為左追到女神我要成為全級第一！: 第四十七章：大結局
話咁快我就比我手機個鬧鐘嘈醒左，我起身望一望啊傑見佢仲訓得好冧，於是我一野拍落佢到，佢就好似岩岩發完惡夢咁彈起身，佢勁無奈咁講搞咩啊...我同佢講起身準備去睇日出啊！點知佢串我話：反正一陣都係你同欣姐既二人世界啦！聽完之後我偷笑咁講：咩喎仲有啊儀佢陪你喎，你執到啦！
講左一輪野我地先肯出去，出到去見到女仔個邊已經著左燈，我行過去問佢地搞掂好未，問完之後小欣佢就打開個帳篷行左出黎就話：估唔到你班男仔都會咁準時起身喎！我就話：我都估唔到你地女仔都咁準時喎！我隱約聽到啊傑同啊儀一齊講話又一早係到打情罵俏，仲話唔洗去睇日出啦，反正隔離就有最強閃光彈係到！
我係琴晚訓之前上網睇左日出時間會係五點半左右，而加時間係五點鐘，姐係我地仲有時間去搵地方睇日落，我地一人一個拎著個手機電筒去前方探路，搞到好似變左去野外探險咁。我地行左一陣終於搵到一個好適合睇日出既地方啦。我地坐左係石頭上面耐心咁等待日出既到來。
隨著時間的流逝，天空上終於開始出現一層漸變色，係黑漆漆既天空底下出現一道橙紅既顏色，慢慢太陽伯伯就係地平線上逐漸升起。話晒都係第一次去睇日出，感覺非常之奇妙，我有一種暢快既感覺。我偷偷地望一望小欣佢，見到佢臉上充滿住非常滿足既表情，佢既笑容係隨著太陽而升上，仿佛可以係小欣臉上睇到第二個日出。
當太陽升到一定既高度，就代表我要開始進行我既表白行動。正當我諗住係個褲袋拎個手鏈盒出黎個時，「大檸樂！」我因為起身個陣太興奮而唔記得拎埋過黎，頂啊！點解我連咁簡單既事都會做唔好...我將來仲點比到幸福比小欣啊！正當我以為表白行動會失敗而係到自責個時，突然有人拍一拍我膊頭，我回頭一望係啊傑，見到佢笑笑口咁，我疑惑咁問佢做咩事。
點知佢係佢個袋到拎左我個個手鏈盒出黎，並細細聲同我講左句：「兄弟我呢只能夠幫到你呢到，一陣既事都係要交返比你自己去面對啦，係咁啦祝你成功！」嘩！我個一刻係到諗平時啊傑條友仔成日都嬉皮笑臉，無黎正經，點知佢而加佢竟然係我既救命恩人，講真我對佢真係要刮目相看啊！
啊傑佢講完之後就行過叫啊儀陪佢去其他地方睇下，啊儀佢望一望我，而我就向佢兩個點一點頭，啊儀就跟住啊傑行開左。現場情況得返我同小欣係到，好啦表白行動正式開始，我慢慢走近小欣佢，佢好似掛住係到睇日出所以並無留意到我行近佢。
我行去佢身後拍一拍佢膊頭，佢回頭望一望我之後問我做咩啊？唔知我係咪太緊張，我竟然口窒窒咁問佢日出好唔好睇啊？佢笑晒口答返我日出真係比我想像中更加之好睇啊！小欣又問我相同既問題，我深情咁同佢講：就算日出幾靚都好，都無你一半咁靚啊！佢聽到就係到哈哈大笑，仲問我今日做咩事咁口甜舌滑既係咪做錯事黎啊。
喂林小欣！又做咩事啊？你瞇埋雙眼先啦！你想對我做咩啊？你一陣咪知囉包你有驚喜啊！又係到懶神秘！如是者我拎住啊傑岩岩交托比我既手鏈盒係小欣面前單膝下跪，我說三二一之後你先好開眼喎！知啦！三，二，一可以開眼啦！
