《伙記唔該落單》: 第三十六章「兄弟」

我拿拿聲收埋張紙落褲袋，然後企咗喺收銀冷靜落嚟，重新思考成件事。

「上次喺聯和墟嗰陣，銘仔郁我唔到，今次想覆桌算係合理，而且華明係佢地頭，要捉一個人去威脅我並唔難。」

「不過自從除夕嗰一日晚，沛霖已經話佢唔可以再出夜街，所以銘仔佢哋冇可能喺夜闌人靜嘅時候郁手。」

「但係又冇理由日光日白捉人掛？」

我諗嚟諗去，都唔知沛霖到底係咪真係比銘仔班友捉咗，於是我決定打個電話俾沛霖。





「你所撥打的號碼暫時未能接通，請遲..」

搵唔到沛霖，又冇敏怡佢哋電話，咁而加唯一一個方法去確認沛霖嘅安全，就只有真係去華明排球場睇下。

「伙記......伙記！」

「喂，你冇嘢嘛，心不在焉咁嘅？」子彈拍一拍我，將我從幻想拉返出嚟現實。

「喔...冇事。」本來想叫埋子彈一齊去，但銘仔叫我一個人去，都係唔好玩嘢好啲。





二嚟呢壇嘢唔關子彈事，沛霖係我嘅朋友，冇理由拉埋子彈落水。

我唯有繼續做嘢，等到九點半再過去。

而加已經八點，安全起見，我喺鋪頭拎咗把遮走，之後就去咗華明個公園嗰到坐。

「唔會有事嘅...」我一路等，心入面一路默念，希望銘仔只係吹水。

等到九點左右，我就去咗7-11，諗住買枝水飲，點知俾我見到一個好熟悉嘅身影。





嘉瑩...？係咪嘉瑩嚟？

「嘉瑩！」我行上去拍一拍佢，佢擰轉面見到我嘅時候嚇咗嚇。

「咦，係你呀，咁啱嘅？」嘉瑩一身街坊look，應該純粹係落嚟買嘢飲。

「係呀，我..我想問你最後一次見沛霖係幾時？」

「沛霖..？起碼一個禮拜喇喎...做咩呀？」

「呃..我有啲緊要嘢搵佢，你有冇方法搵到佢？」

「哦...我幫你打俾佢問下啦。」於是嘉瑩就打咗電話俾沛霖，但如我所料，都係冇人聽。

「打唔通喎..可能瞓咗...不過佢呢排都早瞓，佢成日溫書溫到好夜，搞到身體差咗好多呀。」





「係呀...咁唔緊要，唔該你。」

「唔洗，我上返去溫書先喇，拜拜。」

係喎，佢哋過多兩個月就考dse，而加係要開始發力溫書，唉屌不過而加唔係諗呢啲嘅時候。

連嘉瑩都搵唔到沛霖，睇嚟我真係要單刀赴會，我喺華明商場出面食咗枝煙，就準備行過去。

突然，有人拍我膊頭。

「喂，你個仆街仔鬼鬼祟祟做乜。」屌，原來係子彈，嚇死人咩。

「你做咩會喺度？！」我拉咗子彈埋一邊講。





「冇喎見你好似古古怪怪咁，咪跟住你，睇下你搞邊科囉。」

「我..我而加要去救沛霖呀...」我喺褲袋拎咗張紙俾子彈睇，佢就呆咗一呆。

「九成九係銘仔嚟，我同你過去。」一講完，子彈就開始行過去。

「喂！你唔好去啦！佢淨係叫我一個人去，而且呢壇嘢唔關你事架。」我即刻拉住子彈，好激動咁同佢講。

子彈嘆一嘆氣，然後捉住咗我兩個膊頭。

「杰少，你睇過警匪片未呀，會唔會真係啲賊叫你一個人去救人質，你就真係一條友去救人質呀？」

「仲有，你係我兄弟嚟，你嘅事即係我嘅事，我冇理由掉低你一個人。」

仆街，你真係冇撚得頂，如果我係女人，我即刻嫁俾比你。





於是我哋兩個人，喺月黑風高嘅夜晚，行咗去華明排球場。