(嚴重FF愛情輕鬆同居故）《我與貓系女室友的二三事》: Ch.5
「元家強！」一走入酒吧，就見到佢坐係吧檯，一邊同曹念華傾計，一邊飲酒。我殺氣騰騰咁行埋去。
曹念華見到我就將調好嘅一杯酒遞比我：「唔好咁嬲啦，坐低飲杯酒順返條氣先。」
我坐低拎起曹念華杯酒飲咗啖，然後向曹念華呻：「我點會唔嬲呀！你都唔知條撚樣呀玩膠Mary呀！伸要將個膠公仔推比我，仲要咩袋咩箱都無就咁推比我呀！你都唔知我幾咁辛苦先將個公仔拎返屋企呀。就係呢條撚樣呀！真係好兄弟嚟嫁！」我手指指住元家強咁鬧佢。
曹念華聽到我嘅經歷忍唔住笑起上嚟：「大家都由細識到大，你都知佢份人幾鹹濕嫁啦。」
佢聽到我講嘅嘢唔覺得出奇，可能佢平時係酒吧返工見過甚至聽過更多離奇事。
諗返起宜家陳屍起雜物房嘅Mary，我雙手攬住自己望住家強：「我諗返起嗰陣打開門你拉起褲頭，你一定有玩過Mary啦，我仲要搬Mary返去，我覺得自己好似比你間接咁侵犯過。早知我唔理掉落垃圾房啦。」
一聽到我嘅說話，家強好激動咁講：「屌你啦！我無玩過新嫁！你唔好掉呀！掉左你賠返錢比我。」
聽到佢話賠錢就火都嚟，我伸手去佢褲袋拎佢銀包。
「喂！做咩呀你！」元家強伸手推開我隻手，大家拉扯咗一陣，我終於搶到佢銀包，我打開佢銀包拎咗張五百蚊紙袋落袋。
「你呀！搞到我爆手機MON我都未話你呀！仲有呀，你幾時拎返個公仔。」
元家強個樣望落有啲尷尬，佢飲咗啖酒講：「我都好想快啲試個公仔呀⋯⋯但係⋯⋯」
「但係？」我同曹念華一齊講。
「我老母同老豆嘈交，老母又話要離婚又剩，宜家唔肯返屋企走咗嚟住，我都唔知佢幾時走。」
「吓，都成幾廿歳人宜家先走嚟話離婚？」
「真係比佢哋吹脹咗。」
聽到元家強咁講，我頭都痕埋。咁咪代表個Mary要一直放住係我屋企，Man有可能會有朝一日發現！
唔得唔得唔得！
「家強，你一定要拎返個Mary呀！」
元家強聽到我咁講立即瞪大雙眼：「痴撚線咩！等等比老母發現唔單只離婚，仲要同我斷絕母子關係呀！你屋企都無人，唔驚啦。」
唔驚？我緊係驚啦！我屋企無啦啦多咗個靚女呀！我又唔想話比佢哋聽，等等比佢哋知道我無啦啦同個靚女同居咪審犯咁審問我。
我無再出聲，默默咁飲埋杯酒。因為聽日我仲要返工，所以就自己一個人先返去。
當我行到樓下嗰陣，忽然有人拍我膊頭。我一轉身就見到Tracy 對住我甜笑。
「HI，Gary。」
望住佢笑容我個心好似就溶化咁，佢真係好靚女呀。
「HI⋯⋯Tracy 。」
「你咁夜嘅？」佢拉住行李同我一齊行入大廈。
「係呀。OT所以遲返屋企。妳呢？一個女人咁夜返屋企好危險喎。」
「我啱啱飛完台灣呀，夜機所以咁晏先返屋企。」Tracy 佢係外套袋到拎咗件鳳梨酥，佢遞比我講：「送比你，當係手信。」
我接過之後，心裡面諗今次係機會啦，我鼓起勇氣問：「妳送手信比我，咁我要請返妳食飯先得喎。」
「咁好一件鳳梨酥換一餐飯？」Tracy 笑住望住我講。
「係呀。我遲啲約妳請妳食飯呀。」我將手機遞向Tracy 前示意。
我有諗過佢會唔覺得我係狗公，唔肯比電話我。點知佢無猶疑，係我手機到入咗佢電話號碼打通之後，我見到佢set咗我個名做鳳梨酥。
咁似情侶間嘅愛稱嘅。
我同佢一齊入𨋢，一到五樓Tracy出𨋢前拎住手機同我講：「咁我等你餐飯啦！」
我完全無諗過佢咁輕易就比電話我，希望唔係我FF睇嚟佢好似對我印象唔錯，可能都有機會咁。
一入到屋企我就興奮到握實拳頭咁做勝利手勢：「Yes!Yes!Yes!」
忽然我感到背後好似有人注視住我，我慢慢轉身見到Man企在係黑媽媽嘅客廳到眼定定咁望住我。」
想嚇死人咩！我有啲尷尬咁慢慢將手放返落嚟問：「咁夜妳仲唔訓嘅？」
「我肚餓。」
佢靜咗一陣望住我，郁都唔郁咁，唔通佢想我煮嘢比佢食？
「你今日咁晏先返嚟嘅？」
我望一望手錶，原來已經凌晨兩點幾。我之前就算OT都無試過咁晏先返到屋企，而且大多數星期一我都唔駛OT會早返屋企。可能因為咁所以佢覺得奇怪。
不過我無諗過佢會留意我收工時間。
忽然我肚傳來一聲打破咗我地之間對話，我個肚竟然餓到打鼓，先醒起我仲未食晚飯就去咗飲酒。好在無胃痛。
我好尷尬咁對住呀Man笑：「我⋯⋯去沖涼先。」
我走入房拎完衫然後走去廁所沖涼，沖完涼後一走出去就聽到Man叫我：「Gary。」
我一望過去就見到廳開咗燈，呀Man坐係飯檯前，飯檯上放住兩碗公仔麵。
「我⋯⋯煮咗公仔麵呀。」
我望住佢見到佢塊面越嚟越紅，好似怕醜咁。我無諗過佢會有呢一面。
Man遞咗對筷子比我，我接過之後坐低，然後開始食。點知一入口⋯⋯嘩！搞咩呀！一入口啲麵咁林嘅，啲湯仲要勁淡無咩味咁。
我無食過公仔麵係咁難食嫁！
唔怪得佢食我煮嘅嘢好似食米芝蓮美食咁啦。
我望一望Man，只見到佢望實我好似擔心我面上露出難食嘅表情。我對Man微笑然後繼續食，佢見我繼續食碗麵就鬆咗口氣，我偷望Man見到佢嘴角好似有啲笑意。
呢個係我第一次見到Man笑，佢微笑起嚟個樣仲靚。原來佢都唔係我想像中咁Cool。
我停咗停望住碗麵，諗返起以前OT返屋企後，屋企人都已經訓哂覺。每次我都躡手躡手咁走入廚房叮返熱屋企人留低嘅飯菜。
原來OT好夜返到屋企有人陪你一齊食飯嘅感覺係咁好。我覺得自己心口位置有陣陣暖意。