(嚴重FF愛情輕鬆同居故）《我與貓系女室友的二三事》: Ch.13

「無啦啦又會落雨嘅。我無帶遮，妳有無帶遮呀？」

Tracy搖搖頭示意，佢飲完最後一啖紅酒後，就講：「我哋不如搭的士返去。」

佢向企係一邊嘅服務員揮一揮手，示意埋單，服務員向我遞出賑單，我一睇到眼都凸出嚟，但要維持我嘅紳士風度，唔想係Tracy面前同埋係高級餐廳到失禮，我就沉住氣扮哂冷靜咁係銀包到拎張信用卡出嚟。

如果Tracy係個啲咩美女飯局，呃人去餐廳食飯，咁我覺得以Tracy嚟講個質素，食餐咁貴嘅飯都算係抵嘅。

但係我銀包好肉赤呢⋯⋯





比完錢之後，Tracy佢玩咗一陣手機，忽然佢開口講：「Gary，我payme咗一半飯錢比你。」

聽到佢咁講我有啲愕然，佢唔係叫我請佢食飯嫁咩？Tracy佢究竟係咩玩法，我完成睇唔透。

佢見我呆呆地咁就講：「下次你再請我食飯啦。」

哼哼！鬼馬啦呢個女人，一定想再約我啦。呢個女人一定對我有意思。

不過下次請食飯真係好難想像佢又會帶我去咩高級餐廳食飯。





我同Tracy一出餐廳就截的士，因為越落越大雨，我哋比雨淋到濕晒。一上的士，比冷氣涼一涼，我凍到打咗個冷震。

Tracy可能都因為凍而靠近我，將頭靠係我膊頭到，佢身上面有一陣玫瑰嘅花香味。我轉頭望一望佢，只見到佢塊面紅哂，可能因為啱啱佢飲咗好多紅酒嘅關係。

「Gary呀⋯⋯你要唔要等等嚟我到飲咖啡呀？」

嗚呀！！！！

聽到佢呢句說話，我個內心唔單只好似得到千軍萬馬咁，直頭好似我內心有個核電廠爆炸咁！





宇宙大爆炸！

個心怦怦跳，跳到個心口都開始有啲痛，我差啲以為自己會心臟病發。

究竟我有無諗錯咗去另一面，但通常講呢啲說話⋯⋯都係邀請對方去自己屋企大戰嘅宣言！

唔通Tracy佢⋯⋯

「好呀⋯⋯我去妳到飲杯咖啡呀。」我吞咗吞口水講。

一落車唔單只落好大雨，仲打起雷上嚟。我同Tracy一齊跑入大廈，一齊入𨋢。忽然我諗起琴晚行雷閃電，呀Man佢驚到全身震哂，仲眼泛淚光，對於呢啲天氣日子有童年陰影。

當到五樓𨋢門慢慢打開⋯⋯