師生禁地: 第二章：狹路阻攔

「叮噹叮噹，叮噹叮噹」上埋英文堂又到左小息時間，我同阿晴阿敏兩個好姊妹一齊去廁所。「喂，阿婷你比霍sir針咁喎。」「霍sir對你期望好高…」「真係唔知咩事，成堂比佢針囉，好煩。」「唔好講呢樣啦，你同阿光佢…」「都話唔係你諗既咁！」一如以往，我地咩都講一餐，暢所欲言……

去完廁所「喂你兩個，我去D班搵阿光呀，行先。」我佔有慾大，趁住小息時間去睇佢做咩，睇下佢有冇背住我撩其他女仔。「知啦，去搵你男朋友仔啦，唔洗理我地～」「係阿婷佢個老公仔～」阿晴阿敏一歌一和咁笑我，真係冇佢地乎。「咩呀，一陣食飯時間咪一齊食，講到我咁衰唔理你地…」我講完即刻急步沖出去。

出到去走廊，準備行到去阿光身處既課室果陣…「咪行住。」我被拍左一下膊頭，係霍sir把聲，佢神出鬼沒咁突然出現喺我身後，我一轉身，打左個冷震。「霍sir，你搵我？」「今年第二年教你通識，你成績keep到全級頭三，幾好。」佢繼續講「不過又就黎mid-term，你覺得仲keep到？」「Ok呀，阿sir唔洗擔心。」「宜家重溫一次，我問你答。」我心諗唔係掛…晒我小息時間，我仲要搵阿光架……

霍sir問既野我都對答如流「好啦，見你對範圍熟晒，唔問啦，係呢，你頭先咁急想去邊？」「叮噹叮噹，叮噹叮噹」唉頂，小息完左，霍sir你開心啦。「冇咩特別事，咁我返課室先啦。」平時一臉嚴肅既霍sir又笑，真係唔知咩事。我行過阿光課室，用眼神、嘴形同手勢，隔住窗話佢知「唔准撩女！」而佢就比左ok手勢我，而嘴形似係「錫晒你」哼，算你啦，我心滿意足返去課室。