《伙記唔該落單》: 第三十三章「重覆」

呢一刻嘅氣氛非常尷尬，我哋嘅手指尾開始互相疊住，然後大家偷偷哋望咗對方一眼，仿佛再過多一陣就要打茄輪。

作為男方嘅我，決定主動出擊，冇理由個女仔仲會大膽過自己架嘛。

我吞咗啖口水，慢慢擰轉面望住沛霖，呢個時候沛霖好似意識到我望住佢，佢都開始擰轉面望住咗我。

個心跳得好快，我完全唔敢想像跟住落嚟會發生咩事。

沛霖開始慢慢合埋眼，做好曬準備等我嘴落去。





「呼。」我深深呼咗口氣，然後輕輕將個頭靠近沛霖塊面。

沛霖...究竟你個嘴會有幾滑...

正當我準備錫落去嘅時候，褲袋突然震咗起嚟。

嗞嗞...嗞嗞...嗞嗞...

「呃sorry...我聽個電話...」我有啲尷尬咁坐返直個人，然後就聽電話。





「喔..唔..唔緊要..」沛霖dup低頭細細聲應咗我，不過我feel到佢好緊張。

「喂...」

「嘉杰....你喺邊呀.....我想見你....」

雪寧？唔係嘛你居然喺呢個時候打嚟，又搞邊科呀...

我望咗沛霖一眼，然後就急急腳起身行入廁所。





「做咩呀你...又飲酒？」我掩住嘴，細細聲咁問，希望沛霖唔會聽到。

「哎..哈哈..我又俾仔飛喇...噁...」

「可唔可以陪我呀...」

「我..我而加唔得閒呀..再搵你..你自己小心。」

「喂喂...嘟。」於是我cut咗雪寧線，然後熄咗個電話。

唉，又會喺呢個時候失驚無神打嚟，而加點算好，錫又未錫，明明頭先個氣氛咁好，冇理由特登走返出去錫沛霖掛。

我唯有死死地氣走返出廳，好尷尬咁坐返喺梳化。

「頭先...邊個打俾你..？」





「呃，以前一個舊朋友嚟...」

「哦...」沛霖點點頭，然後就靜咗。

「係呢..」我諗住睇下可唔可以延續返頭先嘅情節，點知沛霖打斷咗我。

「都夜喇！我都係返去先...」沛霖企咗起身。

我望一望個鐘，而加先十一點九。

「咁..咁快？唔倒數完先...？」我捉住咗佢隻手問。

「唔..唔喇...我驚太夜返又會俾爸爸鬧..」沛霖鬆開咗我，然後有啲失落咁著返對鞋，就開門走咗。





我冇特登追返佢，望住沛霖個背影，覺得自己真係好撚失敗。

點解會搞到咁。

「發生咩事...」

我坐咗喺地下，望住個天花板發呆。

「明明差一步，我同沛霖嘅關係就有機會更上一層樓，甚至可能...」

「唉，不過已經錯過咗呢個機會。」

我開返部電話，見到雪寧whatsapp咗我幾次。

「你喺邊呀」




「出嚟陪我好冇？」
「都係唔洗喇」

而加搞到兩頭唔到岸，沛霖又走咗，雪寧又唔洗我出去，即係今個除夕都係自己一個人過。

不過，頭先雪寧咁樣打一打嚟，令我諗返起啲嘢。

當初雪寧同我一齊，本來都好地地，但我以前成日群住班古惑仔。

我以為選擇同雪寧分手，咁就唔洗拖累佢，唔洗令佢受傷。

但係原來，而加嘅雪寧，先係真真正正嘅受傷。

「如果有朝一日，我同沛霖一齊咗。」





「佢最後，會唔會同雪寧一樣。」

我成晚就坐喺屋企，反覆思考同一樣嘢。

「果然，係咪做返朋友，會好啲？」