[校園][純愛]《幸運星下的預言》: 第六章

我同筱瑜一向都唔係好熟

冇記錯咁多年都冇同過一班

但我知佢中一嗰陣已經喺度讀，

我唔係好留意佢，

當然就唔知佢平時係點啦



梗係啦一直以嚟我都係掛住留意映彤

邊有特別去理佢啫，

佢俾我嘅印象係一個好靜嘅女仔

唔多講野，

靚就幾靚架



眼睛水汪汪

有條長辮仔

前面多數係齊陰又或者斜陰

皮膚好白淨女仔嚟講都算高

不過真係冇交集



平時佢好cool

分分鐘連我係邊個佢都唔知

好少見佢會笑，

我冇記錯佢係同映彤同一班

大家都係6b，

換句說話嚟講，

即係同我一樣都係理科

不過唔同班咁解啫



佢嚟嚟去去都係同女仔玩多

以我所知同映彤關係都唔錯

反而男仔就冇乜邊個同佢friend，

因為聽好多男仔講話佢真係好cool

好多人都試過食閉門羹

同埋重有一點係講你都唔信嘅

就係佢同司徒係有親戚關係



好似話係表妹定唔知表姐

我識佢第一日嗰陣已經有講，

不過你知啦嗰陣我冇興趣

淨係一味掛住映彤

筱瑜係佢表妹定表姐關我撚事咩

所以冇去追問落去，

當我知道要同佢做同一個位嘅時候，

咁就下意識望一望佢啦



好快佢望返住我

你知啦毒撚同人鬥望梗係會唔知點架嘛，

結果就戇鳩鳩咁樣微笑

生硬到不得了

其實嗰下真係有啲尷尬

估唔到佢會feel到有人望住佢，

跟住佢就禮貌上俾返個微笑我



不過好快就收返

變返cool爆嗰個樣，

唔係講笑佢唔笑嗰個樣真係好冷漠

眼神空洞，

我唔識讀心所以唔知點解啦

都唔知遲啲拍住佢一齊做會點，

靚就幾靚

不過真係好擔心相處方面

兩個人一齊但乜都唔講好悶架嘛，

淨係諗下都知個氣氛幾差

無啦啦撩佢又驚佢唔鍾意喎，

所以都係唔好搞咁多野

安分守己做一個文書就算，

如果係映彤就好啦哈哈

一定唔驚冇野講。


跟住落嚟都要準備學生會嘅野啦

一個禮拜有幾日都要留低，

我呢個崗位話就話叫做文書

講得衰啲即係打雜

屙屎唔出都關我事

可能依家重係啱啱開始，

再加上都未開始選，

其實要寫嘅野真係唔多

佢地落咗order，

話大部分內容都係由筱瑜寫

因為佢手字靚喎

咩意思丫依家

又唔直接屌我寫字核突

不過都好，

唔使寫咁多野

交晒俾佢

不過講真佢啲字真係幾靚嘅

我拍埋去可以收皮，

唔怪得佢地咁樣安排

筱瑜佢又好奇怪喎

真係冇叫我幫手，

係一次都冇

每次都係佢寫

有時見佢寫咗好耐，

都問佢使唔使幫手呀咁樣

每次都話唔使喇

我自己搞掂唔攰呀咁樣

唔緊要，

咁佢都咁講我咪索性袖手旁觀囉哈哈

於是我就俾人點去做埋啲死人野

同一個打雜完全冇分別

冇筆就搵我去買，

口渴就叫我落去樓下小食部

肚餓就叫我去附近士多執啲野返嚟

有次重搞笑，

唔記得邊q個男仔要爆石

跟住無啦啦叫我

我心諗關我叉事咩又唔係我爆

亦都唔會幫佢抆屎架喇

咁搵我做咩事呀咁樣，

跟住原來叫我出去買廁紙

因為廁所冇廁紙喎

跟住我問佢其他人冇咩，

嗰陣又係衰嘅得男仔喺度

啲女唔知去咗邊度，

結果五六個男人，

竟然冇一個係有一包廁紙喺身

結果就叫我出去買

好彩係入大數啫頂佢個肺

如果唔係真係俾班撚樣食窮我，

依家我地重係喺籌備階段

未有得投票，

我見佢地如火如荼咁樣

真係好似好有信心當選，

你問我就梗係想佢地炒粉啦

因為當選唔到就即刻解散，

代表我終於可以脫離

雖然打雜其實唔辛苦，

唔使用腦又辛苦得去邊

不過有得揀梗係想唔做啦哈哈，

想快啲返屋企打機丫嘛

俾人知道我咁樣諗死梗，

竟然倒自己團隊米

好彩我呢啲薯仔角色冇人問我啫。