《伙記唔該落單》: 第十六章「圈套」

呢個時候，球場兩邊嘅入口分別都有六、七個刀手，佢哋有啲揸木棍、有啲揸刀仔。

佢哋用兇狠嘅眼神凝視住我同子彈，個眼神凌厲到直頭想攞我哋命。

「呀！！斬人呀！！！」有幾個師奶路人經過見到啲刀手，就立即相繼走避。

子彈望一望我，好似唔敢相信眼前嘅係事實。

或者係唔知點解龍哥會跣我哋一鑊。





「仆街....」我咬緊牙關，拎起咗把刀。

估唔到隔咗咁多年，我竟然要再劈友。

啲刀手已經慢慢行入球場，圍住我同子彈。

「冇可能...龍哥唔會跣我...冇可能...」子彈仲喺度諗緊點解會中咗圈套。

「屌！而加唔係諗呢啲嘅時候。」我喺個箱拎埋第二把刀出嚟，塞咗俾子彈。





「係咪都要打，諗咁多做乜。」我話。

老實講，我有啲緊張，仲有啲驚。

對面大大話話有成十幾人，個個都有架撐，睇牌面我哋一啲勝算都冇。

你估子彈真係叫甄子丹咩。

出口俾佢哋封住咗冇得走，而加係唯有還拖。





「呀！！！！！」

班刀手開始衝埋嚟斬我同子彈，好彩我同子彈身手都算靈活，先係用刀擋咗幾下佢哋嘅攻擊，然後憑住巧妙嘅走位，又避開咗幾刀。

趁亂我仲斬中咗其中一個人嘅手臂。

「屌你老母！」班刀手開始急，唔理三七廿一全部衝曬埋嚟。

「嗰度！」我留意到其中兩個人中間有條比較大嘅罅，就叫子彈喺嗰度衝出去。

當然，班刀手都唔係弱智，佢哋見我哋諗住走佬，就即刻捉實我哋。

我成功走出咗佢哋條人鏈，但子彈俾人拉住咗件衫。

「呀！」子彈俾人劈咗一下。





「走呀！」我即刻回身扯走子彈，同佢喺球場嘅另一邊龍門逃走。

我扶住子彈，回頭一望，發現啲刀手仲追緊嚟，沿途啲路人見到我哋都嚇到四圍走。

「返鋪頭....」子彈皺起眉頭。

「頂住呀。」我扶住子彈，一路跑返鋪頭。

但係我扶住子彈，速度實在唔夠班刀手快，正當我以為我要俾人斬開九碌嘅時候。

「救命呀！劈友呀！」

我見到前面有架消防車停咗喺度，車上面嘅幾個消防員留意到我哋，就即刻落咗車，截住班刀手。





「停手！你哋做咩呀。」

我冇停低，繼續扶住子彈跑返鋪頭，再回頭一望，班刀手已經走得七七八八。

「嫻姐！落閘！」我扶住子彈，放咗佢落張櫈到坐。

呯！

「嘩你哋搞咩嚟呀！成身血嘅！」

「雄哥！幫我拎個急救箱落嚟！」

而加鋪頭截咗單，已經冇曬客。

我望住子彈件染紅咗嘅白色衫，然後慢慢拉起佢衫，見到子彈個肚上面有一條起碼十厘米長嘅傷口。





「屌...班友係咪痴撚線....」我呆咗呆。

實在太恐怖。

子彈嘅嘴唇開始變白，額頭又冒汗，啲血仲越流越多。

「點算呀！？洗唔洗報警？」嫻姐好心急咁問。

「唔洗。」我開始用大量棉花紗布㩒實子彈個傷口，然後叫嫻姐冷靜啲。

「佢會冇事，唔洗報警，警察咁垃圾，叫嚟都冇用。」我皺起眉頭。

「啊....啊...」子彈閉上雙眼，強忍痛楚。





十分鐘之後，佢個傷口開始止血。

「呼...呼...呼...冇事喇。」我抹一抹汗。

「嫻姐...拎枝消毒藥水同繃帶俾我。」

「忍住。」我望住子彈。

「得啦...」子彈無力咁笑咗笑。

雄哥幫子彈點咗枝煙，我就幫佢消毒同包紮。

「嗯.....」子彈應該忍得好辛苦。

「呼....忍住。」

搞咗一大輪，終於叫做幫子彈包好個傷口。

我同嫻姐係咁易交代咗一下，子彈就叫佢哋走先，話佢會幫手鎖門。

「杰。」

我望住子彈，等佢講嘢。

「對唔住。」

我笑咗笑，就拍一拍佢。

「講呢啲。」

「不過，點解龍哥會跣我哋。」我問。

雖則話走得甩已經偷笑，但我一定要覆桌。

冇理由要子彈白白捱一刀。

「我都...呼嗯...我都唔知。」

見到子彈呢個樣，我就好唔忿氣。

點解子彈咁信嗰個龍哥，到頭來會咁樣食咗刀。

「喂，不如你瞓陣先。」

「我喺度睇住。」

「等聽朝嫻姐返嚟開鋪，我再送你返屋企。」

「但..你聽日唔係..唔係要返學咩..咳咳..」

我點起咗枝煙，之後望住子彈。

「嘶.....呼.........」

子彈笑咗笑。

「得，在心中。」