[校園][純愛]《幸運星下的預言》: 第五十四章

食完一輪，

原本話準備走

跟住有人提議，

不如一齊倒數完先走啦

一睇我就知係隨波逐流嘅人



少少主見都冇

佢地話點咪點囉

都係同呀澤打少一晚機啫

唔講打機返去都冇乜野做

無謂咁掃興啦啱唔啱先



唔知各位有冇同感，

群體聚會真係好似一杯清水咁樣

唔使多，

只要有一個成日破壞氣氛嘅人喺度，

咁就足以將成個場個氣氛變差



有啲人就係有咁嘅功力

我自己就唔鍾意呢樣嘅

咁既然自己都唔鍾意咯，

又點會對住咁多人做返出嚟呢

記得喺倒數之前，

我已經冇再去嗰邊打麻雀

留返俾佢地玩啦

咁我喺度做咩呢



就係同筱瑜喺度玩wii

原來映彤屋企本身有

依家就梗係老餅玩意啦

冇記錯嗰陣好hit架

嗰日我地幾個無聊冇野做

咪喺度玩wii囉

玩嗰個乜撚野運動會呀



離晒譜原來佢打機好勁

特別係保齡球，

我次次都碌落坑

我睇佢個款唔似做開運動

平時講嘅話題又唔包含運動，

咁講真玩wii你個人要跟住郁架嘛

我睇佢都唔掂架喇

點知一個保齡球一個乒乓波



打咗我六七巴

原來佢好犀利

當然啦，

之後我先知原來玩得叻唔叻同平時做唔做運動

係風馬牛不相及

筱瑜:「傑哥

可唔可以勁啲啲呀



依家仲差過同電腦玩呀」

頂佢個肺重要做埋手勢

不過算我輸咗

係咁架喇從來都係贏嗰個話事，

輸就自己摺埋啦

繼續講落去咪顯得更加核突

我:「你犀利你犀利

你知唔知我玩wii未輸過俾人

你係第一個贏我」

筱瑜:「梗係未輸過啦之前你都未玩過」

我:「」

筱瑜:「講中咗呢」

我:「都唔知話你乜好喇

好撚彩冇同你輸賭

如果唔係真係食窮」

筱瑜:「唔係喎頭先你有講喎

糖水呀糖水呀

又係你話頭先執到啲嘅」

我:「頂你細聲啲啦

佢地唔知我贏咁多」

筱瑜:「好好好」


跟住落嚟冇乜特別就唔多講，

我記得唔知邊個話重差兩分鐘就去到零時零分

跟住成班就喺度準備倒數

嗰陣我都唔係好關心倒數呢個環節，

因為覺得唔係好特別啫

當然啦唔會特登講出嚟

呢啲行為擺明撩交嗌，

直至去到零時零分嗰刻，

好多都癲咗咁樣

係咁喺度講聖誕快樂

隔離嘅筱瑜都有同我講

當然啦佢不嬲都唔係好hyper嘅人

絕對冇好似佢地咁樣喺度周圍跳

不過都feel到佢開心

筱瑜:「聖誕快樂呀傑仔」

我:「聖誕快樂」

筱瑜:「你好似冇乜感覺嘅」

我:「咪又係差唔多

我真係好撚開心呀

咁樣掂唔掂呀」

筱瑜:「你真係好假呀

咁樣掂唔掂呀」

我:「小學雞」

冇幾耐我地就走咗，

去到一個位大家各散東西

我同筱瑜就當然有下場啦

所謂嘅下場咪就係食糖水囉，

不過我留意到佢好似好凍咁樣

係咁喺度震

咁點解我會覺得冇事

當然唔係因為我勁啦

而係因為我有條頸巾

老母買返嚟嗰陣我都唔鍾意戴

係之後先發覺原來真係保到暖

自此就養成咗出街戴頸巾嘅習慣

筱瑜:「好凍呀」

我:「係咩唔覺喎」

筱瑜:「你有頸巾梗係咁講啦」

我:「痴線你講到我好似偷人咁樣

冇人叫你唔戴喎」

筱瑜:「死人頭重咁串嘴」

我:「不過話時話喎

我好少見到女仔唔戴頸巾」

筱瑜:「咁我本身唔係特別怕凍丫嘛

咁咪諗住頂得到

話時話其實我一路都想織頸巾，

不過自己唔識

好難呀」

我:「咁你要俾心機喇

我就冇你咁好志氣自己織」

筱瑜:「你好彩依家我凍唔得閒講野窒你」

望住佢凍到震個樣

剎那間我做咗一樣最傻嘅事，

就係將條頸巾俾咗佢

最傻都唔係咁樣，

而係同佢講自己唔凍

我:「拎去啦」

筱瑜:「咁你呢

你咪冇得用囉」

我:「你都傻嘅我咁撚大隻

放心啦乾淨架特登洗咗先拎出嚟」

筱瑜:「er

你都大隻」

我:「俾我型呀係咪唔得啫

一睇就知我要磨練自己嘅鬥志

頸巾只會成為我嘅負累

既然我都唔用不如俾你」

所謂鳩噏，

目的都係想整到係我唔要先俾佢啫

好無聊呀可

細個係咁架啦，

諗埋嗰啲全部都係無聊野

筱瑜:「好啦唔該晒」

跟住佢就開始戴

唔夠五分鐘我就開始後悔

因為真係好凍

我終於知頭先點解佢會凍到震，

原來佢唔係扮蟹

而係真係會不自然喺度震

我想極力隱藏都唔得，

遲鈍如我頭先都發現佢凍到震

咁佢又點會留意唔到我依家個狀況呢

筱瑜:「傑哥你好似好凍喎」

我:「你都痴線

邊隻眼見到我凍」

筱瑜:「兩隻都見到呀」

我:「我知日後面對嘅道路會比今日難得多，

咁嘅凍我都捱唔到

學咩人生存落去

武士精神你見過未」

我唔知佢係咪黑人問號咁嘅樣

因為我凍到冇望過去

突然間feel到佢個膊頭撞埋嚟

佢同我企得好貼，

然之後我條頸即刻充滿暖意

望一望原來佢將我條頸巾兩份用

一邊就繞住佢，

另一邊就攬住我

雖然都唔係真係好保到暖，

不過一定比冇頸巾嗰陣暖得多

我:「做咩呀你」

筱瑜:「雖然我知你有武士精神

亦都知你喺度亂咁講

不過依家都唔暖嘅話，

又點樣捱到去之後呀

武士」

我:「唔該晒」

筱瑜:「多謝你呀傑仔

暖返啲未呀」

我:「暖好多」

筱瑜:「其實你嗰啲亂噏呢

喺邊度學返嚟架

你又話自己唔睇漫畫唔睇電視」

我:「你都痴線

頭先嗰啲係我真心說話

你就鳩噏」

筱瑜:「配合你嗰啲『真心』說話喇

日後你條路有幾難行都好，

我都會好似今日咁

同你一齊跨過去」

我:「好撚感動呀真係」

筱瑜:「似唔似你嗰啲無聊野先」

我:「學到野」

筱瑜:「講呢啲所謂嘅熱血野應該可以暖啲嘅

少少都好過冇哈哈。」