《再見了，還會再見嗎？》: 第26章 – 不幸之初

考試好快就過咗，今次又係除咗中文之外全部都合格。

估唔到考得最好嗰科竟然係數學，拎到個全級第九。

但最恐怖嘅係，頭10個入面，另外嗰9個都係E班……

佢哋教得快之餘，仲要全班都真係學得識，好黐線。

「車仔，你幾時有時間去陪我揀副新眼鏡啊？」小雲問我。





「不如而家啦，啱啱出晒成績又未有咩新嘢可以温」我回應。

「咁行啦〜」

去到眼鏡舖，小雲揀極都揀唔到邊副啱心水。

「Ah……好難揀呀！！你覺得呢副黑框定呢副黑框襯我多啲啊？」小雲手上揸住兩副差唔多嘅眼鏡問我。

點揀啫……





根本就差唔多，只係一副係大圓框，一副係扁平粗框咋嘛。

「黑框嗰副啦，黑框嗰副幾好」

「你咁樣算係有講過嘢咩……」小雲無奈地說。

咁你啱啱嗰句又算係有講過嘢咩......

「唉，咁你鍾意大定平嘅女仔呀？」





做咩會突然問啲古古怪怪問題㗎，是但答啦都係。

「大啦，大嘅點都好睇過平嘅」

「唔該我想要呢副丫〜」小雲將手上副大圓黑框遞咗俾職員。

又會突然咁快揀到。

「麻煩你聽日晏晝再過嚟一次，到時應該有得攞㗎喇」

「好，唔該晒〜」

「我搞掂喇，行啦車仔」

話說間眼鏡舖就咁啱開喺小巴站隔離，所以小雲一出去就上車走咗。





行嘅時候我一路諗，發現自己喺啱啱過去嘅一個鐘真係零貢獻。

俾小雲叫嚟幫下眼揀，但結果全程都係佢自己搞掂晒。

〜當日夜晚〜

我將成績表遞俾媽媽。

問心嗰句，我真係好怕又俾人鬧。

雖然叫做考咗個全班第一啫，但媽媽只會覺得呢樣係我應份要做到。

而佢嘅著眼位，就當然係唔合格嘅嗰科中文啦。





「今次都考得幾好」媽媽對我講。

我隻耳有事？？有冇聽錯？？

媽媽咁樣係咪已經算係讚緊我喇？？

「以後呢，總之你唔好成績跌得太犀利，我都唔會再逼你温習。你都開始大個，我再逼你都冇意思。」

媽媽講完句嘢就行咗入房。

媽媽今晚嘅一反常態反而令我仲驚過平時，唔知仲以為佢有精神分裂。

不過都好嘅，起碼我以後唔使再俾媽媽鬧先啦。