《伙記唔該落單》: 第二十七章「酒醉三分醒」
琴晚子彈同沛霖都約咗我，兩邊都係去聯和墟，不過我揀咗同子彈去睇波。
你話得我同沛霖兩個人嘅都還好，但有埋嗰兩條女就真係不了，去到又唔知同佢哋講乜，到時肯定俾佢哋瘋狂做鳩我同沛霖。
「仲有三個鐘就收工，爽呀。」子彈一邊chur住啖煙，一邊笑笑口咁同我講。
「你好想睇波咩。」
「利記對車仔喎，睇下利記點樣屠車仔都好呀。」
「是但啦，我自從喺男童院出返嚟之後都冇睇過波。」
「所以你咪要睇下囉，男人老狗唔睇下波點得架。」
我反咗下白眼，踩熄枝煙就同子彈入返去。
「咁幾點開波？」
「好似十二點。」
「十二點？收工過到去頂盡九點半咋喎。」
「挑驚乜春，去食個宵夜，再去bar吹下水就好快過架啦。」
都係嘅，同子彈吹水基本上唔會悶得去邊，講下嘢啲時間就好快過。
夜晚九點鐘，我就同子彈喺鋪頭過去華明巴士總站搭277x去聯和墟。
「我哋走喇，嫻姐雄哥byebye！」
「好少見你兩個一齊收工喎，去邊玩呀。」
跟住子彈就箍住我條頸，攬咗我埋去佢度。
「同呢條死仔去飲嘢呀。」
「唔好飲咁多呀，聽日記得返起身返工。」嫻姐笑咗笑，就同我哋say byebye。
「放心！我會睇住佢架喇！」
屌你咩，我洗鬼你睇住。
「你好撚大汗呀仆街。」我fing開咗子彈，然後睥住佢。
「喂。」子彈突然又認真起嚟，搞到我有啲驚。
「咩料...」
「你最近好似唔同咗。」子彈摸一摸下巴，用個好可疑嘅眼神望住我。
「邊度唔同呀...」
「我點知，哈哈。」
子彈真係戇鳩鳩。
嗞。
電話突然震咗下，唔知邊個咁夜搵我。
「對唔住呀琴晚放低電話就瞓著咗
」「今朝一起身就出咗去搵敏怡佢哋所以冇覆到你 sorlysorly!!」
「但你真係唔嚟呀？
」「考慮下」
我覆完沛霖，子彈就伸個頭埋嚟睇我部電話。
「邊個搵你？」
「沛霖囉。」
「佢搵你做咩。」
跟住我就同子彈講咗沛霖想約我飲嘢呢件事。
「屌你唔係呀嘛，同我睇波都唔搵女？你真係癡撚線....」
「你理得我。」
有問題咩，呢個世界唔係男就女架啦，次次都要約女架咩。
我同子彈喺聯和墟落車之後，去咗附近間茶記食嘢，呢度好多間餐廳，所以我哋都係求其揀咗間平嘅嚟食。
食完嘢，子彈就帶我去咗海聯廣場地下出面嗰間bar，呢間bar就犀撚利喇。
我住咗粉嶺廿年，都未撚見過入面有女人。
「做咩嚟咗呢間，你又話去pacific？」
「因為呢...我啱啱發現pacific原來冇波睇，哈哈。」
「..............」
我真係屌出聲。
「喂恆爺。」子彈入到去就同咗個酒保仔打招呼。
「你成日嚟？」我問子彈。
「一時時啦，間唔中嚟搵下以前啲老友。」
我點點頭，就同子彈坐低咗。
「飲咩酒？」個酒保行咗過嚟問。
「你有冇咩特別想飲。」子彈問我。
「是但，要杯64係咁易濕濕口。」
「咁兩杯大64，原味。」子彈就同個酒保講。
呢個時候，我睇一睇whatsapp，發現沛霖仲未覆我，可能已經飲緊酒。
希望佢唔好醉啦，醉咗就大撚鑊。
三個青春少艾嘅女學生，喺酒吧入面飲醉酒真係唔知會發生咩事。
「掛住人呀？掛住人咪去搵佢囉。」子彈笑一笑。
「撚有。」於是我就收返埋部電話，同子彈吹下水，玩下骰盎咁。
去到大約十一點九，我再睇睇whatsapp，沛霖仲係灰剔，搞到有少少擔心。
「我出一出去。」
「喂..就嚟開波喇喎...」
「得啦，一陣返嚟。」
我實在有啲擔心沛霖，唔知佢一個女仔會唔會有啲咩危險，雖然有敏怡佢哋喺度，但始終都係唔放心。
我一出去就打咗俾沛霖，但係佢冇聽到電話。
