［已出實體書］《香港殘響》-荃灣倖存者基地: 46
我躺臥在床上，心情輕鬆。
終於完成了醫生交託給我的任務，現在他跟小方助理已經開始埋首 進行研究工作，相信很快就會成功研發到疫苗， 令妹妹可以變回人類。
我的眼皮越來越沉重……
終於可以好好睡一覺了。
⊕
「 你好呀，博展葉。」
翌晨，我拿著那把聲稱不會斷的斷刀，站在少年攤主展博面前，努力展現微笑。
「噢，居然……你砍過很硬的東西？」展博的笑容有點僵硬。
「擋過幾刀而已。」
「那可能是使用者的問題。」
「回水。」
「哎呀……別這樣嘛，談錢多傷感情，大家江湖兒女！能夠相識一場， 總是緣份！」展博乾笑幾聲，「啊，你看！有人找你啦！一定是因為有開心事。」
我回頭， 只見兩名會所守衛微笑著走過來。
把我抓走。
⊕
啪、啪、啪。
有人拉動 幾個婚禮用的花炮， 五彩繽紛的碎紙與彩帶 灑落我們的頭上。
我、蕙、景、善兒、阿禮 站在KTV房間的中央， 接受大家的祝賀。
基地裏的眾人 在會所的K房為我們幾位戰士搞了一場小型派對。
興奮的小綠 站在台上手執咪高峰：「 再一次多謝！我哋依五位前線戰士， 冒住生命危險幫我哋搵到咁多食物！ 解決咗 基地嘅一個小危機！」
桌上的食物飲品多不勝數。
啪、啪、啪。
參加派對的人，約有六十位，全都在同一時間鼓掌， 喜慶歡騰。
灰褲生哥、 土木工程師阿周、幾位護士、 坐著輪椅的阿朗都在。
「而且佢地仲為基地帶來一位非常好身材……啊唔係，非常好身手嘅強勁新人，月平！」
鼓掌聲又起。
小綠補充一句：「 而且佢已經答應咗首領，將來佢願意到前線幫手！」
「嗯， 反正我得閒。」月平聳聳肩。
大夥兒看我們的眼神， 就像是看到偶像或是英雄那樣。
感覺是挺不錯的。
「好！ 我哋以茶代酒，人類必勝。」
小綠舉杯，我們每人都分到一小杯維他檸檬茶。
「人類必勝！」眾人齊聲說，大家舉杯。
然後， 就是大家最期待的時間……
「 太好啦~我好耐冇食過咖哩魚蛋啦！」
「呢啲椰子肉丸，就係用傳說中嘅超級珍品『新豬肉』所做嘅？ 味道唔錯喎。」
「家姐！呢度仲有陽剛菊花茶！」
糧食危機暫時得到解決。
能夠看到大家幸福快樂， 我也感到愉快。
月平靜靜的坐在一角，一邊吃著lays薯片，一邊看手機。
我坐在她身邊，留意到她的智能手機是著名的日本品牌。
「張相影得幾靚喎……依支係咩槍黎？」我看著她的手機螢幕桌布。
照片中的她，穿著一件白色外套，肩上扛著一把長槍，相當帥氣。
「嗯， 係錦田一個wargame場影嘅，依支係Steyr AUG A2突擊步槍，AUG係陸軍通用步槍嘅意思，現代奧地利聯邦軍都用緊佢。」
談起槍械，月平的聲調難得地帶著一點興奮。
「哦……你槍法咁好，係邊個教你架？」
「係爸爸……」月平摸一摸綁在上臂處的那條迷彩布條，「我嘅槍法同刀法都係佢教我嘅。」
她的眼神流露出一絲落寞與傷感。
我也不好意思再追問下去。
⊕
因為種種戰功，我們的房間升級了。
現在我們住在12樓C室的單位裡，主人房是屬於我跟妹妹，有獨立廁所，旁邊的兩間客房，分別是屬於陳景與月平。（ 完全可以想像到陳景歡喜若狂的樣子）
B室就一直是阿力的住所，裡頭有許多日系的擺設，現在阿禮與善兒搬了進去，各自有獨立房間， 舒適大床。
大家成為了鄰居。
⊕
一天，我們在阿力的家閒聊。
蕙凌望向我與景，「……話時話，之前我同阿力係大河道同你哋相遇，你哋當時係咪以為殭屍們只有一個弱點，就係攻擊大腦先會死？」
景坐在沙發上，回應：「係呀，個時大家都係係啲WhatsApp群組入面道聽途說，以為一定要透過眼眶攻擊大腦，d殭屍先會死。」
我點點頭，「我仲記得，個時我係屋企同隻笑殭決鬥，用刀插佢頭都唔死……後來先知，原來要破壞大腦先得……當然，再後來我哋先知原來插心臟、斬首都可以令佢哋真正死亡。」
坐在輪椅上的阿朗說：「我覺得……依個就係資訊流通性嘅問題，亂世前，我哋有連登之類嘅討論區做交流分享，真確嘅資訊傳播得好快……但後來無左互聯網，我哋就好難迅速獲得有用資訊……」
蕙凌拍一拍自己的大腿：「啊！我突然間有個諗法，其實我哋可以將連登實體化？」
「點樣實體化？」
「學外國連儂牆咁，我哋係荃灣區四周圍整『連登牆』， 張貼有用嘅圖文資訊比大眾知！」蕙凌說得眉飛色舞。
阿朗亦有點興奮：「得喎！因為始終荃灣區仲有唔少人係外面，可能只係知道極少……或錯誤嘅殭屍資訊……」
阿力亦同意：「嗯，可以講下殭屍嘅種類，能力上嘅分別……荃灣有咩倖存者基地。」
「等大家可以提高存活率。」陳景。
善兒磨拳擦掌：「設計圖文資訊個啲可以交比我，我以前視藝成日拎A架。」
蕙凌給善兒一個讚賞的笑容，「張貼地點可以揀係仁濟醫院正門外面，個邊宜家比較安全，兩三個人去都得。」
「好，一於就咁話，我哋 為依個社區做番多啲嘢，」我站了起來，「咁既然又要出外，我就認真去買返把兵器返嚟先。」
蕙笑著說：「又去搵博展葉呀？」
我搖搖頭，望一望客廳時鐘，「依個鐘數，啱啱好，」
「我去搵個位大名鼎鼎嘅黑市商人。」
(多謝大家持續支持!)