[喪屍][人性?][政治?]在喪屍橫行的年代裏，我只想做一個人: 56 自由之苦 (二)
「......解放軍前線基地大概位於獅子山公園，而叛軍就駐紮喺九龍東軍營。而關於目前為此嘅戰況......」
黑沙圍村公所中，十多人坐在一張偌大的圓桌旁，儘管沒有人首先提出，但人類和喪屍大致分成兩邊坐下。除了外出執行任務和負責的治安任務的喪屍，許多喪屍控制者都參與了會議，而人類一方，除了由人類自己內部選出，負責管理村子秩序的人類代表，其餘的普通人類則只有在村公所門外等待的份。
九龍巷戰繼續是首要議題。應否介入，以及要攻擊那一方，應否改變方針，仍然眾說紛紜。
「假如有邊一方主動攻擊嘅話，我哋就去攻擊返佢......呢個唔係我哋一直以嚟嘅方針咩？我唔明白有咩好討論。」其中一位人類代表如此說道。
「你頭先冇聽咩？解放軍兵力喺嗰邊投放嘅實際兵力我哋仍然未清楚......但可以肯定嘅係，佢哋呢一次係認真，以我哋目前嘅兵力，就算最後打得贏都會損失慘重。另一點係，今次係大規模嘅城鎮戰，喪屍喺咁樣嘅戰場下好難發揮出實力。」另一個人類代表回道。
「我當然知道。我當然唔係話要同佢哋正面衝突。例如話，可以去突襲新圍軍營，嚟個圍魏救趙呀。」
這提議很快就被否決。首先新界北部的三個解放軍據點，即新田軍營，潭尾軍營和新圍軍營之間的地理位置頗為接近，只要攻擊其中一個，另外兩個在不到一個小時內就會馬上趕來救援，更不用說來自深圳的援兵。其次，透過讀取某一具解放軍士兵屍體的大腦得知，這次軍事行動事實上是由香港島的中環軍營司令部發動，他們通過唯一逃過被炸毀命運的東區海底隧道來到九龍，新界這邊的部隊不過是擔當支援的角色，換言之新界北的防守很可能沒有他們想像中的薄弱，更何況對方冒喪屍有可能趁虛而入的風險也要向叛軍主動出擊，自然在後方有充足的防備。
「咁不如等到佢哋兩敗俱傷之後先出擊？」
「按目前情況睇，雙方起碼會僵持相當一段時間。」
「咁唯有繼續攻擊解放軍嘅補給路線囉。」
郭伊絲在討論上一直不動聲色。她覺得有除了襲擊人類之外，更好的解決辦法。最初就是她首先召集喪屍控制者，提出保護人類的建議，這方案在最初幾乎沒有人認為可行，連跟隨她的喪屍，在最高峰時，亦不超過五人，但到了叛軍出現，戰況白熱化後，不論是跟隨她的人類或喪屍的數量一下子就膨脹起來。說老實，眼前這種喪屍和人類共同治理的情境，早已超出她當初的預期，然而她總覺得，她可以做得更多。
「家姐！」
「係？」
郭伊絲一陷入思考就會忘記自己身邊事物，其他旁人開口叫她，才醒起自己身處的情況。
「而家開始表決喇。」
「哦，嗯......」
會議結束後，郭伊絲一聲不響，心不在焉的離開了，郭伊騏連忙追了上去：「家姐！你搞咩呀？成個會都唔見你出聲嘅？」
「我喺到諗......話唔定會有參加戰爭以外嘅方法。」
「你係指，袖手旁觀？」
郭伊絲搖搖頭，「我哋可以試下利用喪屍嘅力量，令交戰緊嘅雙方和解......為咗真正嘅和平。」
郭伊騏摸摸後腦，「呢個......唔容易做到呀。況且，如果解放軍同叛軍真係達到和平嘅話，咁而家呢一切嘅存在價值......」郭伊騏想了想，面露難色，沒有說下去。
「所以我先冇出聲呀。」她這樣說著，一邊向著村子北部前進。郭伊騏跟在後面喊道：「喂！你咁急去邊呀？」
「去搵呀嵐。」
