《伙記唔該落單》: 第十三章「等待」

琴晚見完雪寧，佢今日已經冇搵我。

可能站於雪寧嘅角度，其實只要見一見面，就覺得好足夠、好開心。

女仔就係咁易滿足。

星期六嘅朝早九點鐘，又係時候返工，我報咗今日嘅更，諗住留聽日俾婆婆。

聽晚仲要去幫龍哥做嘢，真係唔知龍哥會叫我同子彈做咩。





「婆婆，我出去喇。」

「喔..小心啲呀乖孫。」

我擺低咗一百蚊俾婆婆，因為我見到雪櫃仲淨少少肉餅同菜，婆婆未必要用咁多錢。

「嫻姐雄哥早晨。」

「喂早晨。」雄哥喺廚房同我講。





雖則話係有個廚房，但其實唔係嗰啲西餐大廚房，只係普通茶記廚房嘅尺寸，即係可以喺出面睇到入面做緊咩嘅嗰啲。

「早晨呀杰少，食咗早餐未？」嫻姐問。

「未呀。」

「叫雄哥煮個麵你食。」

今日有啲肚餓，所以我冇拒絕到。





「喂。」喺等雄哥淥麵俾我嘅時間，我出咗門口搵子彈食煙。

「喂，你又知我喺度。」

「唔喺鋪頭，咁梗係出咗嚟食煙。」

子彈笑咗笑，就繼續吞雲吐霧。

「聽晚喎。」子彈拍一拍我。

「得啦我記得嘅。」我望一望子彈話。

「提一提你啫，聽日你又唔返工。」

「點知你個衰仔會唔會放我飛機。」





「有機會架。」我笑住咁講。

入返去鋪頭之後，我食咗個麵就開工。

我一路做嘢，一路喺度諗，究竟龍哥會叫我同子彈做啲咩。

明明以龍哥嘅江湖地位，係完全唔洗搵我同子彈呢啲蛋散二打六。

硬係覺得古古怪怪。

做到晏晝四點幾，有個著便服嘅女仔企咗喺門口，我就叫佢入嚟。

呢個女仔著住一件黑色短袖衫、淺綠色嘅迷你裙同一對布鞋。





「你啲friend呢。」我隨口問咗句。

「佢哋有嘢做，今日得我一個咋！」

「哦...坐啦。」

沛霖坐低咗之後，就開始睇menu，過咗陣就叫我埋去寫嘢。

「食咩呀今日。」

「我要碗生菜魚肉就得。」

「喔？咁少？」我抬起頭望住佢。

「係呀..今日冇咩胃口呀..」





「哦..」跟住我就俾咗張單雄哥。

見唔算好忙，我又行咗去收銀挨下。

「杰仔。」

「嗯？」

「今晚收工之後...得唔得閒？」沛霖問我，而且有少少面紅。

唔係想約我掛。

「我要返屋企喎...做咩。」





「冇呀...我想同你食個飯啫..」

咁突然嘅喂。

「係呢，你返屋企有嘢做？」沛霖問。

其實都係要煮飯比婆婆食，冇咩特別。

「要煮飯。」

「煮飯？煮比邊個？」沛霖有啲好奇咁。

「呃...婆婆囉...」

「淨係煮比婆婆？」

「係呀。」

沛霖若有所思咁托住頭，就同我講。

「咁不如你煮埋比我，我地三個一齊食！」

講笑咋下話。

一時之間唔知用咩理由拒絕。

「但係...」

「我仲有一個幾鐘先收工喎...」

「唔好喇掛。」

嗯，佢唔會等我咁耐嘅。

「唔緊要架唔緊要架！我可以等你！」

What the fuck，你有冇咁想同我食飯。

沛霖好誠懇咁望住我，搞到我有啲唔識拒絕。

「呃..唉得啦得啦，你鍾意。」

唔知係咩原因，一向唔太鍾意同女仔行得咁埋嘅我，居然應承咗沛霖。

「就咁話啦！」沛霖笑住咁講。

今鋪真係大鑊。

「喂，沛霖頭先約你？」子彈問我。

「嘶..........呼.......係呀。」

「真係好主動喎佢。」

「但我對佢真係冇嘢。」我望住子彈。

「點解你好似咁抗拒女仔咁。」

於是我就分享咗我同雪寧嘅故事。

「哦...啫係你唔想再傷害人。」

「可以咁講啦。」

我望住個天，嘆一嘆氣。

真係唔想再唱於心有愧。

六點半，夠鐘收工。

「喂，行得喇。」