嘩！佢見到單膝下跪既我就問我冇啦啦做咩要咁做，我咪話左要比驚喜你囉！我打開個盒然後開始我既深情表白：林小欣！一直以黎我都覺得你係一個好善良好可愛好溫柔好細心既女仔，以你咁既條件相信可以搵一個好過我既男仔，但你無咁做到，反而選擇同我一齊，我真係覺得自己真係一個好幸運既人因為我可以遇見到你，如果我無遇見到你，我相信我會過住一個無目標無夢想既人生，你既出現比左一個目標我就係我將來要有能力比到幸福你，令你可以無憂無慮咁過日子，我真係好中意你啊林小欣，希望以後既日子都可以同你一齊去開心一齊去唔開心，所以我希望可以做你男朋友甚至將來既老公！
佢起初比我突如其來既深情表白搞到有啲嚇親，但慢慢佢就露出開心既表情，佢呢一個開心表情同岩先睇日出既表情係唔同，佢呢個表情可以睇得出小欣係真心發自內心。見佢無講到野，我就問佢係咪開心到諗唔到野講啊！佢好滿足咁同我講：估唔到我男朋友會咁浪漫喎，識簡呢個場景同我表白，哈哈我果然真係無簡錯人做我男朋友！
見佢個樣咁開心滿足，我心情都變得輕鬆愉快。喂快啲戴條手鏈啦我特登上網訂造架有我地個名啊！咁你仲唔快啦幫我戴！遵命女朋友大人！戴係小欣手上簡直係如虎添翼。小欣望住手上條手鏈大讚我又簡得幾靚喎！照咁睇黎我今次表白行動十分之成功。
我地係日出低下自拍左幾張相，我地講好左返到去要po張相出黎正式同大家講我地一齊左。
咦佢兩個去左邊啊咁耐都唔見佢地既？我都唔知啊不如我地走圍搵下佢地啦！搵左好耐都唔見佢地於是我地返返去帳篷個邊，一返到去就見到佢兩個係到執緊野。
啊儀見到我地返黎就向啊傑大叫：喂個兩個閃光彈返左黎啊，嘩佢兩個仲要拖實手仔咁返黎，我隻眼咩都睇唔到啦，因為太閃啦！啊傑向我舉左個like手勢而我都舉左個ok手勢回應返佢，做兄弟既真係唔洗多講。
話說你地肚唔肚餓啊？肚餓啊做咩？肚餓既話仲唔快啲幫手執完野出返市區到食野！sor sor而加黎幫。執完野之後我地就係原地合照幾張，小欣呢一個攝影師竟然話要幫啊儀同啊傑合照，睇住佢兩個尷尷尬尬個樣，真係笑左出黎，唔識佢地既話仲以為佢兩個唔熟。小欣攝影師唔滿意咁同佢兩個講可唔可以close啲啊！
突然啊傑將隻手搭向啊儀個膊頭到，食緊花生既我都比佢既行為嚇親，而小欣就好滿意咁講就係咁啦！我見到啊儀佢塊面紅晒，照咁樣睇好快就會有多一對情侶出現。出到市區食完野之後我地就準備返屋企休息下，由於我屋企人仲係大陸到公幹，所以小欣想上黎我屋企陪多我一陣再返去。臨同佢地分開之前啊傑就奸笑咁同我講：記得今晚做足安全措施啊！講完就同啊儀上左車離開左。
返到屋企之後我就去左沖過涼先，出到黎見到小欣係沙發睇電視睇到笑牙唔見眼。我行過去同佢講記唔記我地既承諾，記得啊！小欣打開ig然後搵返我地張合照再打左句：多謝你成為我親愛既男朋友，我唔會待薄你架，嘻嘻！之後就po左上ig到。滿意啦而加到你啦！講完之後就搶左我部手機重覆以上步驟。
最後我學韓劇啲男主角係沙發上壁咚小欣佢，我地深情對望幾秒，然後我輕輕咁錫向小欣嘴上，呢一個係我既初吻，將佢比左小欣我係覺得自己賺左。
我愛你啊林小欣！
我都愛你啊李日俊！
全故完。
係到我都再一次多謝有份睇我故既讀者們，呢一個故事已經順利完結，我地有緣再見啦！總有一日會再見到我再出故架，希望到時都會比個面我去睇故啦～