[校園][純愛]《幸運星下的預言》: 第八十七章

其實之前曾經忽發奇想

以我印象中嘅筱瑜

係一個好獨立嘅女仔

可能礙於背景問題啦

始終佢老豆好早就因病離開



佢呀媽又要搵食

佢同佢家姐真係相依為命

甚至乎家姐都有佢自己嘅野做

環境形勢令佢一定要變得獨立

好多野都係逼出嚟啫



當然啦大家唔使過份聯想，

佢係咪好似電視劇嗰啲例子

屋企經濟支柱唔喺度

跟住三母女迫迫夾夾堆埋一齊住

瞓覺轉身都冇位



我記得之前都講過，

佢係私樓女嚟

我冇上過佢屋企不過佢同我提過

講真嘅，

佢係咪我女朋友都好

由第一日知道佢有件咁嘅事，

打從心底係好佩服佢

細細個經歷咁多野



衰啲講如果我有同樣經歷，

我都唔敢講自己會好似佢咁樣

唔理佢依家嗰份堅強係扮出嚟定係真心變到咁硬淨

總之令我覺得呢個女仔真係好唔簡單

講到口臭，

用旁觀者角度去睇，

梗係覺得易架啦



我就唔敢想像發生喺自己身上嗰陣會點樣

一句講晒真係好欣賞呢一方面個態度

講開又講，

直至到依家，

佢都重未知我係知呢件事

講真你諗下點樣講出口

唔通無啦啦問佢屋企人點咩

調返轉我自己都唔鍾意



又擔心唔知佢走出咗陰霾未，

要知道人真係好脆弱

點樣堅強都好，

只要觸碰到某一點，

足以成個人崩潰

呢啲野冇得輸架，

總而言之我覺得佢想講嘅時候就會同我講



佢唔講嗰陣我好似平時咁樣唔會主動提起

乜野關係都好，

尊重的確係好基本嘅野。

無啦啦講咁多廢話，

咁就梗係有野想講啦

一個咁獨立嘅女仔

我曾經以為佢拍拖嘅時候，

唔會好似一般情侶咁黐身

即係嗰種呢，

好重視自己私人時間呀

拍拖又點啫

咁我都要自己空間架

唔通成個人俾晒你咩

我一直都覺得佢係咁嘅人

當然我明顯我都係鳩噏啦

一估就估錯

幾個禮拜以嚟，

佢同我上面講嘅野完全顛覆

真係好黐身

返學放學一齊咁就唔使講

禮拜日間唔中佢都話想出嚟

我有借啲咦問過佢

「咁樣唔厭咩」

點知佢話點解要厭

重同我講佢如果真係好鍾意一樣野

幾耐時間都唔會厭倦

除非，

去到有一日唔再鍾意

筱瑜:「唔係點解一直喺你隔離呀」

呢個女朋友唔錯

好識氹人

要知道，

男仔好多時候其實都係想俾人呵護下

好簡單幾句說話已經夠

唔使話做乜做物

有時唔係淨係女仔先會發姣，

男仔都會嘅

只不過唔會咁明顯講出嚟啫

最抵錫就係，

佢黐身得嚟又好識去拎平衡點

我有同佢講過夜晚要打機

我亦都冇呃佢要同呀澤打

點知佢話一早估到我同佢好friend

我:「點會呀我同佢喺學校都冇傾計

你一定係鳩噏」

筱瑜:「好似你咁咩

你兩個一見到就喺度眉來眼去

有時候你兩個撞到嗰陣就講埋啲唔知乜野

出奇嘅係大家又好似傾緊計咁樣

點會唔friend」

我:「點解你咁醒嘅啫」

筱瑜:「係呢

話咗好留意你」

講完之後重要篤我個鼻

咁我梗係喺後面扮追佢

追到就拖住佢隻手跟手送埋佢返屋企

就係咁佢知道我每一晚都有呢個活動

原本我以為佢唔鍾意

點知佢話冇問題每個人返到屋企都有私人時間

淨係話記得第日返學就得

因為我唔返去佢就見唔到我咁話喎

呢個女朋友真係一流

靚女重要體貼。