《伙記唔該落單》: 第四十三章「如果天空要下雨」

喺我得知沛霖原來有先天性肺炎，而且係因為我食煙令到佢病發，仲去埋英國醫病之後，我坐咗喺地上面。

「係我......一切都係我嘅錯。」旁邊經過嘅途人都用奇怪嘅眼神望住我。

突然，天空落起大雨，路人相繼走入商場避雨，而我，仍然坐喺地上面，任由雨水淋落我身上。

「最衰都係我...係我親手破壞咗呢段關係。」我即刻掉咗手上嘅煙，拎咗褲袋包煙出嚟狠地踩爛咗。

「點解！點解！點解我要食煙呀！！」我一路大叫，一路踐踏包煙。





明明沛霖已經講過好多次，佢好唔鍾意我食煙，好想我戒煙，但係我淨係當佢嘅說話係耳邊風。

「杰仔呀，其實你有冇諗過戒煙。」

「咁就當係你為咗我戒，好嗎？」

我一次都冇試過戒，係一次都冇。

點解我從來都冇企過喺沛霖嘅角度思考，點解我要咁自私，純粹為咗嗰幾分鐘嘅快感，令到沛霖要受埋呢啲苦。





沛霖咳得咁辛苦，係我一手造成。

「屌！！」我好嬲我自己，即刻拎咗褲袋入面個火機出嚟，掉咗入草叢。

我坐喺原地，已經唔知道身邊經過咗幾多人，時間過咗幾耐。

我知道自己再淋多陣雨，我就會發燒，但我呢一刻已經冇任何感覺。

我淨係想沛霖醫返好自己，然返嚟香港，俾個機會我贖罪。





「咦...你仲未走嘅？」突然，雨水冇再滴落嚟，同時出現一把熟悉嘅女聲。

「嘉..嘉瑩？」我抬起頭，望住嘉瑩。

「你做咩坐咗喺度？」嘉瑩擔住把遮，遮住咗我。

「冇，冇嘢。」我抹一抹身上嘅污泥，然後企咗起身。

正當我諗住轉身走嘅時候，嘉瑩叫停咗我。

「喂！」

「有冇時間傾兩句？」

我猶豫咗一陣，就點點頭，然後跟咗嘉瑩去華明停車場某一層嘅後樓梯。





「做咩嚟呢度...啊嚏....」

「費事你入商場吹病啦。」嘉瑩拎咗張紙巾俾我。

「唔..唔該。」

「點解你又會落返嚟。」

「冇呀，我醒起漏咗啲嘢未買，咪落返嚟，點知就見到你坐喺地下淋雨。」

「........」我有啲唔好意思咁望一望嘉瑩。

「點呀你...係咪煩緊沛霖嘅事？」





我慢慢抬起頭，然後望住嘉瑩。

「係...」我又垂低頭。

「唉，其實呢，我同敏怡一開始都唔知沛霖有呢個病，係早排佢咳得越嚟越犀利，有時仲會作嘔。」

「我同敏怡話帶佢去睇醫生架，但佢死都唔肯，話咩唔想我哋擔心喎...不過我哋點放心得落。」

「所以我哋就逼咗佢去睇醫生，最後就知道佢有先天性肺炎。」嘉瑩一臉擔心嘅表情咁望住我，但我完全冇勇氣望住佢。

因為我知道，係我累到佢嘅朋友搞成咁。

「不過咁，沛霖未識你之前都好地地，係自從識咗你，接觸你多咗，就咳得越嚟越犀利。」

「你自己有咩睇法？」





「其實...我...我知係我害咗沛霖。」

「嗯？點解。」

「因為我...我..我食煙。」呢個時候，我已經完全唔敢直視嘉瑩，我真係好慚愧。

嘉瑩深深吸咗一口氣，然後趴咗喺後樓梯嘅欄杆，望住停車場出面嘅馬路。

「杰少。」

「係....」

「其實你有幾了解沛霖？」