[校園][純愛]《幸運星下的預言》: 第三十七章

我聽到佢嗰句「哎呀」之後，

即刻擰轉頭望過去佢嗰邊

見佢差啲跌落去

千鈞一髮之間，

我淨係可以憑直覺去做



唔係呃你我依家真係冇乜印象

或者嗰下嚟得既急且快，

我只係記得我即刻用隻手將佢拉返過嚟

費事佢碌落去樓梯

各位都知樓梯係一級級，



所以我拉返佢返嚟嗰陣，

我都失一失平衡落咗一級

好彩就冇事

證明小弟平衡力都唔錯

至於筱瑜，



佢同我一樣都係落咗一級

不過見到佢面露難色

我:「嚇死我

有冇事呀」

筱瑜:「唔該晒你呀傑仔

隻腳有少少痛」

呢個時候，

唔知點解好多人都選擇會鬧嗰位傷者



話佢點解咁論盡呀唔小心呀咁樣

可能係愛之深責之切掛

不過我又咁睇，

既然唔傷都傷咗，

話佢又有咩用

都於事無補啦啱唔啱先

我淨係知頭先個情況可以好壞



你諗下如果佢企唔穩，

我捉住佢隨時一齊碌落去

佢拉我，

自然跌嗰陣係佢落地先，

到時我一係就整到佢

一係就落地整到自己

再唔係淨係佢碌落去都唔好啦

依家只係整到隻腳實屬不幸中之大幸



我:「好彩呀

淨係整到隻腳係咪呀」

筱瑜:「嗯」

我:「行唔行到

一係喺樓梯呢度坐下先」

筱瑜:「唔好啦咁樣會阻啲人

慢慢落左去地下先」



我:「睇你咁嘅樣點行丫

扶你喇」

筱瑜:「唔該晒你呀傑仔

話我煩都會照講

今次真係唔該晒」

我:「慢慢

依家唔急一步一步嚟」

筱瑜:「嗯。」


跟住我就扶住佢，

一步一步慢慢咁樣行

終於落到地下，

我:「點呀重行唔行到呀」

筱瑜:「要慢啲行」

我:「唔係呀話

再慢啲就真係慢過龜」

筱瑜:「低b

真係痛呀係慢慢行先好啲」

我:「咁啦不如依家帶你去醫療室

大家一齊唔使幫手

一流」

筱瑜:「我就唔使啫

你又點解唔使」

我:「我同佢講話睇住你咪得囉

話其他人唔得閒得我可以陪住你

咁就搞掂」

筱瑜:「一早估到你冇咁好心

原來搵我過橋」

我:「咁又唔好咁講

唔係我頭先反應快你依家唔止隻腳有問題」

筱瑜:「係喇今次真係全靠你喺度

好啦我地依家行過去啦

到時我會同佢講叫你留喺度陪我，

你都係想偷懶啫」

我:「唔係呀我係想留喺度陪你咋

我咁勤力點會想偷懶」

筱瑜:「最勤力係你喇

勤力還勤力，

我地依家去醫療室先」

我:「咪住先」

筱瑜:「做咩呀」

我:「我咁樣扶你行過去，

天光都行唔到啦」

筱瑜:「我唔信呀天光之前一定行到」

我:「屌

上嚟啦」

筱瑜:「下」

我:「孭你過去呀」

筱瑜:「唔使啦

慢慢嚟咪得囉」

我:「其實頭先喺樓梯已經想咁做

不過我點睇都唔夠大隻

重要行樓梯到時攬炒就大檸樂」

筱瑜:「我驚你好攰喎呢度行過去都唔算好近」

我:「一睇你個款就知你唔肥啦

斷估你唔會好重啫」

筱瑜:「下……」

我:「唔使下喇

慢慢同你行過去我真係燥底

一步一步咁樣嘅節奏真係唔掂」

筱瑜:「咁

好啦唔該晒」

我:「又講唔該

呢十分鐘我聽到你講起碼都六七次」

筱瑜:「多謝你又唔得

係要人話你嘅」

我:「上嚟啦」

筱瑜:「唔該」

我:「又講」

筱瑜:「哈哈慣咗唔好意思」

我知你班鹹濕仔肯定喺度諗我有冇抽水

我可以同你講完全冇

第一佢就係著長褲

佢上嚟嗰陣我都係托佢隻腳

即係摸條褲啫

第二樣，

嗰陣天氣開始涼

我同佢身上都有幾件衣物

佢伏喺我背脊嘅時候，

真係冇乜特別感覺

唔使諗埋嗰啲食波餅

再加上佢都唔係一個豐滿嘅女性

又著咗咁多衫

不過講真佢真係唔重

所以頭幾步真係輕鬆，

係去到中段真係開始有少少吃力，

鬼叫我唔大隻咩屌

佢都有keep住同我傾計

重好幫我分散注意力

筱瑜:「傑仔呀，

好多謝你呀」

我:「嘩無啦啦你咁溫柔」

筱瑜:「咩呀我都係女仔嚟架

成日都講到我唔可以溫柔咁樣」

我:「你知唔知你喺我心目中係一個女強人

辦事能力高冷靜客觀

講野充滿睿知特別係搵解決方法嗰陣

平時又不苟言笑喎

可能啱啱識嘅印象係咁啦，

直至到依家都係咁樣覺得」

筱瑜:「不過你所講嘅女強人依家都喺你背脊度喎

同埋依家都係得你啫

我都唔係你所講嘅女強人哈哈」

我:「識落梗係唔係啦

不過形象係咁丫嘛」

筱瑜:「你知唔知呢你係第二個孭我嘅男人」

我:「第一個係咪老豆」

筱瑜:「嗯，

嗰陣又係好細個，

我俾人撞親跌落地下

當我起身想繼續行嘅時候佢就抱咗我上去佢膊頭

叫我攬實啲

我記得嗰陣要返去睇卡通片，

佢知我想睇就孭住我跑返去」

我:「我依家都可以跑去醫療室喎

你係咪想嚟多次」

筱瑜:「痴線嗰陣咁細個就話得啫

依家重過嗰陣咁多」

我:「睇少我咁話喎」

筱瑜:「邊敢睇少你呀傑哥

唔使咁快慢慢行啦，

我想伏多陣呀哈哈」

我:「你話點就點啦」

筱瑜:「細個就想快

大個反而想慢返啲，

唔使咁急」

我:「控制到幾時快幾時慢咁就好

真係好難呀」

筱瑜:「係，

好耐未試過有人孭住我

我想嘆多陣先因為唔知重有冇下次」

我:「邊個話冇下次」

筱瑜:「你好想我整親咩」

我:「唔整親都可以孭啫」

筱瑜:「唔係掛」

我:「講明先

夏天唔得上完pe堂唔得

你知啦夏天實出汗到時臭親你咁就唔好

pe堂一樣道理

唔係喎太長距離都唔得喎

我知你住邊度嘅，

長過你屋企去學校嗰條路冇得傾」

筱瑜:「你咁樣講我當你應承架

唔好走數呀」

我:「你都傻嘅我使走你數

係咪好人先」

筱瑜:「全世界最靚仔最好人最大隻就係你喇」

我:「算你識講野

今次唔講『出嚟啦傑仔』嘅

我一聽你講『係你喇』就自動load到你嗰句『出嚟啦傑仔』」

筱瑜:「低b」

太陽底下兩個重疊咗嘅人影，

就係各自走入對方世界嘅證據，

不過，

影子亦從來唔會留低印記

何況時間一過，

就唔會再有影

講到尾關鍵都係時間。


淡淡交會過 各不留下印

但是經歷過 最溫柔共震