(嚴重FF愛情輕鬆同居故）《我與貓系女室友的二三事》: Ch.44

「⋯⋯」 

「⋯⋯」

 「⋯⋯」 

餐廳裡面已經滿座，我同阿Man好尷尬咁坐係到。 

仆街！我無諗過Tracy就遇唔到啦，我哋竟然撞到阿Nick！仲要坐喺隔離。 





阿Nick見到我哋塊面都青晒，眼都突埋出嚟。 

我望一望竟然見到阿Nick同一個男性一齊食情侶餐！我唔係歧視佢，我都支持同性戀平權。 

重點係阿Nick嘅男伴同我有幾分相似呀！個男伴唔撚係我嘅代替品呀嘛！真係諗起都覺得個男人好可憐。 

個男人好似發現我哋嘅表情好奇怪，就開口問：「你哋識嫁？」

 阿Nick見掩飾唔到，就有啲尷尬咁講：「佢哋⋯⋯係我泰館啲學生。」 自從上次嗰件事發生之後，我就無再去過拳館，剩低啲堂都浪費咗。而阿Man都好似轉咗去第二間拳館。 我無諗過世界咁細，咁都會撞到阿Nick。 





我真係好想問下有無得調位。大佬呀！真係好老尷㗎！不過可惜一睇個場就知道唔會有位轉到。 

我望咗望阿Man，只係見到佢表情有啲尷尬，不過大家都明白，無話因為阿Nick喺到而立即調頭走，唔食呢間餐廳。 

因為我哋都知道咁做嘅話大家只會更尷尬⋯⋯ 不過阿Nick都好醒目，佢食得好趕急咁，好快就食完拉埋個男伴離開。

佢離開咗之後，個鼓尷尬氣氛仲未散去，我同阿Man你眼望我眼，一時諗唔到話題講。 不過好在啲嘢食陸續送上嚟，有嘢食就唔怕尷尬。 阿Man見到啲美食，開始笑返。亦都開始拎起手機幫啲嘢食影相。 

正當我哋一邊傾計一邊食嘢嘅時間，又聽到一把熟悉嘅聲音。





 「你哋係到嘅！」 我哋抬頭一望，原來係家強！Mary嘅主人。 

仆街！呢一刻我都替家強感到無比嘅尷尬。因為佢完全唔知道阿Man發現咗Mary，我亦將所有事包括佢都供咗出嚟。