《再見了，還會再見嗎？》: 第11章 – 不用上課的日子

唔經唔覺就到咗十二月。

一講到十二月，就會令人諗起聖誕節。

話說小弟特別鍾意聖誕呢個節日，尤其係平安夜。

因為嗰日正正就係我生日，哈哈。

但係喺呢啲日子生日真係好慘，因為次次都撞正假期，所以從來都冇人會同我慶祝。





再加上佢原本已經係節日，大家都只會記得當日係平安夜而唔會記得係我生日。

不過算啦，前嗰20年都係咁樣過，我都習慣㗎喇。

「好想快啲放假呀~~」小雲伸一伸懶腰。

「但係放完假返嚟就考試喇喎」

「唔好講啲咁掃興嘅嘢啦，難得有假期就緊係日日瞓到自然醒」小雲一面滿足嘅樣子。





「係呢，你聖誕有冇嘢做啊？」小雲問我。

「唉，我應該都係俾媽媽逼留喺屋企温書㗎喇」

其實我唔係留喺屋企，而係去咗嫲嫲到住。

因為一到假期就會得我自己一個喺屋企。雖然媽媽成日鬧我，但係都會驚我自己喺屋企有咩事，所以就會將我送去嫲嫲到。

而媽媽會一早寫好我每日要温邊科同邊幾課，所以我都冇得偷懶去玩。





睇落好似好辛苦？

不過都係嗰句啦，習慣就好。

「噢，原本仲諗住約你……出嚟食個飯添，真係一日都唔得？」小雲追問。

聽得出小雲好似有啲失望。

「應該唔得喇，因為真係好忙。唔好唔開心啦，最多以後返學都同你食晏補數」我隨即安慰佢。

「你話㗎，唔准反口」

好彩笑返。

放假第一日嘅朝早，我自己一個拎住啲衫同要睇嘅書就出發去嫲嫲屋企。





點知一落街就撞到阿天。

「嘩，你拎住咁多嘢嘅，走難呀？」阿天一邊講一邊恥笑我。

「我準備去親戚屋企住幾日咋嘛」

「聖~~誕節喎，唔使約你嗰2個黑白配女朋友出街咩」阿天質疑地問。

「都唔係女朋友，唔好亂講啦。」我澄清。

「咁我次次喺學校見到你都有條女喺隔離，叫人點信你呀」阿天再一次質疑我。

「如果你諗唔掂揀邊個好啲，記得call我，等我幫你揀，呢啲嘢我經驗豐富。」





明明我都冇諗住揀…連書都未讀好，拍咩拖啫…

「我去打波先，有咩記得call我啊」

阿天一講完句嘢就走咗。

其實諗諗下，喺嫲嫲到住都幾好，可以逃離下呢個令人身心俱疲嘅屋企，又唔使再日日俾人鬧。

而爸爸媽媽佢哋仲要每隔幾日先會上嚟探我一次。

話就話想睇下我，其實就係想睇下我温書温成點，上嚟抽問下我書。

就連我生日，爸爸媽媽都冇上嚟陪我。

反而係爺爺出去買咗個蛋糕，然後同嫲嫲三個人分嚟食。





雖然我好似俾人囚禁咗喺到十日咁，但係我一啲都冇唔開心。

正正因為嫲嫲唔會逼我温書，會叫我唔好温同休息多啲，我啲壓力都冇平時咁大，連背嘢都背得快啲。

十幾日嘅假期轉眼就過，今日就開始第一學期考試。

「好驚啊，第一科就考中文」小雲對我說。

「你已經係全班中文最好嗰幾個喇喎，點會有事啊。行啦，夠鐘上課室考喇。」

其實小弟由細到大都唔係話好驚考試，只會當係平時做功課咁做。

因為緊張反而只會令到自己嘅表現差咗，搞到發揮唔到應有嘅水平。





「各位同學麻煩檢查試卷嘅頁數有冇錯漏。如果冇嘅，我哋喺9點正就開考。」

一揭開份卷…… 𡅅，係文言文…… 今次一定唔合格，唯有盡力做啦。

經過一個幾鐘同古人嘅對話，我已經攰到想死。

唔知點解，每次考完試都例牌有啲人出嚟擾敵。

「頭先份卷真係好淺，我用咗半個鐘左右就做完喇」

「第三條個語譯我之前做過，都幾肯定個答案係……」

唔明呢啲人係咩心態，不過真係好煩。

「一陣食完晏一齊留喺學校温書好冇啊？」我問小雲。

「好，緊係好啦！！但係你唔使趕住返屋企咩？」

「屋企都冇人，我返去又係自己一個，唔返啦」我回應。

我哋學校有個政策幾好，就係考試期間啲課室會長開，提供個地方俾學生留校温習。

食完嘢我哋就返返自己課室，一打開門就見到Zoe戴住耳機一個人睇緊書。

「Zoe~~ 你温緊咩啊」我興奮地問。

佢冇應我…… 

應該係個耳機太大聲所以聽唔到。

「唔好阻佢啦，我哋坐另一邊温」小雲對我講。

呢個三人組合喺課室唔知點解硬係有少少尷尬。

有樣嘢我諗極都唔明。

明明小雲同Zoe就唔熟，但係佢地就好似互相唔鍾意大家，搞到我好似夾咗喺中間咁。

差唔多6點左右我哋就離開課室，但係Zoe就繼續留低孤軍作戰。

跟住落嚟嘅半個月，每日都係重覆一樣嘅流程，考試，食晏，留低温習。

「呼，終於考晒喇！！」我大叫。

「真係好辛苦呀，日日都喺到對住啲書」

小雲講完之後嘆一嘆氣。

「我又覺得冇乜嘢喎，咪同平時差唔多」

「係咪傻㗎，日日留喺學校6個鐘都仲話同平時差唔多！！」

「咁真係嘛…」我愈講愈細聲。