兩人來到村子北部的一所廢棄學校前。學校牌匾漆字已經因風吹雨打而褪色，但仍依稀能辨出「黑沙學校」四字。此時杜嵐正為村中的孩子授課。學生只有寥寥數人，最小的只有四歲，最大的也不超過十歲。一來村中的孩子本來就不多，二來聽到學校重新營運，但老師竟然是喪屍，大多持觀望態度，只有那些最初開始便受郭伊絲照顧的人才願意送孩子來，但也不過是當這邊是托兒所之類的設施。
「好喇，有冇人識呢條問題呢？」杜嵐指著黑板上的數學問題，一連問了好幾次，然而所有學生都沉默不語，沒有人想答問題。
「呃，冇人識呀？其實答案係......」課室死氣沉沉的氣氛令杜嵐也覺得不太自在，她尷尬地笑了笑，「今次呢條問題淺少少。」她把題目抄寫到黑板上，「有冇人識呢？」
依舊沒有任何人說話，杜嵐向課室中最年長的男生道：「亦康，你識唔識答呢？」
名叫李亦康的男孩抬著腮，懶洋洋地回道：「唔—識—」
「呢條只不過係普通加減題，你唔會唔識架。」
「都話咗唔識，你煩唔煩？」
「好啦......」杜嵐無奈地點點頭，把步驟答案寫到黑板上。
「伊騏，你覺唔覺得你咁樣偷睇法真係好變態？」
幾乎整塊臉貼到窗戶觀察課室情況的郭伊騏猛然回頭，怒道：「咩偷睇，頭先呀嵐見到我架，仲對我笑添！」
「所以我話你變態呀。」
他搖搖頭，推搪道：「咁你呢！你又嚟做咩呀？」
「學校復課同埋畀呀嵐去教書喺我力排眾議之下先至通過，我自然有責任監察呢個計劃係咪成功。」
「哼......」郭伊騏不再理她，繼續去看課室的情況。然而，聽到窗外有人說話，坐在最後排的孩子舉手喊道：「老師！有變態佬偷睇呀！」
杜嵐苦笑道：「佢係嚟觀課架......應該......」
被發現的郭伊騏，回望一眼，郭伊絲不知甚麼時候已經退後了兩步，裝作事不關己樣子。
郭伊騏低聲罵道：「你條仆街......」
郭伊絲惡作劇似的笑道：「你唔好流哂口水咁款呀，人地有男朋友架喇。」
「佢男朋友都被你趕鬼走咗啦......經你之手！」
郭伊絲聳肩：「趕走咗，唔代表唔再愛佢呀。」
郭伊騏一呆，「咁即係點？」
「即係你冇機囉，傻仔！」
「吓，我唔明喎。」
「有啲嘢係得女人先明架喇。」
「你都算女人——」
郭伊絲狠狠的捏了郭伊騏大腿一把，他吃痛大叫，隨即意會地連忙掩住嘴巴，但杜嵐仍然責備似的向他瞪了一眼。
過了一會，那個名叫亦康的男孩忽然舉手，杜嵐喜上眉梢，以為終於有學生願意回答問題，「亦康，你識答？」
他搖搖頭，「老師，我唔明點解我哋仲要番學。」
杜嵐愣住了，想不到突然有學生問這樣的問題。男孩繼續道：「呢個世界已經變成咁樣，再讀呢啲嘢有咩意思呢？」
學生們開始鼓譟起來，似乎這樣的問題一直存在他們心中，而李亦康不過是把問題提出來而已。
「所以你認為，我哋而家學緊嘅知識，除咗所謂嘅實際用途之外，就咩意義都冇？」
「唔通唔係咩？」
「哎，應該點講呢？」杜嵐搔搔頭，「我覺得，探求知識呢件事本身就已經好有趣呀。況且，你又憑咩斷定，而家學嘅嘢係冇用呢？」
「......」男孩默默坐下，但仍然一臉倔強，剛才的說法顯然沒有說服他。
見情況不太妙，郭伊騏問姊姊：「喂，使唔使幫下佢？」
郭伊絲冷冷回道：「......身為老師，佢一定要學識點應付咁嘅情況。」
「既然係咁......」杜嵐想了想，撿起一直放在桌面，之前劉居政權仍在時在用的教材，看了數眼，說道：「好，話說有一日有喪屍入侵黑沙圍，而你就係黑沙圍防衛團嘅成員。你武器係十字弩，你企喺圍牆上面，同其他防衛團嘅成員奮勇咁射殺喪屍......」
她發現原本嘈雜的班房突然安靜下來，所有學生專心地聽她說故事。她微微一笑，繼續道：「你瞄準住離圍牆最近嘅喪屍，「咻」一聲，射中咗佢嘅額頭，嗰隻喪屍即刻就訓低咗喇！你繼續攻擊，射死咗三隻喪屍之後，補充咗十支箭，然後又射死咗五隻喪屍。但係喪屍嘅攻勢好猛烈，於是你向喪屍扔咗一個炸彈，「轟」一聲，有十六隻喪屍訓低咗呀！當你以為危險已經解除嘅時候，頭先以為已經炸死咗嘅喪屍，竟然有三隻爬向你嗰邊！」
