(嚴重FF愛情輕鬆同居故）《我與貓系女室友的二三事》: Ch.35

經過上之場鬧劇之後，我同阿Man嘅關係好似再進一步。 

當我哋對上視線都會有啲曖昧嘅氣氛圍繞住，特別係夜晚食完飯之後。 

我哋會一齊坐係梳化睇電視，但唔同嘅係宜家我哋坐得好貼近，膊頭掂膊頭咁，有時我哋會不經意咁會掂到對方嘅手，我都會覺得好心動。 

好想同阿Man再有進一步嘅關係。 

但我諗咗好耐，我係到諗應該點樣追阿Man而唔會令佢反感。

因為佢同我以前認識嘅女仔，追求過嘅女仔好唔同。 阿Man佢好cool好文青，好有藝術感，同我簡直係天壤之別。兩個完全唔相關嘅人，竟然會因為偶然嘅機會下，認識到對方。 

我相信呢個係緣份嚟。 但每次放假同阿Man去打泰拳嗰陣，我見到佢同Nick好好傾。 

令我懷疑佢同Nick係唔係都一樣對對方互相有好感，我想阻止佢哋會再有進一步發展，所以我都會跟埋去同阿Man一齊去打泰拳。

平時返工已經好攰，為咗去監視住佢哋一舉一動，幾攰幾唔鍾意打拳都好，放假都會去。

 至於平日我返咗工嘅時間，阿Man去咗拳館我就監視唔到佢哋。 今日因為又OT關係，收咗工差唔多成十點先去到屋企樓下。 





我竟然見到Nick佢竟然係大廈裡面走出嚟⋯⋯ 佢⋯⋯ Nick點解會係大廈到出嚟？佢應該唔係住係呢到。唔通佢有朋友住係到？定係⋯⋯佢同阿Man上咗屋企？ 無數嘅諗法係我個腦裡面不停徘徊。

 唔通⋯⋯佢同阿Man已經開始咗？一諗到呢到，我就覺得好灰。

 當我一拎鎖匙開門返到屋企後，係廁所傳嚟水喉花灑嘅聲⋯⋯ 阿Man佢沖緊涼。

 我好似痴咗線咁竟然聯想Nick上過嚟我屋企，同阿Man上過床。唔知點解我會咁諗，一股醋意咁湧上心口，覺得好唔舒服，但又唔可以做啲咩。

 我呆企咗一陣，直到阿Man沖完涼出嚟見到我返咗嚟。





 佢用毛巾一邊抹乾頭髮，一邊笑住同我講：「你返嚟啦？」 

「⋯⋯」 阿Man見我無出聲咁望住佢，面上嘅笑容慢慢咁僵咗落嚟。

 「我啱啱見到Nick佢係大廈走出嚟。」我單刀直入同阿Man講。

 「我想係租約到加一條規例，嚴禁帶異性入屋。」 阿Man聽到我咁講，面色一變問：「你懷疑我同阿Nick？」

 「⋯⋯」我無出聲默認咗。 

「你鍾意點諗就點諗啦！」阿Man講完呢句說話之後，就走咗入房，無再出過嚟。