[喪屍][人性?][政治?]在喪屍橫行的年代裏，我只想做一個人: 31 喪屍戰爭 (三)
我們聞言便馬上跑出石屋，來到土地廟前。村子圍牆上滿是火光，無數身上冒火的喪屍在圍牆前來回走動，在這邊遠眺就只可以看到棋羅星佈的微弱火花在不斷搖曳，但可以想像村子的情況必是十分兇險。
「到底係邊到嚟咁多喪屍？」
「明明喺到住咗咁耐都唔見有喪屍，點會突然間......」
眾人七嘴八舌的討論，呀禮忽然說道：「你哋記唔記得小剛講過嘅嘢？佢話喪屍可以被操控......呢班喪屍好明顯就係畀人控制去攻打黑沙圍。」
雖然聽來匪夷所思，但這的確是可能性最高的解釋。問題是，他們為甚麼要攻打村子？
杜嵐低聲問：「但係，控制佢哋嗰個人，點解要攻打條村？」
「仲使問嘅，」呀禮馬上回答，「梗係為咗入去食人啦！」
杜嵐雙眼一眨，似乎想說下去，但選擇住口不說。白詠欣指著村子大叫：「喂，班喪屍係咪打算疊羅漢咁爬上圍牆？」
本身的情況是圍牆上火光串連成帶，與另一邊，喪屍身上的火光仍然有不少距離，但現在卻見到那兩堆火光愈來愈接近，甚至有些地方已經互相接觸。
「喂，白詠欣！你想去邊呀？」
「我要......我要入村！」
「你唔好傻啦！咁嘅情況你點入去呀！」
「但係婷婷佢仲喺入面......」
「你而家衝過去，除咗畀班喪屍分屍之外仲做到啲乜？」
白詠欣一呆，垂頭喪氣的走回來：「咁唔通要我就咁企喺到，睇住班喪屍衝入去？」
權叔低聲說道：「咁都冇辦法架......」
「有辦法。」呀禮忽然這樣說，眾人一同望向他。只見他不慌不忙的說：「如果我嘅假設係真，嗰班喪屍係有人操縱嘅話，咁只要——」
杜嵐恍然大悟：「只要搵到控制喪屍嗰個人，令佢控制唔到喪屍就得！」
「well，我想講係隊淋佢，不過都差唔多啫。」
我們回到石屋取武器，就沿著山路到了圍村附近的樹林。原本不應出現喪屍的地方，此時已經有幾隻在呆站著。望出樹林，隱約可以見到圍村石牆上的火光。
「但係，喪屍有咁多隻，我哋點知邊隻先係控制佢哋嗰隻？」
「睇戰爭片都知，」呀禮低聲回答杜嵐，「總大將都只會坐喺大後方指揮，方便控制全局。我諗只要喺村口最外圍，啱啱開始發現有喪屍嘅地方，仔細留意下，就會發現係邊個陷家祥控制班喪屍。」
換言之，由此處開始，理論上就是屍群控制者的藏身地。眼前那幾隻喪屍，有些面向圍村，有些面向我們身處的位置。從後者呆滯的目光可知他們只不過是普通喪屍，而前者雖然看不到樣子，但從觀察站姿——駝背，弓身，左搖右擺，可以判別他們似乎不擁有智力。
那幾隻落單的喪屍各自相隔一段距離，要逐隻殺死不是難事。
「哈！」權叔手上的消防斧刃深陷最後一隻喪屍的後腦，喪屍不發一聲的倒下後，權叔回首問呀禮：「點樣？」
如果屍群控制者身處剛才被殺的喪屍之中，在圍村前的喪屍就會失去控制而隨本性行動。呀禮凝神望向圍村，觀察喪屍的行動，好一會才搖搖頭：「唔喺呢到。」
我們在樹林中，圍繞著村子緩慢移動，除了圍村前進攻的喪屍之外，在樹林中有不少呆立的喪屍，未知是否因為控制者的控制範圍有限，所以未能動員這些喪屍。沿路殺死了大約十多隻喪屍，始終未發現所謂的控制者。
「我哋......係咪應該返轉頭？」走了好一會，白詠欣低聲問：「再行，前面就係森林，控制者應該唔會喺嗰到。」
呀禮點點頭，「我哋回頭啦——」
呀禮才剛轉身，目光便與身後一隻被大樹擋著大部分身體的喪屍對上目光，他指著那隻喪屍大叫：「哇屌，後面仲有一隻未清！」
我跑到那一隻喪屍身旁，用鐵鎚打碎了他的腦袋。奇怪的是那隻喪屍被發現，甚至我走到他身邊時也是沒有任何反應，像個木像一樣，這與一般喪屍的行為不太一樣。殺死了那隻喪屍，我們沿原路打算回到村口前，同時加強警戒，防止再有剛才的事情發生。畢竟我們只是用微弱的手電筒亮光去探路，有發現不了的喪屍也不是奇事。
