《伙記唔該落單》: 第四十五章「無賴」

「曾話過 要戒煙 但講了就算」

一直以嚟，沛霖都喺我身邊陪住我，而且不停叫我戒煙，但我只係敷衍了事。

直到而加，沛霖終於都因為我食煙而出咗事，我冇得唔下定決心去戒煙。

有一刻，我諗過直接飛去英國搵沛霖，但後來諗清楚之後，我覺得一日未戒到煙，一日都冇資格去見沛霖。

誰不知，一戒就係三個月。





因為未戒過煙，我以為掉咗包煙，然後盡量唔食就得，但原來唔係。

戒煙係好辛苦，啱啱開始戒嗰一星期，完全忍唔到手，每日都起碼要食四、五枝，加上返工放break同埋落堂之後都慣咗要食枝煙，所以真係好難戒。

「喂，食枝煙啦。」鋪頭個收銀大叔有時叫我去食煙，我都忍唔住跟咗佢出去。

每次食完煙都好有罪惡感，我會覺得自己點解少少事都做唔到，於是我每晚返到屋企就上網睇啲成功戒煙嘅例子。

「戒煙要明白三件事，食煙有咩危害、戒煙有咩好處，仲有點樣戒煙。」





食煙傷身就係人都知，我自己有時抖啖氣都頂住頂住，為免第時真係三十歲就肺癌，都係趁早戒甩佢。

至於戒煙嘅好處，唔洗問梗係會令沛霖睇到一個全新嘅杰少啦，每個月仲可以慳千幾蚊，第時儲下錢同沛霖去旅行都唔錯。

最後，點樣戒煙，有人話遞減式戒煙係最好，即係第一個星期可能一日八枝，第二個星期一日七枝，如此類推，去到完全唔食為止。

於是我下定決心，由一日一包煙減到一日十枝煙，初初開始戒真係好難忍，但每當諗我起沛霖嘅時候，我就有動力唔去食。

一個月之後，我終於可以一日淨係食三枝煙。





第二個月，已經可以幾日食一枝，唔單止洗少咗錢，抖氣仲暢順返好多，皮膚都靚埋。

「原來我未食煙個樣係咁靚仔...」我喺廁所照照鏡，發現唔食煙同食煙真係差好遠。

有一次，有幾個以前都算熟嘅mk仔朋友搵我飲嘢，我都拒絕咗，因為我知去飲酒一定會食煙。

去到八月尾，我已經冇食煙兩個禮拜。

我拎住婆婆張相，然後攤咗喺床。

「你個孫我總算做到一件成功嘅事。」

過兩日就開學，不過沛霖仲未搵我，可能仲喺英國養緊病，但我未打算飛住。

我諗住起碼戒多一個月先，加上唔知沛霖好返未，貿貿然過去好似唔太好，而且佢屋企人見到個mk仔搵佢，唔知會點諗。





於是我決定等多半個月，如果沛霖仲未搵我，我就直接飛英國搵佢。

「喂，仆街仔！」

「子彈？你好似十年冇打過俾我。」臨開學前一晚，子彈突然打咗俾我。

「掛住你呀嘛！出嚟飲嘢啦！」

死喇，未同子彈講我戒咗煙。

「我...我唔飲喇。」

「下？點解呀！」





「我戒咗煙，費事俾你引誘。」

「唔係掛！煙不離手嘅杰少都戒到煙？」

「係呀，為咗沛霖。」

「哦...原來為咗女！好撚浪漫呀！」

「我屌你去食屎。」

「哈哈講笑啫！咁我唔逼你喇！飲嘢實會食煙，你都係乖乖地做個好男人啦下！mk仔就留返俾我做！」

「仲mk仔呀？mk佬都就嚟有你份啦。」

「屌你老味！」





就係咁，我終於喺開學之前，成功戒煙。