[校園][純愛]《幸運星下的預言》: 第一百一十八章

返到屋企我繼續喺度諗

筱瑜亦都冇搵過我

平時會講啲無聊野，

我送完佢之後到我返到自己屋企呢

亦都會同佢講我返到喇咁樣



不過呢一刻實在唔知點樣面對

又或者可能係我太chur

既然係咁就唔搵佢住先

繼續埋頭苦幹

諗諗下呀澤叫我打機



係喎不如同佢傾計

男人老狗有咩問題不嬲都係搵死黨架啦

就算佢俾唔到有用意見我，

起碼我都叫釋放咗出嚟

最主要我同佢不嬲都係咁樣溝通



佢有野想講，

我就做聆聽者

反之亦然

我:「講堅呢兩日發生咗啲事」

跟住我就將所有野和盤托出，

我:「就係咁多

唔係想潤你

我真係唔知點」



呀澤:「我冇話你潤我

咁你同我講得都開心嘅

起碼都真係當我係朋友」

我:「屌你啦講呢啲」

呀澤:「你條撚樣不嬲都係收收埋埋嗰種啦

你唔想講嘅話，

點樣問你都唔會講



又唔係個個問你都講喎

我得到一個唔容易信人嘅人個信任，

咁你話係咪要開心」

識得耐真係冇得呃

佢完全講中晒，

當時我冇講出嚟

不過真係好開心原來有位朋友咁了解我

唔係我單方面當佢死黨，



佢都有喺我身上花過時間觀察

我:「係呀最叻係你呀

點睇」

呀澤:「講真喎不嬲都覺得你冇乜問題

你真係冇講漏」

我:「有嘅

考最後一科之前嗰晚佢爆喊



睇得出佢壓力真係好大

不過嗰晚已經釋放晒啦，

送佢返屋企嗰陣都係笑嘅」

呀澤:「係囉

如果你冇講錯，

即係情緒應該唔係問題啦

我聽你講有講過，

自己睇都有睇過，

你兩個不嬲都好有默契架

你諗下邊有拍緊拖嘅情侶唔傾電話

但係你地一齊嗰陣又好sweet架喎」

我:「一次咁輕微嘅鬧交就搞到咁樣

我真係諗都冇諗過

係咪嗰陣控制情緒控制得唔好呢

講真我嗰陣講野嘅語氣真係好平和

點樣嬲都好，

就係因為佢我選擇忍而冇爆出嚟」

呀澤:「你條友啲缺點唔係第一日架啦」

我:「屌」

呀澤:「之前咁耐都忍到，

依家一刻就忍唔住

如果你冇講錯自己冇變過，

咁即係佢變咗囉」

我:「繼續繼續」

呀澤:「講明先呀我冇教人分妻

我亦都相信你有自己判斷，

純粹自己睇法

呢啲問題如果對方唔係咁熟嘅人

真係唔會隨便講出口」

我:「得啦」

呀澤:「你有冇聽過兩個講法」

我:「咩」

呀澤:「究竟係留意到佢啲缺點跟住先唔鍾意佢，

定係唔鍾意佢跟住先至留意到佢啲缺點，

我唔信一個人無啦啦會變到好小器

依家講緊幾日咋喎

但係鍾意唔鍾意就真係可以咁短期

你講過啦，

你點解鍾意佢就係因為嗰一刻佢幫你抆走手掌嘅釘

嗰一刻講緊幾秒，

你諗下係咪可以好快」

我:「犀利真係好記性

我以為你扮聽」

呀澤:「屌你啦不嬲認真聽人講野」

我:「我明你意思嘅

今日我同佢一齊都覺得冇咗以往嗰種氣氛」

呀澤:「當然啦有可能我諗多咗

佢只係心情唔好，

但係如果悲觀啲

呢一次咁輕微嘅鬧交就係一條導火線，

我唔知咩原因佢無啦啦唔鍾意你

咁啱呢個時候你兩個嗰場鬧交，

就成為咗催化劑

又或者咁講，

你兩個鬧交亦都有可能建基於佢唔鍾意你

你明唔明我講咩先」

我:「大致理解

即係話佢有可能過咗熱戀期，

冇之前咁鍾意

包容唔到導致演變成今次嘅鬧交」

呀澤:「係喇」

我:「講真嘅，

我真係好鍾意佢

同佢一齊舒服嗰種感覺唔係假

唔想依家就分」

呀澤:「我都明，

有邊個唔係丫

講就講咗俾你聽，

自己執生啦

講明先可能係我呢條柒碌講錯架

可能好快就冇野好似之前咁樣」

我:「希望啦，

真係有啲無力感。」