《再見了，還會再見嗎？》: 第8章 - 陸運會（中）
「女子丙組一百米初賽，最後召集。報咗名嘅選手請盡快到起跑處報到」
如果冇記錯，Zoe好似有份跑100米，揾下本場刊睇下佢邊組先。
Lo So Yee……
「而家喺起跑處嘅係女子丙組一百米初賽嘅第一場賽事，睇嚟各位選手已經準備就緒」
「嗶！」
「競爭真係好激烈呀，帶頭嘅兩位都係嚟自1B班嘅同學。看台上嘅同學仔努力啲為場上比賽嘅同學打氣啦！！」
「GO GO RED HOUSE！！」
「WU~ BLUE HOUSE ！！WU~ BLUE HOUSE！！」
望住本場刊真係睇到我眼都花埋，啲字細粒到都唔係俾人睇嘅。
「Zoe喺第一組跑呀」小雲對我講。
「你又知我揾緊Zoe嘅？」
「唔好話我話你，你都冇其他朋友啦」小雲笑一笑。
呃……說穿了。
「頭兩名嚟自1B班嘅同學大幅拋離其他選手率先衝線！！」
幾經辛苦，我終於揾到Zoe個名，原來係第一組跑。
「吓！！！咁咪啫係而家跑緊！！！」我大叫。
「唔係跑緊，係跑完喇」小雲回應
「收到結果喇！！兩位嚟自1B班嘅同學分別以13.10同13.50嘅成績衝線，根據往年經驗，只要係14秒內都應該好穩陣可以晉級決賽喇，恭喜2位同學」
「事不宜遲，我哋即刻睇第二組嘅賽事……」
雖然我唔係話好鍾意睇跑步比賽，不過見係朋友所以想支持下啫。
睇唔到都唔緊要啦。
估唔到釘下釘下啲時間又過得幾快，眨個眼又夠鐘食晏。
「食越南嘢好冇呀，我知道附近有間好似幾好食」小雲問我。
「冇所謂，跟你」
「咁行快啲啦，呢到附近冇乜食肆㗎咋，一陣冇位就麻煩喇」
我哋一坐低就好快叫咗嘢食，因為做咗成日嘢已經餓到個肚打晒鼓喇。
「你一陣晏晝有跳遠比賽喎，準備好未㗎你」我問。
「傻仔，跳遠使乜準備㗎。我又冇諗住要贏，志在參與下陸運會咋嘛」
「呀車仔，咁啱嘅，又會俾我哋3個撞到你哋撐枱腳」
未拎轉頭我已經認得把死人聲，係Zoe嗰2個朋友。
「咁我同小雲一齊做嘢嘛，做完咪一齊出嚟食飯囉」我回應。
「做咩嚟先，曳曳呀？」
我已經唔想再同佢講嘢，真係好煩。
「食完就走啦，唔好理佢哋」小雲同我講。
「嗯」
晏晝都冇咩特別嘢發生，都係釘下釘下又夠鐘放學。
至於小雲個跳遠比賽……就緊係贏唔到啦，邊有咁多爆冷劇情。
媽媽：「起身喇車仔~ 快啲換衫刷牙返學」
望一望個鐘，原來已經7:30。
尋晚發生咗咩事我真係唔記得喇，好似係我返到去彈咗陣琴就食飯，之後一食完飯就攤上床瞓著咗。
睇嚟要打個電話俾小雲，話佢知我食唔到早餐好啲。
「喂，小雲？」
「車仔，我啱啱走咗班小巴，同唔到你食早餐喇，sorry啊」
「Um…我打俾你就係想話你知我啱啱先起身 哈哈」
「使唔使我留半個包俾你啊，我仲有剩喎」
「唔使啦，你食埋佢就得」
「咁我買盒維他奶俾你啦」
「一陣我俾返錢你。唔講住喇，再唔出門口我就真係遲到喇！！ByeBye！！」
一講完我就收咗線。
好似邊到怪怪地咁… 我係咪cut咗佢線…
佢應該唔會嬲我掛…
「你嘅！」
