[校園][純愛]《幸運星下的預言》: 第十八章

大家叫嘅飯好快就嚟到

跟住筱瑜無啦啦叫人拎一個細碗仔

個侍應拎咗過嚟之後，

筱瑜就將佢嗰碟飯分啲落去個碗度

我:「做咩呀你」



筱瑜:「我驚食唔晒啫

到時我成碟食緊先至發覺食唔晒，

我食過跟住俾你又唔係幾好咁樣

唔俾你又會嘥喎

所以咪將啲飯潷落個碗度囉」



講真其實我真係唔係好介意食人口水尾

當然啦唔係因為佢係靚女

除非真係好明顯有病嗰種人
又或者係完全唔識

如果唔係都唔會話好介意

我:「唔好扮細食喎」



筱瑜:「點解要扮」

我:「點知你呀」

筱瑜:「一陣你唔夠飽可以食埋個碗飯佢」

我:「陣間先算啦」

筱瑜:「我聽你頭先話好肚餓咋

應該食到嘅哈哈」

我:「有冇人話過你觀察力好勁」



筱瑜:「做咩咁講呀」

我:「你聽過你見過嘅野可以記咁耐

真係好撚勁」

筱瑜:「咁多年又好似冇喎

咁有時一齊坐一齊行好難唔留意嘅」

我:「話咗你留意我」

筱瑜:「係呀俾你發現咗添」

我:「同上次一樣都係咁假」



筱瑜:「我不嬲都放好多注意力喺friend身上

唔係咩叫做friend

最基本知佢鍾意啲乜唔鍾意啲乜」

我:「咁我都會

但係唔會個個都咁囉

邊記到咁多」

筱瑜:「咁我都冇可能記晒



熟嗰啲又或者家姐咪會記得囉」

我:「原來你有家姐架」

理論上我係唔知佢係咪獨生女

要循例咁樣問

筱瑜:「嗯

大我四年。」

喺我心目中，

筱瑜唔係一個好鍾意同其他人講自己野嘅人



起碼我冇聽過佢同其他人講先

佢亦都冇同我講過呢方面嘅野，

我唔知係咪因為依家唔喺學校，

所以佢放低咗戒心

我想追問落去

特別係司徒同我講，

佢細個嘅形象唔係依家咁樣，

一直以嚟我都好八卦想知點解，

不過唔認為呢一刻係一個好嘅時機

咁就費事問咁多呢方面嘅野啦

講多真係會錯多

等大家再熟啲先。

筱瑜:「你同映彤識咗好耐架」

我:「中一識到依家囉」

筱瑜:「真係純友誼咁簡單」

我:「唔係你想有幾複雜」

我都係選擇隱瞞我以前鍾意佢呢個事實

的確唔係啲咩馨香野，

我唔係驚筱瑜會同映彤佢講返，

我覺得我叫佢唔好講佢真係會唔講

佢唔係多口嗰種人(我覺得啦)

而係冇乜需要同其他人講，

咁就索性隱瞞喇

筱瑜:「知唔知初初我問過映彤佢關於你嘅野架哈哈」

我:「講咗你會留意我架啦」

筱瑜:「未講完呀等陣先」

我:「咁點解你咁留意我呢

一定係我靚仔」

筱瑜:「其實你真係幾靚仔

你都係想我咁樣講啫」

我:「傻唔晒」

筱瑜:「你知你同我係同一個位啦

初初我驚同你唔夾

所以特登去問映彤，

我一聽佢講話你係好懶

做乜都冇興趣嗰啲人

我就知一定夾到哈哈」

我:「仆你個街映彤咁樣唱衰我

呢啲就係朋友喇」

筱瑜:「我初頭好驚你係嗰啲好熱心嘅人

我估你都應該知我唔係好熱衷於呢個會架啦

如果到時大家個心態係相反，

咁好容易有拗撬

好彩你唔係咋」

我:「唔係講笑我都有咁樣諗過

好彩你都唔係

不過我依家淨係記得映彤條友」

筱瑜:「唔好同佢講返喎

其實映彤都係好錫朋友

就算依家拍咗拖都係」

我:「係咩

有異性冇人性咋話」

筱瑜:「其實都唔係呀

佢喺班房成日問我同你相處有冇問題

話你有冇恰我喎

都係講笑啫」

我:「佢都戇鳩鳩

你板起個樣邊敢恰你

唔驚俾你鬧死」

筱瑜:「其實你啲幻想真係好豐富

明明我咁善良」

嗰晚我地就係喺度傾學校啲野

其實熟咗嘅話真係對筱瑜有啲改觀

佢唔係想像中咁不善辭令，

大家一路都有傾有講唔會有冷場嘅空間

你知兩個人食飯最差就係咁樣

特別嗰個年代冇智能手機，

你眼望我眼簡直係世界級災難

慶幸我同佢從來都唔係咁樣

同埋佢對所有人都好有禮貌

對住侍應甚至係埋單嗰陣都係咁，

唔該前唔該後，

我唔知係咪扮野啦

不過印象中真係未聽過佢冇講呢類客套說話

我當佢真係扮都好，

起碼聽落去令人覺得好舒服，

係唔係扮我覺得唔重要。