(嚴重FF愛情輕鬆同居故）《我與貓系女室友的二三事》: Ch.26

終於落堂，我哋去咗沖涼之後，就約好咗係門口等。

 真係攞我命三千，做咗咁多劇烈運動搞到我得返半條命咁滯。

 當我企係門口等阿Man，我發現Nick佢係到望實我，佢擺明係到向我宣戰！我都唔認輸怒視返佢轉頭，無幾耐阿Man終於出嚟。 我就同佢一齊搭𨋢落樓。 

「我無諗過你會嚟打拳。」阿Man率先開口問我。

 係佢面上面充斥住疑惑嘅表情。





 「哈⋯⋯係呀。見你話有打泰拳，咁啱又見到你放係屋企嘅傳單，我咪膽粗粗嚟試吓囉。」 

「你平時好少做運動㗎？」

 「都係㗎⋯⋯同埋我返工忙呀嘛。」 同埋我唔鍾意做運動，床上運動就唔同講法啦，如果有對手，日日做劇烈嘅床上運動，我完全無問題。

 我挺胸收腹，谷起雙手手瓜問：「我大唔大隻呀？有無Nick咁大隻。」 

我引到呀Man笑咗出聲：「你努力啲，應該都可以嘅。」 因為做咗劇烈嘅運動關係，我個肚餓到打晒鼓。





 「不如我哋去食嘢呀。」

 「好呀。」

 「今晚我煮西餐妳食呀。好唔好呀？我哋食完嘢就去買餸。」 阿Man聽到我今晚煮嘅菜式，用充滿期待嘅眼神望住我。 

「你好似無試過整西餐喎。」 為咗妳我專登去買食譜去學㗎！我幾有妳心。

 「係呀。我今晚試下整。包保好似去米芝蓮餐廳食飯咁好食。」好在屋企仲有蠟燭，等等去買返兩支紅酒，整返個浪漫嘅蠟光晚餐。大家飲返幾杯，醉醉哋咁調下情。





 然後⋯⋯ 嗯～真係諗起都開心。

 「我會好期待。」阿Man揚起燦爛嘅微笑望住我。 

我係第一次見到阿Man笑得咁開心，見佢笑得咁開心，我個心都怦怦跳。

 諗返起佢上次話有啲失望⋯⋯ 

「今次一定唔會令你失望。」 阿Man聽到我咁講愣住，之後佢紅唇向上翹起：「你話㗎。」

 「緊係啦！」上次令佢失望，好似對我好感度減低咗咁，今次一定要加返分先得。

 「係呢⋯⋯妳同教練佢⋯⋯好熟㗎？」諗起Nick送佢返嚟，我個心一直都好唔舒服，我忍咗好耐都無問佢。上堂見到佢哋咁多身體接觸，我就真係忍唔住啦！ 

「我哋唔係識咗好耐，但係因為佢都係外國返嚟，無咩朋友，所以會多啲嘢傾。」





 借啲易搵阿Man傾計！個Nick簡直係罪無可恕！ 

「做咩咁問呀？」

 「無⋯⋯見你哋好熟咁問下啫。」 

我哋去到餐廳裡面食嘢，無幾耐啲餐到咗。我同阿Man食食下忽然聽到有把好熟面口嘅聲叫我。