[校園][純愛]《幸運星下的預言》: 第七十八章

去到呢度真係要返返嚟現實先

成日瞇埋眼就諗咁多野

完全唔記得聽日要返工

搞到第二朝成日晏起身，

再諗落去真係無底深潭成晚唔使瞓



聽日唔得你死

唔知大家重記唔記得啦

我同呀澤依家係同一間公司

不過冇人知我地係朋友

更加冇人知我地識咗超過十年



我同佢平時返工時間唔中都會食早餐

不過之前有講過啦

我同佢就好撚無聊

唔鍾意俾公司啲人知道我同佢咁撚friend

所以每次食早餐都一定唔會揀附近嘅餐廳



咁都算喇食完之後重會前後腳走

真係好似偷情咁樣

可能我真係好無聊啦

好享受呢種感覺

佢又肯一齊癲

甚至放工都係啦

有時我同佢有下場，

都要特登分開走搭地鐵



落車嗰陣再望一望有冇公司同事

冇嘅話先一齊行

又托賴喎

咁多年我同佢兩個出街都冇見過其他公司同事

可能你地都當我戇鳩仔

有咩咁好玩呀

講真丫如果你覺得好玩就玩咗啦



啱唔啱先

我絕對承認我係好無聊

不過喺職場上面多一事真係不如少一事

寧願麻煩啲，

都唔好俾人知我地咁friend

或者你會問你兩個真係得咩

晚晚一齊打機

不過喺公司就扮唔熟



你又唔好話喎，

我同佢又真係冇穿過煲

喺公司我唔係叫佢呀澤

而係叫佢Douglas

明明佢條撚樣根本就唔係叫Douglas

佢驚俾公司人起底所以特登開多個身分

重話原本想叫Tom嘅



我即刻話Tom一聽就知流野

不過又唔可以太罕見喎

於是就變成Douglas

我又真係控制到自己冇記錯佢個名

喺公司入面唔會叫佢呀澤又或者佢真正嘅英文名

跟住諗落又幾有道理

所以我都學佢特登作一個身分出嚟

Jaydan

初初真係唔慣，

好多人叫我Jaydan我都冇應佢

當然習慣嘅野都係隨著時間過去而適應啫

邊方面都係咁啦

可能我地真係好撚無聊啦。


睇完上面大家都知啦，

我兩個有個共同目標

就係要掩飾關係

食早餐都話可以早啲出去第二度，

跟住提早行返嚟啫

晏晝條街咁多人又咁鬼熱

行咁遠咪盞攞命

邊會特登做啲咁低能嘅事

所以我同佢從來唔會一齊食晏

我多數同一個男仔食

因為喺我條team入面，

佢同我算係比較多計傾

撇除大佬話佢想請一班人食飯嗰陣呢

多數都係我同佢兩個食

嚴格去講真係唔係好friend

成日都覺得同公司同事好難做真心朋友

你當人兄弟，

人地當你契弟

呢啲野喺職場上面經常都見到

絕對唔係奇事

既然有前車可鑑，

咁你重唔醒水

所以基本上我同呢位同事

從來都唔會講啲好深入嘅話題

最多都係講埋啲鳩野，

是非唔講認真野唔講以前啲野唔講

我自己對住同事從來都係咁樣，

不過佢又唔係喎，

好鍾意將啲私人野同我講

講真嗰句有時真係冇乜興趣

甚至食晏呢個活動，

真係要揀我都會揀一個人食

不過你知啦大家同一條team何必搞到咁僵呢

佢主動叫我，

我又唔係完全唔鍾意

咁咪配合佢囉

佢講乜就話收到係呀同意，

再求其加多幾句扮晒野真係有聽

呢啲野唔係真係咁難做啫

藉著呢一篇用嚟過渡嘅廢話，

呼應返我想講嘅野，

人大咗唔係想點就點

好多野都想做，

不過全部都唔做得又或者唔敢做

有時諗返轉頭，

的而且確好嚮往年輕時嘅任性。