《伙記唔該落單》: 第四十一章「兩種人」

第四十一章「兩種人」 https://youtu.be/WDVd_ekSJiw

未夠愛你　才會與你　擁抱
抱過你才沒法離開你
吻過你而未愛你多好
但我早知跟你共舞　不等於愛慕
就算開心不要傾心得太早

痛著愛　笑著吻
你共我是兩種人

偏偏一抱緊你就比世上情人還吸引
痛著愛　笑著吻
吻盡也沒法令愛發生
即使可以跟你互相開心得痛心
仍可以　不相襯

自從隆發結業之後，我做返個普通嘅大學生，每日就係返學放學，做assignment，生活過得好平淡。

至於返唔返工，我打算再抖多一排，等sem break之後先再搵工，可能會去子彈介紹嗰間泰國嘢嗰度做。





時間嚟到四月，沛霖佢哋都準備開始考dse。

講起沛霖，我哋都幾個月冇見，唔知佢溫書溫成點呢，冇咗我喺身邊，仲識唔仲做數，哈哈。

「呀杰，今日辛苦曬。」組員A拍一拍我。

「唔洗客氣，我走先。」

「估唔到呢個mk仔都會做project。」喺我轉身之後，組員B細細聲同其他人講。





我笑咗笑，如果係半年前嘅我，應該開咗佢波，不過自從識咗沛霖，成個人定咗好多，冇咗嗰種古惑仔心態，即係唔啱傾就隻揪嗰種。

我搭火車返到粉嶺之後，去咗鋪頭諗住睇下咩環境，原來鋪頭而加已經變咗珠寶店。

「果然係咁，小商戶都係唔夠啲大財團鬥。」

我無奈地搖搖頭，然後點起咗樣煙，就轉身離開。

正諗住行返屋企嘅時候，迎面見到一個人。

呢個人，我諗我一世都唔會忘記。

「沛..沛霖...」

「杰仔。」





「好耐冇見。」沛霖微微笑起嚟。

「你...瘦咗好多...」我望住沛霖，佢比我啱啱識佢嗰陣，的確瘦咗唔少。

「嗯，係呀，呢排掛住溫書嘛。」

「你..仲有食煙呀..」沛霖指住我手上面枝煙，有啲失落咁望住我。

「呃...係呀...」我即刻掉咗個煙頭，然後踩熄佢。

「不過你唔鍾意嘅..我唔會食架喇..」

「嗯，你想食想就食啦，我唔會逼你戒。」





「亦都唔知..用咩身分叫你戒。」

一個係好乖嘅學生，一個食煙飲酒嘅mk仔。

或者，我哋真係兩個世界嘅人。



「咳..咳...」

「你仲未好返？」我有啲擔心沛霖，佢好似病咗好耐。

「未呀...」沛霖苦笑起嚟。

「喔....係呢，你...數學溫成點呀...」





沛霖笑咗笑，然後就對我講。

「你仲記得...我最渣就係數學？」

「嗯..所有嘢..我都記得。」

「嗯。」沛霖點點頭，微笑起嚟。

「不過呢，我未溫曬呀，哈哈。」

「沛霖..你唔介意嘅...我教你？」

我哋互相對望，沛霖又笑咗笑。





「好呀。」

我同沛霖肩並肩咁行咗去佢樓下，然後沛霖帶咗我上去佢屋企。

「你屋企冇人？」

「嗯，冇呀，爸爸返咗工。」

我除咗鞋之後，就同沛霖坐咗喺佢間房，開始教佢做數。

「你有邊到唔明？」

「概率後面嗰part唔太識..」

「哦..睇下先..呢度咁樣....」

於是我就開始教沛霖做數，情境就好似返返去上年十二月咁樣。

但係做做下，沛霖又咳咗起嚟。

「咳..咳咳...」沛霖一路咳，同時望咗望我隻手。

我頓時發現，係咪我隻手有煙味，所以煙親佢。

「係咪我....」

「唔係，唔關你事。」沛霖捉住咗我，然後對住我笑咗笑。

「喔..係呀..咁我哋繼續。」

但係做咗兩個鐘之後，沛霖咳得越嚟越犀利。

「不如我都係走先...」我其實知道係自己太大浸煙味，搞到沛霖係咁咳。

沛霖猶豫咗一下，最後點點頭，就同咗我出廳。

「杰仔，見返你真係好開心。」我同沛霖企咗喺門口，沛霖就抬高頭望住我。

「我都係。」我微笑起嚟。

「咳..咳..多謝你幫我...」

「幫你..？」

「教我做數。」沛霖笑咗笑。

「嗯。」我點點頭。

「好喇，我唔阻你溫書...你溫多陣就抖下啦，dse要考好啲，入到想讀嘅大學。」

「多謝你，杰仔。」

於是我著返對鞋，開門行咗出走廊。

點知，沛霖叫住咗我。

「杰仔！」

我一轉身，沛霖已經沖咗上嚟攬住我。

而且，沛霖佢錫住咗我。

「.......」

我放低書包，雙手攬返住沛霖，合上眼同佢好好享受呢一吻。

或者我哋係兩個世界嘅人，但有你嘅出現，我先做返真真正正嘅梁嘉杰。

諗返起初初識沛霖，因為爭吵而種下我哋彼此之間嘅感情，我哋會一齊踩單車，我哋會一齊食壽司，我哋會一齊睇戲，你會睇到喊，我就負責幫你擦眼淚。

係一個mk仔同一個乖學生嘅愛情故事。

去到呢一刻，我發現自己已經愛你愛得好深。

沛霖。

我愛你。





















過咗一分鐘，我哋終於捨得分開。

「沛霖。」

「你考完dse，我哋就一齊，好唔好？」我雙手摸住沛霖塊面，認真咁講。

「嗯，嗯...」沛霖一路流淚，一路點頭。