[校園][純愛]《幸運星下的預言》: 第四十九章

我一擺落口

腦裏面即刻浮現兩個字

好味

我形容食物真係好差

大家體諒下啦唔該



勉強講，

就係話佢煎個皮煎得好脆

有少少燶邊食落去幾香口

亦都醃得夠入味

起碼食落去唔會口糠糠冇乜味



要睇專業食秤就去飲食台

嗰度高手林立

絕對唔係我呢啲傻仔講埋啲咁冇內涵嘅野

不過，

估唔到原來佢煮野咁好食



三文治都叫易整(對我嚟講其實已經叫難)

今次呢個連煮野食唔叻嘅我都知，

步驟係極度繁複

首先將雞翼拆骨跟住又搵西芹穿住佢

過程又要醃又要煎

講真嘅，

如果食落去唔好食真係唔會鬧佢

第一已經唔使錢



第二，

嗰份心機真係唔容易

成日都掛喺嘴邊，

講有邊個唔識

到真係做嘅時候先至見功夫

何況今次重要係好食

嗰一刻，



我冇去諗佢點解要咁樣整

事實上我亦都唔想猜疑咁多

吹到點樣點樣感動就呃你啦，

但的而且確係覺得好開心

嗰份開心唔需要同人分享

亦都唔係嘻哈大笑嗰種，

當你遇到一個唔係屋企人，

不過仍然會真心聆聽你意見嘅人，



咁你就會明我嗰刻嘅感受

我:「好食喎」

筱瑜:「係咪真架」

我:「你試下喇」

筱瑜:「但係我冇第二個叉喎

又唔想用手食驚整污糟」

我:「用我呢個咪得囉



放心冇病」

筱瑜:「咁好啦

係喎我都唔係第一次食你口水尾

嗰次你扮野飲咗我包朱古力奶

我重記得呀」

我:「小姐你真係好記仇

同埋我要澄清多一次我唔係扮野

我係真係拎錯」

筱瑜:「係喇係喇我講錯喇

咁我食一隻架喇」

我:「你整喎

食幾多隻都得啦啱唔啱先」

筱瑜:「um

好彩都唔係好難食啫」

我:「唔係講笑真係好好食

多謝你先」

筱瑜:「哈哈唔使多謝啦

係我好悶冇野做想整啫，

咁啱又要搵白老鼠喎

一講到搵白老鼠就梗係你啦」

我:「係咪又想講出嚟啦傑仔呀咁樣呀」

筱瑜:「又俾你知道咗添」

我:「講嚟講去咪又係嗰幾句」

筱瑜:「叻仔」


我:「話時話

真係估唔到你煮野咁好食」

筱瑜:「又想詆毀我呀」

我:「又唔好講到咁嚴重吹到詆毀

可能我見識少啦，

我估唔到一個中學生識煮咁多野啫

重要唔係甜品嗰啲喎」

筱瑜:「你又知我識煮好多」

我:「雞翼起骨咁撚難都識

斷估都唔惹少啦」

筱瑜:「咁又唔好咁講

其實都唔係咩特別啫」

我:「嗱嗱嗱扮蟹喇又

喺度扮謙」

筱瑜:「痴線你估我好似你咩

又喺度劖亂歌柄

未講完呀」

我:「係係係你繼續」

筱瑜:「真係唔係識整好多呀

至於點解會煮野食，

係因為屋企夜晚嗰餐有時會係我煮咁解啫」

我:「唔係呀話夜晚你煮架

真係犀利

講堅」

筱瑜:「咁唔係每一日都係我煮

其實家姐話原本係佢煮晒嘅

不過有時佢多野做

我咪同佢講一人一個禮拜囉

今次你話好食就得喇

下次我喺屋企可以煮呢個哈哈」

我:「真係佩服

老母呢」

筱瑜:「媽咪好忙呀

就係因為佢返到嚟七八點

所以先由我同埋家姐輪流煮」

我:「咁搏命嘅

七八點先返屋企」

筱瑜:「搵錢好辛苦呀

我從來都係相信呢個道理」

我:「你住得私樓窮極有限啦屌」

筱瑜:「咁又唔好咁講

屋企大家都有份

咁樣依家冇能力搵錢住咪幫下手囉

況且三餸一湯其實唔係真係好難

我地三個人食到幾多丫」

我:「犀利犀利重話唔係咁難

姐姐我要飲湯」

筱瑜:「下

你講真架」

我:「唔知有冇同你講過

我最撚鍾意就係飲湯

唔使咀嚼就咁飲爽到不得了」

筱瑜:「懶鬼」

我:「講笑啫如果唔麻煩唔使整啦下

你依家每朝整三文治我都覺得唔好意思架喇」

筱瑜:「唔使唔好意思喎

係我買多咗費事嘥啫

咁樣諗你就唔會唔好意思

煲湯我唔係識好多

得閒先啦」

我:「你真係抵錫呀」

跟住就搣佢面珠登

老老實實佢塊面唔多肉就唔係真係好好搣

不過真係好滑溜

正常女仔都叫我收手唔好搣啦啱唔啱先

點知佢唔係

佢無啦啦搣返我轉頭

重話同我鬥耐唔放手

我:「你輸梗喎咁樣」

筱瑜:「睇下點」

最後去到一個轉角位因為唔方便，

所以我先放手

哈哈，

我又輸咗喇。