[校園][純愛]《幸運星下的預言》: 第一百三十六章

跟住我去咗洗面

返嚟再拎起部iphone

解鎖完之後撳下角嘅電話，

入到去通訊錄就係咁碌，

直至見到筱瑜兩個字



跟住就撳通話，

估唔到呢個聯絡人資訊都會有用武之地

原本我以為冇

入完就算反正都唔會打過去

世事真係難料



喐喐……喐喐……

嗰刻真係好緊張

好耐冇試過等一個電話會心驚膽顫

見工嗰啲真係冇得比

同時間，



唔知邊度嚟嘅信心

我覺得呢個電話一定有人接聽

理性上而言，

事隔咁多年，

佢諗法有改變係理所當然嘅事

九年前佢講到好期待我打過去

或者九年後嘅今日心態已經有唔同呢

好彩，



之後落嚟嗰幾秒證明我冇估錯啫

最緊要係呢刻冇再錯，

咁就已經好夠

接通咗之後，

唔知點解我諗唔到野講

直至佢開聲

筱瑜:「其實呢我曾經以為你會唔記得」



好耐冇聽過呢把聲

事隔咁多年終於聽得返

嗰種失而復得嘅感覺先係最難得

我:「點會呀

冇可能唔記得囉」

筱瑜:「我好開心

可以再一次見到呢個電話打過嚟，

真架」



我:「我依家終於明白點解當年你咁講」

筱瑜:「講咩呀

當年講過好多句喎」

我:「你話之後大家咩關係都好

今日拆開之後，

跟住一定要打俾你

其實俾晒提示



係我乜都唔知啫」

筱瑜:「唔係你問題

全部野都係我無聊諗出嚟

你更加唔好怪映彤同埋我表弟

係我叫佢地唔好喺你面前講我嘅近況，

特別係映彤

佢真係幫咗我好多，

應承咗我好多唔合理嘅要求」

我:「我知

我從來都冇怪佢一直唔同我講

不如出嚟好冇

好多野想同你講」

筱瑜:「你會後悔架喎」

我:「點解」

筱瑜:「以我認識嘅你去講囉

喺封信入面我所謂嘅預言，

中咗幾多」

我:「咁你真係好了解囉

令我從來都冇懷疑過

亦都可能係自己問題

唔夠了解你」

筱瑜:「真係唔關你事

你幾了解我個結果一樣係唔會變，

調返轉講你都好熟我

我所謂嘅預言先至可以一步一步咁樣變成事實

節奏推進得咁快，

真係唔關你事係我問題」

我:「你係咪冇搬到」

筱瑜:「搬咗呀

你呢」

我:「早幾個月都搬咗

九龍嗰邊囉

我過嚟搵你丫」

筱瑜:「真係會後悔喎

你唔驚」

我:「我相信你唔會錯

我出得嚟唔係覺得唔會後悔，

係明知會後悔都要見你」

筱瑜:「咁好啦」


跟住佢俾咗個地我

佢叫我去附近嗰個公園嗰度等佢

冇乜人方便傾計咁喎

同當年一樣，

我都係有早冇遲

可能你地會問唔使返工咩

我唔知佢啦

我係特登揀今日嚟清假

其實我從來都覺得

有早冇遲呢個情況，

只會出現喺你好想見嗰個人嘅時候

當年如是

今日亦唔例外

唔知佢依家變到點

唔呃你丫，

其實過去嘅一個禮拜都已經係咁樣諗

越近見面嗰刻就越期待，

直至我望過去公園門口

見到一個好懷念嘅面孔

嗰刻個腦又係空白一片

目定口呆，

明明嚟之前已經諗定開場白

哈哈原來都係嘥時間

只係識望住佢嘅方向，

越嚟越近，

直至，

佢嘅坐駕駛到嚟我面前，

大家四目交投。