「喺邊間呢.....」搵咗幾間，都見佢唔到。
而加淨返7-11隔離嗰間，於是我就行咗過去。
一轉入嗰條街，離遠就見到一個熟悉嘅背影喺出面，係沛霖嚟。
但同時間，沛霖俾三個男人圍住咗，我就即刻衝咗上去。
「嚟啦...陪我哋玩下啦...」
「放...放..放手呀.....」
其中一個男人捉住咗沛霖隻手，喺度奸笑。
「喂！你哋做咩呀！」
「邊個呀.....喔？杰少？」
係銘仔，仲有傻豹同膠水。
「放手。」我即刻推開傻豹同膠水，拉返沛霖出嚟，然後用手托住沛霖個背脊。
因為沛霖已經醉到差唔多不省人事。
銘仔吐咗啖口水落地，之後就望住我。
「真係冤家路窄，我識女，關你撚事？」
「抑或，佢係你條女呀？」
我一時間唔知講咩好，唯有扶住沛霖企喺原地。
「不過你都算犀利，上次十幾條友都劈你唔死。」
上次？佢唔係講緊我同子彈俾龍哥跣嗰次呀嘛。
「華明單嘢...你有份？」我有啲愕然。
「挑，梗係啦，唔通你老豆有份呀？」
「哈哈哈哈哈！！」
「點解你要咁做..明明件事已經過咗咁多年..」
銘仔聽到之後，狠狠咁睥住我。
「點解？你勾二嫂，我唔斬你一隻手，我咪好冇面？我仲洗出嚟行！？」
我即刻退後咗兩步，本身我諗住帶沛霖走，但我醒起敏怡同嘉瑩可能仲喺裡面。
「但..但係呢單嘢都係我同你之間嘅恩怨，關子彈佢咩事？」
「子彈？你話凌進呀...哦冇嘅，條粉腸之前累到龍哥跌咗五十個喎，龍哥想收佢皮好耐啦。」
原來龍哥一直都耿耿於懷，想報復。
枉子彈仲傻到以為龍哥真係好人到唔見咗五十萬都可以當冇事發生。
「所以..所以你同龍哥就夾埋..搵刀手買起我哋..」我一路講，一路退後。
「梗係啦！唔通請你飲茶呀？」
「而加仲自動送上門！買一送一！」
佢哋越行越前，好似想郁手。
正當我唔知點算嘅時候，身後有人衝咗過嚟。
「想點呀你？」係子彈，仲有嗰個咩恆爺。
「喔？原來吹咗雞。」
「而加三對三好似冇咩著數。」
「杰少，今次算你好彩。」
「下次就唔知。」之後佢哋就走咗。
呼，好彩子彈及時趕到。
「做咩出咗嚟...」
「你話呢，利記贏到三比零你都未見人，我驚你有咩事咪帶埋恆爺出嚟搵你。」
「頭先發生咩事？」
我望一望酒吧入面，見到敏怡同嘉瑩已經醉到趴咗喺枱面。
「遲啲再同你解釋，幫手送咗入面嗰兩條女走先。」我指一指敏怡佢哋，然後子彈就同恆爺入咗去幫佢哋埋單。
「咁我送佢哋走先，沛霖你搞掂。」之後子彈帶咗敏怡同嘉瑩上的士。
我望住沛霖個樣，成塊面紅曬，個身又熱。
「做咩飲到咁醉...」沛霖已經醉到冇曬意識。
好彩而加冬天，沛霖著咗長袖衫褲，如果著住條熱褲喺酒吧飲醉，真係唔知會點。
「你個傻妹。」都係送佢返華明先。
我一隻手攬住沛霖條腰，一隻手捉住佢隻手，搭上我膊頭，慢慢行去十字路口截的士。
「屌...做乜鳩...一架的士都冇...」
等咗五分鐘都未有的士，見沛霖細細粒，應該唔算好重，所以我決定孭住沛霖行返去。
聯和墟去華明，一個人嘅，廿分鐘乜都行到。
但係孭住條女，就難講。
「喂，醒未呀。」我隔幾十米就問一問，但沛霖都冇應我。
呢個傻女真係唔適宜飲酒，哈哈。
差唔多一點半，終於行到返華明。
「睇下先...沛霖好似住華冠樓...」
當我準備拉門入去大堂嗰陣，feel到沛霖部電話震咗一下。
我放低咗沛霖喺公園張長櫈，然後拎佢部電話嚟睇。
爸爸：「仲未返？」
死喇，我咁樣帶沛霖上去，佢爸爸會唔會以為我係變態佬，然後報警拉鳩我。
況且沛霖成身酒氣，俾佢爸爸見到都好似唔係咁好。
於是我孭起咗沛霖，調頭走咗。
「都係返我屋企好啲。」