學生們凝神的聽著，杜嵐話鋒一轉，問道：「請問目前為止，你殺死咗幾多隻喪屍？」
學生們開始議論紛紛，然後異口同聲答道：「二十四隻！」
杜嵐搖頭，準備說出答案時，李亦康懶懶的回道：「二十一隻。」
杜嵐嘉許地向他微笑，開始解題，之後才繼續說故事。
離放學的時間愈來愈近，來接學生放學的家長們開始聚集在窗前。本來沒有人期待喪屍的授課會有甚麼成果，然而眼前這種學生專心致志的情況可說是始料未及。
「......然後一個月黑風高嘅晚上，突然又有喪屍襲擊。有三隻喪屍喺窗到爬入嚟，另外有四隻喪屍由大門入嚟。與此同時，你一直照顧緊嘅，被喪屍咬傷嘅同伴，呢個時候突然從昏迷中甦醒......經過多次戰鬥，你箭術已經大大提高，每兩箭中就有一箭可以確實咁射死喪屍。為咗要完全消滅屋內喪屍，最多要消耗幾多支箭？」
經過一陣討論後，李亦康舉手道：「老師！括號入面係三加四，然後括號外面乘以二......答案係咪十四支箭呀？」
若有所思的杜嵐搖搖頭，輕聲回道：「你嘅同伴已經變成喪屍，所以括號入面係四加四......」她把算式寫上黑板時，李亦康忽然叫道：「如果佢變成好似老師你咁樣呢？」
杜嵐倏然停下了，李亦康低聲續道：「如果佢變成好似老師你咁樣，佢算係喪屍定係人類？」
杜嵐沉默不語，其他小孩睜大眼睛，像是準備見證甚麼，而外面的家長則抱著看戲的心情，津津有味的看杜嵐一動不動的樣子，霎時間課室內外竟然鴉雀無聲。
「唉！今鋪真係捉蟲。」郭伊絲內心抱怨一句，大剌剌的走入課室，叫道：「各位同學，大家好呀。」
孩子們大叫：「郭伊絲！郭伊絲！」
四歲的孩子也學著叫，但她發音成「郭耳屎」，逗得其他孩子哈哈大笑。
「好喇，今日第一日返學，各位開心唔開心呀？」
孩子們靜了下來，你看看我，我看看你，好像不清楚「開心」是甚麼意思，此時李亦康卻道：「都算開心嘅。」
「good！咁大家今日係咪學咗好多嘢呢？」
孩子們似懂非懂的點點頭，郭伊絲又道：「係咁就太好喇！今日就上到呢到，大家起立！叫老師再見啦！」
「老—師—再—見—」說罷他們就飛快地執拾東西，郭伊絲向著心已經飛到別處的孩子們喊道：「記得返到屋企都要溫書同做功課呀！」
「喂！」郭伊絲拍一拍在發愣的杜嵐：「我覺得教得幾好呀。今次有班家長見證，應該會令佢哋改觀，之後學生人數就會慢慢增加。我諗你可以開始教埋英文。」
「我覺得我——」
「你啲反應咪鬼咁行啦，咁快就話唔得。」郭伊絲微笑看著魚貫而出的孩子們，由家長領著離開學校，向杜嵐她們道別後，在郭伊騏旁邊經過時也不忘邊笑邊說：「拜拜變態哥哥！」
四歲孩子也笑道：「拜拜，變態哥哥。」
「連你都......唉，拜拜，小朋友。」
杜嵐凝視漸漸遠去的孩子們的背影，低聲道：「我只係覺得我未準備好。」
「呢個世界永遠冇『準備好』呢回事，只有『做定唔做』。」這位只有二十歲的女生狡黠地眨眨眼，「呢句都係終端教我嘅。我覺得呀，要教小朋友只有一個訣竅，就係唔好當自己高高在上教緊人，而係要當佢哋係朋友咁。小朋友喺呢方面畀你想像中敏感好多......見到你一開始就搵到訣竅，所以我覺得你一定可以做到。」
杜嵐低頭想了想，又問：「......點解你唔自己去教？」
「太麻煩同太辛苦喇。雖然我鐘意小朋友，但要教咁細個嘅，果然係太麻煩。」
「所以咪推畀你做囉，呀嵐。」郭伊騏插嘴道。
