《一零六四》: 第三十五章「替補」

大學的考試可以讓學生自由發揮。

不過分數也可以讓Professor自由發揮。

考試過後，雖然未公布成績，不過終於迎來快樂的Sem Break，也是時候開始討論Ocamp的細節。

我和莊員們正坐在會議室裡開會。

「唉，希望五科pass曬。」煒程嘆道。





「好羨慕文科啲人，唔洗考咁多試。」Winky以不屑的眼神看著我說。

「拿唔好咁望住我，我都要考兩科。」我說。

中文系或者社會學系的科目，很多時候都是以期末論文取代期末考試，我也比較喜歡這種模式。

「講返正經野先，一個好消息，一個壞消息，好消息係pre camp抽到鯉魚門。」Johnson笑道。

「Yes！抽到鯉魚門爽呀！」Dicky大叫道。





「咪住，壞消息呢？」我認真地說。

Johnson擺出一副難以啟齒的表情。

「其實就係...我地其中一組嘅組媽。」

「臨時退出咗。」Johnson說。

「下？唔係咁大整蠱呀。」可盈驚訝地說。





「係呀，佢以身體狀況為由，退出咗。」Johnson沒好氣地搖搖頭說。

換句話說，其中一組缺少了一名組媽，距離Pre Camp剩下一個月，還有時間找的。

「咁我地係咪要搵人頂佢？」Winky問。

「係呀，不過我嘅女仔朋友全部都已經玩曬第二個camp咁濟，其他冇玩camp嘅女仔，又唔太適合做組媽。」Johnson說。

「咁點搞？」煒程問。

「所以就要靠你地喇，你地有冇識人？」

所有人都搖頭。

「咪住！」Johnson突然說。





然後他走到我身邊問我。

「翹，你同愷淇係咪好熟？」

不是吧，找愷淇？她會玩嗎？

「呃...都叫熟嘅...你想搵佢頂？」

「佢係最適合嘅人選啦！」Johnson笑道。

「你幫我問下愷淇。」他又說。

我只好點點頭。





片刻之後，我想起一件事。

「咁個組爸同OC係邊個？」我問。

「籃Soc個Thomas，OC係隔離莊個PR。」

Thomas？