「......我哋要行快啲。」走了一會，呀禮又突然這樣說，「我有啲不祥預感。」
「你係指......？」
「我喺度諗，假如我哋嘅行動已經畀控制者發現，咁再搵落去都冇意義。」
我一呆，望向圍村方向，該地仍是一片燈火通明，喪屍絲毫未有退卻跡象，儘管由我們發現圍村被攻打至今而過去接近一個多小時，「啲喪屍仲打緊條村，控制者會有時間理我哋咩？」
「對於控制者我哋基本上咩都唔知，話唔定佢真係可以邊控制圍城嘅喪屍，一邊觀察我哋......更何況，附近可能唔止一個控制者。」他頓一頓，「我哋最好都係快啲走。」
我們走了一會，突然看見一個身影衝入電筒亮光之中：
「你哋係咩人！呢個時候喺呢到做......係你哋？」
「小剛同誠哥？」
原來他們同樣猜測喪屍是被人控制，得出只要殺死控制者就能解除危機的結論，所以就冒險來到這裡。
「等我仲奇怪緊，點解一路上有喪屍被人殺死，估唔到係呀嵐你哋。」
杜嵐好奇問：「你哋係點樣喺喪屍圍村之下出到嚟？」
「條村入面有秘道。」小剛神秘地笑笑，「呢個秘密村入面都好少人知。」
我們和小剛誠哥走了不到五分鐘，呀禮忽然指著前方：只見一整列喪屍就在不遠的前方，像古代的步兵一樣，肩並肩排成一行，步伐錯落有致地向前進迫，我們馬上回頭，卻發現四面八方同時出現整列喪屍。
我們被包圍了。
如此的情形除了證明喪屍的確可被控制，也證明我們的行動過於輕率，竟然使自己落入這種萬劫不復的險境。
杜嵐顫聲問：「我......我哋要點做好呀？」
沒有人可以回答。喪屍形成的包圍網毫無死角，而且不止一層，我們只看到人頭湧湧，根本不知包圍網有多少層。
換言之，突圍而出是不可能的。
難道要死在這裡......？
白詠欣抓住呀禮，低聲道：「呀禮......你快啲諗吓辦法啦......」
「咁嘅情況，我都唔知要點做先好。」
「似乎好難突圍出去......」小剛握緊武器，低聲道。
權叔咒罵道：「仆你個街，聽你個狗頭軍師支笛真係死得人多！」
「屌，我都唔知會咁架！」呀禮頓一頓，望向上方，「今鋪真係要識飛先走得甩......咦？」
聽他語音有異，我們一同望向上方——
「hello。」
旁邊的一棵巨大榕樹上，一名年僅十一二歲左右的女孩坐在榕樹枝幹上，穿著藍色球鞋的雙腳在輕輕擺動。
然後她兩手擋在臉上，痛苦的大叫：「喂！白癡！唔好用電筒直接照住人呀！」
「噢，sorry…...」
這樣一照我們就馬上認出，她是之前見過的女孩喪屍。
呀禮連忙拿開電筒，女孩才緩緩說道：「你哋喺到搵緊我，諗住殺死我，係咪？」
權叔聲如洪鐘：「係呀！怪物！有種就落嚟食咗我！」
漆黑中我們看不見女孩的表情，「......我攻打嗰條村，唔係為咗食人。」
小剛馬上問道：「唔係為咗食人，咁係為咗咩？」
「我係想入去拎一樣嘢——」
突然，喪屍堆中爆發騷動，原本並肩而排，圍成一圈，一動不動的喪屍突然互相攻擊，原本的包圍網漸漸瓦解。
「喂呀小姐，班喪屍做咩——」
「唔好攞電筒照住我呀！」
呀禮吐一吐舌，移開電筒亮光。儘管只有一瞬間，但可見到女孩雙手抱頭，貌甚痛苦。
不管如何，這是逃脫的良機。權叔一下子砍倒最近的一隻喪屍，大叫：「趁呢個機會突圍呀！」
「你哋......你哋唔好走呀......」頭頂上的女孩艱難地說道，「我有事......要你哋幫手......」
「有求於人係咁樣圍住人架咩！」權叔怒道，雙手繼續砍殺，因為喪屍忙於互鬥才容許他開口說話。
「鬼叫你哋......打算殺我......喂，如果你哋幫我拎一樣嘢，我就唔再攻打條村......」
呀禮哈哈一笑：「癡線，做咩要聽隻喪屍講嘢！」
小剛也咬牙道：「喪屍講嘅嘢，信唔過。」
喪屍包圍網因為我們持續的攻勢，已經開始崩潰。雖然不知道到底外圍有多少喪屍，但只要他們繼續內訌的話......
