[校園][純愛]《幸運星下的預言》: 第一百一十四章

過下一日過下又一日

原來真係好快就面對

到目前為止最大嘅難題

哈哈，

我記得兩年前考嗰陣



都係咁同自己講

最大嘅難題，

呢五個字只係暫時性

今年係呢樣

唔等於出年仍然係指緊A-Level



有時唔好話一兩年，

淨係幾個月都唔同啦

好明顯呢番說話，

係我有所感悟之後先得出啦

年輕時最大嘅毛病，



就係太輕視個世界

經常口出狂言

將理想同實踐混淆

好喇自我檢討完喇

咁就唔好講咁多廢話啦屌

我知你地一定咁講

筱瑜真係一個好認真嘅人

我重好記得考中文口試前嗰日



佢都係咁講入到去要點做

筱瑜:「記住入到去唔使驚

人地驚而你淡定

咁已經係成功嘅一半」

我:「兩年前我都唔係好驚

希望今次一樣啦」

筱瑜:「實得嘅



冇理由輸俾兩年前嗰個自己

如果真係輸嘅話咁我好大責任喎」

我:「痴線點會關你事呢」

筱瑜:「兩年前未同你拍拖就唔驚

依家同我拍拖臨場反而緊張

重唔係我影響到你」

我:「影響就有影響

不過係正面囉



我記得你講過呀影響係中性詞

如果要講前面一定要指明係正面定負面」

筱瑜:「叻仔喎真係有聽我講野」

我:「屌你真係當我流」

筱瑜:「聽日唔好呀你

講講下講咗粗口一定冇分」

我:「盡量忍盡量忍」



筱瑜:「唔係盡量係一定要」

我:「係係係

講笑啫你當我忍唔到咩」

筱瑜:「係先好呀

準備咗咁耐，

因為啲咁無聊嘅野而前功盡廢就真係好唔抵」

我:「小組討論有咩錦囊」

筱瑜:「你問我呢

如果問你認同邊一個睇法嗰種題目

我就唔建議中立

亦都唔好講各有各好，

最好就歸其中一邊

因為唔夠時間講晒兩邊各有嘅優勢同劣勢

唔多時間講但夾硬講我驚描述得唔夠詳盡

咁樣到時好容易俾人針住去打

記住我地入去考試

一定係為分數，

我唔知你會點樣睇教育嘅定義

亦都唔知你同唔同意係咪要用數字衡量高低，

香港教育好定唔好唔係我地入去考試嘅重點

考完之後有排你講，

點樣唔得有咩改革任你演繹

但係入到去考場我就一定將呢啲野拋諸腦後

喺香港嚟講，

求學冇可能唔係求分數

特別係中學生，

我自己就係咁睇

聽日加油啦。」

我:「收到晒」


口試就唔多講啦

自問入到去都講晒自己想講嘅論點

考完就要收拾心情

因為好快就中化

亦都係第一份筆試

更加係主科

絕對係不容有失

由考完口試之後去到考中化之前嗰十幾日

溫嘅時間比平時更加耐

我都知溫書時間同埋成績絕對唔係正比關係

係咁嘅話通街都狀元啦

考得好唔好都好，

我淨係唔想後悔自己當年點樣點樣

為咗咁我可以做嘅就只係一直咁樣溫

反正都係兩個月啫

嗰期老母都係咁煲湯俾我同埋筱瑜

叫我攞出去俾佢喎

佢講咗好多功效嘅不過唔記得喇

我都係貪佢好飲啫

就係喺考中文之前嗰日

3月25號，

筱瑜送咗一份禮物俾我

筱瑜:「送俾你呀

A-Level加油呀」

跟住佢俾咗一個玻璃樽我

入面裝住好多粒幸運星

我:「多謝喎

不過你使唔使咁多粒星星

搞到要用咁大個玻璃樽」

拆開嚟睇每粒星星唔係好大啦

不過嗰度實在有太多粒

積少成多變相望落去好誇張

筱瑜:「知唔知入面有幾多粒」

我:「我一定知啦

咁鬼多點樣數」

筱瑜:「3287，

每一粒都係我自己摺」

聽完之後真係唔撚係掛

我:「陰公一定好攰

做乜咁傻呀

你言語上支持都好夠喇

使乜係咁摺」

筱瑜:「言語上邊度夠呀

作為你女朋友點可以淨係得個講字」

我:「你呢排都要溫書架

你幾日摺晒」

筱瑜:「傻嘅梗係唔係啦

個幾兩個月啦」

我:「係啫都唔使三千幾粒丫

隻手一定攰死啦」

筱瑜:「3287絕對唔係偶然

多一粒同少一粒都唔得」

我:「點解呢」

筱瑜:「知唔知我地生日乘埋係幾多」

我:「你係4月5

我係7月3

我當45x73啦，

即係考我心算啫

依家一定可以秒答啦」

筱瑜:「唔使喇我幫你計埋

係3285」

我:「咁點解係3287粒而咁點解係3285粒呢」

筱瑜:「知唔知3285呢個數字除咗同我地生日有關之外

佢重代表一樣野」

我:「係咩」

筱瑜:「就係九年

如果一年有365日，

咁樣九年365x9就即係3285」

我:「唔係每四年就會多一日咩」

筱瑜:「冇錯，

呢九年入面

有兩年係會多一日

咁你明白點解係3287而唔係3285啦」

聽完之後我即刻攬住佢

對我嚟講真係好似拍戲咁樣

一直以嚟，

我以為呢啲心思嘅拍戲嗰啲情侶先會有

估唔到今時今日我有幸同男主角一樣

享受呢啲福利

我:「好多謝好多謝你

唔識講其他野，

下次唔好咁傻呀

整一份咁嘥時間嘅禮物」

筱瑜:「唔嘥呀

唔係點幫你打氣呀

或者你覺得好無謂啦」

我:「唔無謂

一啲都唔無謂。」

筱瑜:「應承我好冇」

我:「應承啲咩先」

筱瑜:「你快啲講應承先啦」

跟住即刻錫咗我一啖

我:「今次咁快有甜頭

我梗係識做啦

應承你喇」

筱瑜:「應承咗就要做呀

好唔好」

我:「得喇」

筱瑜:「九年之後，

你先好打開呢個玻璃樽」

我:「點解要九年」

筱瑜:「或者緣分掛

我都冇諗過將我地生日乘埋原來就係九年」

我:「好你話點就點」

筱瑜:「咁我當呢個係我地嘅約定

九年之後嘅3月25號

最重要一點，

不論到時我地咩關係，

打開之後都要搵我

好唔好」

我:「痴線可能唔使搵呢

到時我喺你隔離打開

唔係喎分分鐘嗰陣已經係同你去到談婚論嫁階段

呀唔係，

生兒育女先至啱

哈哈係咪好長遠」

筱瑜:「痴線邊個要嫁俾你同埋同你生bb」

我:「唔知呀

可能係玻璃樽個主人掛」

筱瑜:「好多個玻璃樽喎

唔知你講邊個」

我:「你知嘅」

筱瑜:「唔知呀

加油呀聽日

要返上去喇」

我:「好。」


年輕時最大嘅毛病

就係太輕視個世界

經常口出狂言