[校園][純愛]《幸運星下的預言》: 第七十六章

於是喺嗰個禮拜

我同筱瑜就一齊出嚟幫佢表弟

亦即係司徒佢買禮物

筱瑜:「你話送銀包好唔好呀」

我:「佢冇乜所謂架喎



平時乜都冇意見嘅

你送乜撚佢都得」

筱瑜:「搞錯呀諗住你可以俾意見添」

我:「你咪講咗想送咩囉

咁我又使乜再俾意見」



筱瑜:「哈哈又係喎」

最後我地去咗MegaBox

嗰陣重未有Ikea，H&M，同埋Aeon架

甚至以前Megabox係有扒王之王可能你地都未必信

年代真係唔同



俾啲面丫

等我扮廢老緬懷以前都得啫

都唔會阻你好多時間

我淨係想講一樣野，

就係自己從來都唔需要提住自己老

呢個舉動簡直係多此一舉

好簡單，

因為身邊環境因素先至係最有效嘅證人



你唔使問佢都會話俾你聽

特別係追捧過嘅偶像，踏足過嘅地方，

佢地唔可能一直維持著自己嘅位置

亦冇可能永遠都係你初見嘅模樣

有時真係唔想承認，

用殘酷去形容現實，

大家都講到口臭



咁就唔再詳述喇，

不過唔想承認還唔想承認，

終歸都要面對又或者去接受

係就好咯想點就點

你話乜就乜咩，

所以當自己越大個嘅時候，

就越明白一個道理，

同樣地都係唔使特登去明，



經過時間嘅洗禮自自然然就會識

唔同以前細個喇，

要特登主動去學一樣野

無論係人定係事都好，

面目全非絕對係必經嘅階段

唔需要覺得驚訝，

亦唔輪到你唔認同，



歷久，

怎會不衰。


跟住我同佢就瘋狂喺megabox嗰度搵禮物啦

頭先都有講啦

佢話想送銀包，

原本我以為佢想送十蚊廿蚊嗰啲

諗住佢會鳩噏

買咁貴用咁靚俾邊個睇

廿蚊搞掂啦

點知原來唔係喎

我:「你諗住買邊款

講真學校附近個商場都有

嗰度買咪得囉」

特登問佢睇下佢點答先

筱瑜:「你真係夠老友喎

嗰啲用落去成個呀伯咁嘅款

你都叫我買

一年一次點可以求其呀

唔係做乜特登出嚟」

我:「好你話點就點囉」

筱瑜:「過嚟俾啲意見啦

我連你老友鍾意咩色都唔知」

我:「屌重話細表姐喎」

筱瑜:「關事咩」

我:「唔關，

純粹想屌下人」

筱瑜:「唔係識得你耐真係以為俾你鬧

點呀佢鍾意咩色呀」

我:「佢呀

唔係呃你我真係冇特登問佢

男人老狗點會講呢啲話題

不過佢好鍾意著沉色衫

黑色呀深藍呀嗰種」

筱瑜:「唔怪得我見親佢都係著黑色啦

我重以為係佢懶得滯唔換添」

我:「你買黑色應該冇死

講真啦其實佢真係冇所謂

有人送佢就要」

筱瑜:「又冇聽人講野

一年一次點可以求其呀

又唔係真係咁難搵」

我:「你好有決心咁喎」

筱瑜:「係呀

跟住就靠你幫幫眼」

有時真係好佩服筱瑜一樣野

就係佢嗰種力臻完美嘅態度

第一好明顯我就唔係

先旨聲明我係想做到咁樣嘅

不過想同做兩回事大家都知啦

我永遠做落去都係得過且過

僅僅熟魚生粥就算

或者可能係因為我做唔到

調返轉覺得做到嘅人好犀利

當然個前設係我想咁做先啦

唔係純粹佢做到而我做唔到

就話佢好犀利，

我由第一日識筱瑜佢開始

見佢做任何野，

無論有冇實際利益之下

時間上許可嘅話佢一定做到足俾你

甚至係教一個平時零交流嘅人，

佢做到真係好似收咗錢幫人補習咁樣

係咁講係咁問有咩唔明乜乜物物

最重要係佢唔會要求你同佢用同一態度

因為佢都明白冇資格咁樣做

當然啦，

我唔係因為咁而鍾意佢

純粹自己欣賞佢呢種態度啫

可能好中二病不過真係冇呃人

同佢熟絡後，

無可否認有被佢感染

未去過佢嗰種程度，

不過有時間嘅話寧願會做多一步

希望出到嚟件事更加好

以前從來唔會咁做

成日說服自己

冇人擔保做多一步一定更加好喎

咁又使乜咁做呢

喺度我又有幾句廢話想講，

唔知有冇人理我啦

我亦都冇諗住呢幾句廢話幫到邊個邊個

邊有呢啲資格丫

純粹有感而發，

一定一定要珍惜有能力令你自發性改變嘅人

我指嘅當然係向好嗰邊啦

我都夠膽講一生人唔會有好多個，

人人都唔同我講唔到有咩特質

呢種福氣唔係每個人都有，

更加未必會出現喺每個階段，

由心而發實在係好難求。