「好......咁就同我死喺呢到啦！」
「嘩！」
似乎有那麼一刻，女孩取回喪屍的控制權，喪屍忽然一致的向我們攻擊，以致我們不得不回防。只是那麼一瞬就已經險象環生，難以想像如果她可以完全控制喪屍，下場會是如何。
「我幫手打開缺口，你哋快啲走呀！」
不是權叔亦不是呀禮，不遠處傳出一道沙啞的男聲。說時遲那時快，我們面的喪屍竟然慢慢地開出一條狹窄小路。儘管有些遲疑，但不能顧慮那麼多了。左右兩邊各有一隻喪屍，抵擋著其他喪屍的進攻，並在身後開出一條逃亡的小路。
「呀嵐！捉住我隻手！」我捉緊身後的杜嵐，喪屍開闢的小徑漸漸收窄，眼見杜嵐左右兩邊在抵擋的喪屍快要支持不住，我用力的把夾在中間的杜嵐拉了出來，終於脫離了包圍網。
身後的喪屍仍在自相殘殺，不知何時方休。我拉著杜嵐，「唔好望喇，佢哋除時追過嚟架！」
我們一直跑到土地廟前才停下，此時已經筋疲力盡。
「嗄......嗄......」
因為大腿仍然不太靈活而被權叔拉著跑的呀禮，一屁股的坐到馬路上，「我......我唔得喇......」
圍村方面，喪屍似乎已經退去，只剩下石牆上疏落的火光。
眾人喘息期間，小剛忽然道：「頭先......頭先叫我哋走嗰把聲，覺唔覺得好似神父把聲？」
當時情況十分危急，根本沒有閒功夫去想，加上喪屍的聲音掩蓋，實在不能辨認那是誰的聲音。
誠哥回道：「就算真係神父嘅話，佢點解要救我哋呢？」
小剛點點頭：「可能係我一直凝住神父同喪屍勾結，判斷力都開始受影響。」他頓一頓，望向村子方向，眼見村中的火光只剩牆上那些，似乎喪屍已經撤退，便道：「我哋要返去喇。」
白詠欣急道：「我同你去。」
小剛搖搖頭：「如果你經秘道返去，咁到時你突然出現喺村入面，件事會好麻煩。」
「咁我哋可以行正門呀。」
誠哥答道：「我哋今次出嚟並冇經過村入面嘅允許，所以其實我哋算係偷走出嚟，冇可能行正門。」
白詠欣別過了頭，「咁我自己去。」
「喂，雖然喪屍暫時撤退，但唔代表附近係安全架。」權叔急道。
「但係婷婷......」
「權叔講得啱，附近仲係好危險，」小剛點點頭，「至於白詩婷，我可以幫你睇下佢，只要神父唔阻止嘅話。」
「咁......咁好啦......」
我們和小剛道別後，馬上趕回石屋，把屋內所有搬得動的雜物塞住大門，撲熄火堆，把一切偽裝成沒有人在的樣子。我們聚在二樓走廊，不時透過已經損毀，連窗框都已經嚴重生鏽，如今只可稱作牆上破洞的窗戶，觀察外面的動靜。
如果被發現，而且用攻打村子那種級數的兵力攻過來，那麼我們基本上只有死路一條。然而幸運的是，直到日出也過了好一段時間，仍然沒有喪屍現身。
各人脫出包圍網之後跑了好一段路，之後又一夜未睡，集中精力應付可能出現的危險，待到早上時，大家已經累得不像話，甚麼也沒吃便回到床上睡覺，醒來時已經過了中午。
「好喇，我哋要返番入村喇。」吃過午飯，白詠欣站了起來，這樣說道。
杜嵐說：「出面唔係好安全呀，不如我哋同你一齊去啦。」
「唔好喇。」白詠欣搖頭，「我哋聽朝返嚟嗰陣，唔通又要你哋送喇喎。有呀禮保護，應該冇問題。」
「冇錯喇，有我喺度就冇咩問題架喇。」
權叔點一點頭，「......你哋小心啲。」
說罷，呀禮和白詠欣便離開了石屋。
然後再沒有回來。