[校園][純愛]《幸運星下的預言》: 序章

老母:「你快啲執好晒啲野佢呀

難得今日放假，

時間又唔係多

平時返工又話放假先執

依家放假掛住上網」



我:「係喇係喇係喇」

跟住我就好唔情願咁樣

離開我張電腦枱，

坐咗落地下度執野

大家都明啦，



老母呢種生物真係相當長氣

你一日唔做嘅話，

佢就見一次講一次

講到你肯做為止

我依家咁大個，



出咗嚟社會咁多年，

佢都重係用呢種方式對待我

唉算數啦

唔上網住喇陣間執完先慢慢上，

費事又俾佢講咁耐

咁其實我要執咩呢

話說我老豆唔知係咪發咗達

無啦啦話要搬屋



大家冇睇錯呀我依家重係同緊兩老一齊住，

鬼叫小弟窮咩

好彩佢地話唔使俾家用如果唔係我真係食屎都唔掂

到時真係自給自足

唔知各位巴打絲打有冇試過搬屋啦，

或者冇試過都會明一樣野，

就係執野呢個行為係好撚麻煩



將所有野拎出嚟，

跟住就逐件逐件睇下，

邊啲要邊啲唔要啦

呢個時候就係問題

事關我就好吊兒郎當嘅

呢件又想留嗰件又唔想揼，

搞下搞下，

即係全部野都唔撚使揼



最大問題係，

咁樣會搞到拎嗰陣好撚重丫嘛

已經唔講擺唔擺到落去問題，

所以真係好煩

最慘下個禮拜就要搬，

其實佢兩個一早講咗邊日搬

不過你知啦，



大部分人都係deadline fighter

好明顯我都唔例外

尋日話今日，

今日話聽日，

結果冇一日有做

完全係拖延症嘅徵狀

不過我知只要我一日未執，

老母就一定會行過嚟搵我

行過嚟搵我嘅話咁就大鑊，

萬一俾佢見到我啲珍藏

即係擺喺床下底兼且用一個箱裝住嗰啲呢

就真係水洗都唔清，

老豆見到都唔係好架喇

佢一定係咁煩我嗰個係邊個嚟

我唔講佢就會同老母篤灰，

我講咗佢就會拎咗嚟睇

睇完跟住又喺度屌唔靚

咁就唔好啦係咪先

所以我每次執野都係閂門

講起又講，

依家道門重係開緊，

即刻閂咗先。

完之後就將所有野倒落地下

你又唔好話喎真係冇乜塵

好彩啫如果唔係又要做多幾步

跟住就梗係喺度睇下邊啲要邊啲唔要啦，

一嚟就見到張成績表

梗係唔要啦又唔係叻過人，

跟住見到塊獎牌喎

打死都keep住先

我又唔係叻，

呢世仔都應該冇乜機會再拎多一塊，

唔使諗一定係留

唔逐樣逐樣講喇，

費事你地又話我拖字數嘥時間

總之就分咗兩堆啦，

一堆要一堆唔要好撚簡單

點樣決定邊啲要留低其實都唔係好難啫

有啲野，

知道唔會再有第二次咁咪留低，

可以買得返嘅，

咁咪唔要囉，

唔係好難判斷啫

整咗個幾兩個鐘，

大致上都搞掂晒，

終於可以攤喺地下休息

唔係講笑嗰下真係好撚爽

終於搞掂一樣咁麻煩嘅事，

當然啦，

如果係咁易搞掂就唔係叫執野啦

你梗係會覺得有野睇漏，

跟住又要重新望一次，

於是，

攤咗幾秒之後，

又要起身繼續執落去

先望一望電腦枱，

睇下有冇特別野

之後就睇埋張床，

都係嗰啲啦，

被呀枕頭呀毛巾呀咁樣

當然重有一個陪咗我唔知幾多年嘅鬆弛熊公仔啦，

呢個又係唔揼得，

係一定唔可以揼，

又係買都買唔返，

睇埋床頭，

立立下，

就見到一個裝住3287粒幸運星嘅玻璃樽

冇多冇少，

一定係3287粒，

原來我都好耐冇咁樣望住呢樽野

以前好鍾意望，

去到有一刻原來會唔敢望，

明明就唔知有乜咁特別

都唔知點解要投放咁多情緒落去一樽咁普通嘅野身上，

驀然間醒起好多好天真嘅承諾，

不過又有邊個冇曾經天真過丫

屈指一算，

係喎原來差唔多時間，

可能睇緊嘅你地唔明我講乜

不過都係嗰句啦，

睇落去嘅話，

咁就可以解答到呢刻嘅疑團

縱使劇情可能會比較悶，

甚至會有唔少雷同之處，

都仍然希望各位會支持下小弟啦

可以肯定嘅係絕對唔會走數

唔講咁多廢話即刻開始講故仔。