(嚴重FF愛情輕鬆同居故）《我與貓系女室友的二三事》: Ch.18

「宜家啲後生仔咁怕醜嘅！我哋唔講啦。」

你仲講！你仲講！坐係我隔離嘅呀Man面都紅晒。

「呀哥同呀Man⋯⋯」黃家柔望住我哋兩個，露出一個意味深長嘅笑容。

頂妳咩仲笑！罪魁禍首係妳呢個死女包呀！唔係妳擅作主張，都唔會搞到宜家咁。

呀爸就無出聲一直係到觀察呀Man。





真係好似見家長呀大佬。

佢哋全部人當正呀Man同我係男女朋友關係，我點解釋都無用。最後我放棄咗解釋，已經唔理佢哋點睇。

大家食飯嗰陣佢哋係咗叫我夾餸比呀Man，搞到我哋幾鬼唔好意。

呀媽直頭係我耳邊話我知，呀Man雖然有啲靜唔出聲咁，但都斯斯文文，佢都幾滿意，甚至開始問起我幾時plan結婚，幾時生小朋友⋯⋯

我完全反晒白眼，唔知講咩好。





食完餐飯之後，我哋就分開返去。我，呀Man同埋家強一齊搭車返去。

「呀Man⋯⋯唔好意思呀。我屋企人唔係好聽人講嘢。」

諗返起今日發生嘅事真係好老尷。

「唔緊要，我覺得你屋企人好熱鬧，都幾開心呀。」我醒起呀Man嘅出生，我有啲唔好意思。

家強忽然話佢個魔女上司急call佢就走咗，我同呀Man就一齊返屋企。





一打開門，芝麻糊已經係門口迎接我哋。呀Man一手抱起咗芝麻糊，錫咗佢幾啖。

唔知係咪因為屋企人講嘅嘢令我有種錯覺，我覺得如果我同呀Man係一對情侶都好似幾好，同呀Man同居以嚟我哋都相處好好，覺得同佢一齊好舒服⋯⋯

呀Man走咗入房無幾耐，佢拎住一張卡出嚟遞比我。

我接過張卡一睇，卡上面印住一個藍髮少女，畫風好精緻。

「呢張係⋯⋯」

「呢個星期六舉行畫展嘅邀請卡，星期六需要邀請卡，星期日就開放比公眾。」呀Man嘅眼神充滿期待。

「放心啦！我一定會去嫁！我使唔使訂花牌個啲嫁？」

呀Man聽到我嘅說話忍唔住笑。





佢搖搖頭話：「唔使。但你個日一定要嚟。」

「咁完咗畫展，我請妳食飯呀！」

「我會等你嚟。」

我無諗過呀Man會咁期待我去佢嘅畫展，如果我知道嘅話，我一定唔會令到佢失望⋯⋯