人講。

結果我哋嘅坐位就係好似下面咁，

Choco 阿盈
Anson 小雲
我 Simon

而我左邊就係阿天同雯雯。

「聽講你之前同Zoe都幾熟㗎喎」Simon對我講。

「又唔係，以前同班嗰陣一齊温書啫」

喺我眼中，Simon係一個成日都玩唔同女仔嘅花花公子。

至少我呢刻對佢嘅印象係咁啦。

「見你話同佢唔係好熟我先講，上年Zoe成日都係咁痴埋我到，但其實我又唔係鍾意佢」

「上個學期考完試佢仲走嚟同我表白，不過我一句就拒絕咗佢lu，希望唔好hurt得佢太深啦」

一時間聽完都唔知俾咩反應Simon好。

畢竟我對呢啲咩追人同俾人追嘅嘢都冇乜經驗，所有都好難話有啲咩感受，真係唔識點同佢傾呢個話題。

「希望佢冇事啦咁」我簡單回應一句。

其實我覺得Simon份人又唔差嘅，對男仔嘅話。

至於對女仔點我就唔知喇。

呢個時候，我哋學校嘅家政科老師Miss Wong入咗嚟。

「同學大家好呀，我係你哋嘅班主任Miss Wong。大家前兩年上過我嘅堂都應該知我係點嘅人啦，我喺到都唔多講我嘅要求喇。」

其實教得呢啲頹廢科嘅老師，你都估到佢唔會係啲好惡或者好乞人憎嘅老師啦。

Miss Wong 係學校入面少數受大多數學生愛戴嘅老師。

因為佢對所有學生都好好同好體諒學生嘅難處，所以真係冇唔鍾意佢嘅原因。

「你哋坐好喇？咁我都唔調你哋位喇〜〜」

「我信精英班嘅你哋會有自制能力，記得上堂要乖乖地安靜啲喇。咁我哋而家處理埋啲班務先……」

冇諗過第一日就已經識到咁多新朋友，仲要好好彩地有個好老師做班主任，呢啲機會真係要好好珍惜先得。

過咗一陣，班房外面突然有人敲門。

係陳sir。

「唔好意思Miss Wong，要打攪一下你哋，我想揾一揾張轟浩同學」

「張轟浩，陳sir揾你啊，快啲出嚟啦」Miss Wong 向我招一招手。

陳sir揾得我應該都係講嗰個乜鬼“改進計劃”嘅事啦。

「陳sir，你好」

「我諗你都應該估到我揾你咩事啦。今日嘅2點鐘喺下面111室會有“改進計劃“嘅簡介會，記得要準時去到點名，詳細嘅內容會喺入面再講㗎喇」

「明白」

「咁我都唔阻你太耐喇，放學之後見啦」

「ByeBye 陳sir〜」

返到自己個位都未坐低，坐我前面嘅Anson就問

「搞咩陳sir會無啦啦揾你嘅？」

Anson問完我，Simon同小雲都拎咗個頭過嚟一齊聽。

呢件事好似唔俾得其他人知，等我諗過個好啲嘅原因先。

「Errrr……陳sir佢有啲事想我放學之後幫手啫」我嘗試解釋。

「又估唔到你同陳sir關係咁好喎〜」Anson回應我。

「咁佢之前教咗我兩年嘛，哈哈」我苦笑。

雖然好假，不過都總算濛混過關。