小雲將手上盒開咗嘅375mL維他奶遞俾我。
「細盒裝係咪賣晒喇，點解買咗大盒裝嘅？」我滿頭疑問。
「因為我都想飲少少，但又驚飲唔晒，所以就買咗大盒諗住同你share。你唔會介意㗎可？」小雲問我。
你都飲咗啦，我仲可以介意咩……
「唔使俾返錢我喇，話晒我都偷飲咗一半」小雲臉紅地說。
「咁好啦，多謝你盒免費維他奶喇咁」我笑一笑。
到底我以前要有幾蠢幾天真先會覺得佢真係想飲半盒，然後飲唔晒先分俾我飲。
不過咩都太遲喇。
今日嘅工作都係不停重覆咁喺到釘下釘下，都咪話唔悶。
真係好彩有小雲喺到吹下水，得我一條友喺到嘅話真係唔知點捱。
對我嚟講，今日嘅重點就緊係睇女子丙組100米決賽啦。
尋日已經miss咗場初賽，點都要睇返個決賽補數嘅。
「各位同學早晨，今日係陸運會嘅第二日，喺稍後時間將會陸續有唔同項目嘅決賽進行，大家要努力為你哋嘅朋友同社員打氣呀！！」
「而家即將會進行嘅係女子丙組100米決賽，1號跑道嘅係1B班嘅馬詠珊同學，2號跑道嘅係1B班嘅盧素兒同學，3號跑道嘅……」
之後嘅我都冇認真聽，因為我都唔識佢哋。
「加油！努力！加油！努力！」看台上面嘅人出盡奶力咁去為自己社嘅人打氣。
「On your mark，get set，GO！！」
「嗶！」
跑道上嘅選手一聽到呢一下隨即向前飛奔。
「領先跑出嘅係兩位1B班嘅紅社同學，所有選手都要加油呀！！」
然而，我嘅焦點只係放喺一個人身上。
看台上嘅吶喊聲愈嚟愈大，而選手們亦跑得愈嚟愈快。
到底Zoe會唔會拎第一呢？？
「第一名有結果喇！！」
紅社嘅社員不斷歡呼，因為頭三名都係由紅社嘅社員包辦晒。
「女子丙組100米嘅結果宣佈：第一名係嚟自紅社嘅1B班……」
「嗯，呢個結果都合理嘅」我心想。
「而家隨即會進行頒獎儀式，請3位得獎選手到司令台前揾Miss Chu」
頒完獎之後，Zoe同Choco行咗過嚟。
Choco啫係同Zoe一齊跑100米嗰個同班嘅女仔。
我：「恭喜晒兩位運動健將贏到獎牌！！」
Zoe：「我邊有Choco咁犀利可以攞到金牌喎」
Choco：「咁我田徑隊平時有練開，邊有得咁比㗎」
Zoe：「係呢，小雲 車仔，你哋有冇興趣跑班接呀？」
我：「班接？」
Choco：「班際接力呀」
我：「跑步呢啲嘢唔啱我，追巴士跑兩嘢就得啫，比賽就唔好喇。」
小雲：「我可以試下呀」
Choco：「咁我話俾Miss Chu知預埋你喇」
講真，我俾小雲呢句嘢嚇親，從來冇諗過佢竟然會應承跑4乘100，仲以為佢係嗰啲追完1分鐘巴士然後要抖1個鐘嗰啲人。
我：「咪住，乜接力唔係兩男兩女咋咩，咁你哋咪已經3個女囉」
Choco：「係啊，不過我呢兩日加埋已經跑咗好多場，所以想休息下。當俾個機會大家參與下囉，下下都我跑邊好玩㗎。」
Zoe：「一齊行啦小雲，我哋去揾兩個男仔返嚟比賽」
佢地走晒剩返我一個人喺到釘板，突然覺得有啲寂寞。
唔知係Zoe想留力班接定真係太攰呢，200米佢得第五名，但參賽者得6個人。
一陣如果見到佢再問下佢先。