郭伊絲沒有否認，只是摸著後腦傻笑，然後她隨即正色道：「不過呀，你今日嘅教法呢，方向上冇問題，但內容要改改佢......畢竟，喪屍話要殺喪屍，唔係好妥。呢種意識形態咁重嘅做法唔可以接受，你估文革咩。」
杜嵐喃喃自語：「喪屍話要殺喪屍......」
郭伊絲裝作沒留意杜嵐困惑的神情，自顧自的續道：「如果你由細個就教佢哋喪屍係敵人，咁佢哋嘅觀念到大個就好難改，比大個咗先接受嘅觀念更難改。你都見到，其實佢哋本身唔會有咩成見，相比起大人，佢哋更容易接受喪屍同人類共處嘅世界——只要你創造到咁樣嘅世界嘅話。」
杜嵐默然不語，郭伊騏向姊姊道：「喂，我哋仲要去巡邏架，快啲行啦。」然後他轉向杜嵐傻笑道：「呀嵐，再見。」
被郭伊騏拉著走的郭伊絲向杜嵐喊道：「拜！」
「我都未問清楚，」和郭伊絲並肩走著的郭伊騏忽然問姊姊：「你話呀嵐唔會鐘意我，到底係咩意思？」
「哎，又係呢啲問題，你唔悶架？男仔成日講呢話題會畀人笑架。」
「癡線，唔通女仔成日講就得？莫名其妙。」
郭伊絲歪著頭，在想如何解釋杜嵐的情況給弟弟，然而兩秒後覺得太麻煩便放棄：「呢啲事，你拍過拖就明架喇。」
「據我所知，閣下好似未拍過拖，如何得出咁嘅結論呢？」
郭伊絲淡淡的回道：「你又知我冇拍過？」
郭伊騏陡然止步，一臉難以置信的看著姊姊。郭伊絲吐吐舌頭，拉著弟弟，「點都好啦，行喇！」
「證人，唔好迴避問題！」
「法官閣下，我無話可說！」
當下四處無人，背對著弟弟的郭伊絲，臉上掛著絕不會當面向弟弟以外的人展露的甜蜜笑容。
時間回到約一個月前，剛與權叔和駱輝分頭行動的呀禮，抱著已經再也跑不動的白詩婷，向前狂奔。
頭靠在呀禮肩膀上的白詩婷，眼看士兵愈追愈近，不禁在他耳邊急道：「呀禮，佢哋追到嚟喇！」
「我知道！」
穿越鬱鬱蔥蔥的樹林，隨時要注意著腳下以免絆倒之外，外面有一大群荷槍實彈的士兵，現在還抱著一個人，早已精疲力竭。支撐著他繼續奔跑的不過是「保護白詩婷」這個念頭而已。
「遇親士兵都冇好事發生！」這樣想著時，眼前忽然一片光亮，原來他不經不覺竟然已經跑到馬路上，幾輛軍車停泊在路上，士兵正來回巡邏。呀禮驚覺走到盡頭時，他把心一橫，跳過馬路旁的欄杆，往著馬路上漆黑的那一端拔足狂奔。他似乎聽到後面傳出的槍聲，子彈擊中金屬欄杆的碰撞聲，白詩婷在他耳邊的尖叫......他肩頭一緊，呼吸頓時暫停，小腿後方像被甚麼猛烈地擊中，他不由得的跪了下來。
「放開我呀！」白詩婷尖叫哭罵，抓著呀禮的衣衫，但最終仍是被士兵抓住，而身體被按在地上的呀禮，只能眼巴巴的看著白詩婷被帶走，他自己因為臉頰壓在地上，甚至想要說罵人的話也只能從嘴巴吐出不成型的音節。
「別吵！」一名士兵不留情的在呀禮肚子踢了數下，原本像壞掉發聲玩偶在發出不明不白聲音的呀禮頓時住口，萬物彷彿消失不見，只剩下肚子傳來的劇痛......到他恢復知覺時，自己已經躺在軍車上，雙手被綁在背上，嘴巴塞入布條，眼前一片漆黑，他稍一遲疑後才發現連眼睛也被綁上布帶。空氣彌漫一股難聞的霉味，傳到身體的冰冷觸感令他不由得的扭動身體，但甚麼也觸碰不到。地板在輕輕搖晃著，他想自己大概身處在貨車之類的地方。一頓搖晃後，車子在槍會山軍營停下，兩名士兵把呀禮帶到審訊室，經歷一連串的審訊，確認他平民的身份之後，呀禮被扔到理工大學，名字被寫上兵員名單上，不明不白的被扔到訓練營中，他會在那裡遇到只是比他早少許來到的權叔，和其他像他一樣被某種不可抗力牽引下匯聚在此的平民，參加一場誰也不清楚為誰而戰的戰爭。