［已出實體書］《香港殘響》-荃灣倖存者基地: 41
先是粉紅色肌腱，然後是真皮層、表皮層……
在我眼前，妹妹的傷口正以不可思議的速度修復著。
然後傷口完全消失。
守衛按停 手機計時器，「五秒……呢個四厘米嘅傷口， 用咗五秒就可以完全修復……」
醫生以筆電輸入記錄，臉上的表情相當複雜，似是有一絲興奮。
看見 妹妹不再痛苦，又回復那呆萌的表情， 我稍為鬆了一口氣。
「 楊醫生，我有個問題想問你……」
「想問點解我願意幫你妹妹？」
我點點頭。
「係首領拜託我，佢話為左答謝你冒生命危險救咗蕙凌。」
原來是這個原因。
雖然，後來我知道楊醫生與首領的「交易」內容並非這般簡單……
⊕
過了三天， 終於有初步的檢驗結果。
診症室裏，楊醫生跟我解釋著：「 我哋已經化驗過你妹妹嘅血液、肌肉組織同幹細胞，發現裡面的確係有Z病毒嘅存在，雖然數量不多， 但呢隻頑強嘅病毒其實一直不斷自我複製、倍增中……」
我臉色一變。
「 不過你又唔使太擔心，你妹妹因為年輕，佢體內嘅白血球同殺手T細胞都好強， 能夠有效抑制到呢種病毒嘅增長……依三者喺體內達成微妙嘅平衡狀態。
「但暫時都未知可以頂到幾耐， 所以就要盡快研發疫苗幫佢……長話短說，呢幾日我睇咗好多病毒學嘅文獻， 我通頂寫咗一條解藥formula，而製作依種解藥疫苗需要十六種材料，而家我仲爭四種材料， 需要你幫我去收集…」
「好，請講。」
「我需要五支體溫計，用裏面嘅水銀做材料……我仲要Aluminium salt同 polysorbate 80……另外，我需要一隻活嘅殭屍做素材。」
我睜大了雙眼， 懷疑自己是不是聽錯了什麼。
「嗯，我係需要你捉一隻活嘅女黑甲返黎基地……放心，我會畀三種法寶你，助你完成任務。」
⊕
為了令妹妹可以完全康復，我自然答應了醫生這個要求。
徹夜未眠，我坐在床上看著醫生給我的字條，上面寫著兩種化學物質的英文名稱，好讓我可以輕易找回來。
「佢話嘅三種法寶， 就係呢袋嘢？」景拿起我床尾的一個布袋。
這啡布袋有如一個背包那麼大。
我點點頭。
「 咁你諗住喺邊度搵齊依四種材料？」
「 有一個地方有化學物品儲藏室，同時又有大量黑甲。」
「……？」
「仁濟醫院。」
景摸著下巴思考，「的確，嗰邊黑甲比較多， 但同時亦都相當危險，係黃色區域……既然係對付黑甲，咁用磁鐵棒係最好。」
「嗯，用阿展嘅遺物……」我從櫃裡拿出一支磁鐵棒，「 可惜啲電池已經耗盡，我問過阿力，佢話上頭暫時提供唔到呢種特殊電池……」
「係咪939交流電大電池？ 咁啱我有三粒喎。」陳景笑著從背包裏掏出三條大電池。
我又驚又喜：「你點解會有！？我之前喺市集搵過曬都唔見！」
「 我係幫襯『巡遊商人』買嘅，佢平均一個月先嚟基地一次！ 我用左五個超薄岡本安全套同佢換！」
「 你啲安全套……上次冇畀啲白衫拎走咩！？」
「呢啲咁重要嘅珍品，我當然係貼身收藏！」性事專家揚起下巴，驕傲地說。
我立即將三條電池塞進棒內。
按了一下Test鍵。
棒頭閃現少許藍電，運作正常。
到真正運作時，這磁鐵棒可產生的攻擊力是——
50萬伏特。
⊕
處理好我的右手兵器，翌晨，我來到市集來購買我的左手兵器。
走了幾攤，我在近水池的位置發現到我的目標。
這個地攤有唐老鴨毛公仔、 唐老鴨鎖匙扣、 唐老鴨筆記本、一柄尖頭開山刀、一柄鋸齒小刀、一柄太極刀及一柄可作武器的沉重手電筒。
我的目標當然不是唐老鴨，而是那柄刀。
我拿起那柄有少許生鏽的開山刀……
——係重咗啲，又舊左啲，不過形狀同我嗰把八斬刀好相近。
我望望高中生模樣的男攤主，問：「以物易物？」
「是呀。」眼前這位文質彬彬的少年用國語回答我。
我聽出他的台灣腔，試探地問：「你係台灣人？你……識聽廣東話？」
「 少少，禾識聽伍識講。」半桶水廣東話。
「 你點解會喺呢度……你嚟香港旅遊？」
「是呀，當時我就住在附近的悅來酒店，真的沒想到會發生這麼大件事，完全沒有交通可以到機場……」
「 原來係咁……」我對空氣揮一揮刀，試手感，「三支大豆棒同你換，ok？」
「不行，至少五支。」
我撫摸著有污垢的刀身，「但係……你把刀好舊喎，刀柄接駁位仲有啲鏽跡……會唔會斷㗎？」
「當然不會！」少年拿起地上的太極刀，「我也練過武術，這裡所有武器都經過我本人測試！ 絕對不會有問題的。」
他手握太極刀，揮舞兩下，虎虎生風，「如果我賣給你的兵器斷了，我葉展博這個名字，以後讓你倒著念！」
我思考了一會，「ok, 既然你講到咁，我用五支同你換。」
一手交一手， 對方跟我道謝。
快離開時， 我問了對方一個問題：「話時話，啲唐老鴨用品咁新淨……都係你嘅？」
葉展博點點頭，「是呀，都是我從台灣帶來的。」
「……你嚟旅行點解要帶唐老鴨公仔？」
「因為唐老鴨是我的家人，我到外國旅行，當然要跟他在一起啊。」展博理所當然地說。
「……」
（這位台灣葉展博在earth-99的世界是一位「英雄」，八極拳好手。）
⊕
武器預備妥當，然後就是人手。
要進入黃色區域，至少要五位成員吧。
我、景、蕙、禮。
當中阿禮作為醫療隊員。
還有一位……
我選擇了上次在課堂裡，右側大半邊屁股飛離了木椅的口香糖活潑少女，善兒。
她說要三塊巧克力作為報酬，我答應了。
然後她說要我教她刀法作為報酬， 我又答應了。
⊕
正午時份。
我看著緩緩拉開的大鐵閘，身後是四位團員……
望著出面的蒼涼街景，我深深吸一口振奮的空氣。
——今次，唔可以再有人死。
ig: water_lam_ig
fb: 林泳/water.lam
記得加ig同fb呀, fb可以set搶先看 😊