《無啦啦多左幾個家姐同細妹Season 3》: 景象
所有野都好似回到從前咁，終於。
唔係，其實唔係。大家都知道回到從前係無可能既事。
就算二家姐已經返左黎都好，我地都已經唔再係五年前既我地，始終經歷過咁多野之後心早已經唔同左。
但咁都唔緊要，唔緊要。只要大家一齊，未來總係會變好。
就係我繼續安慰自己既時候，Discord響左一下，提示我有人登入左我所在既頻道。
知道呢個channel既人唔多，所以我合埋眼都知道係邊個黎左。
我︰「早晨呀Anna姐。」
無錯，來者正是Anna。我早兩個鐘Whatsapp搵過佢話想見下佢，叫佢有時間既話就黎discord搵我。
之後我就一直留守係電腦前等待Anna既出現，順便讓出時間比Sarah佢地同二家姐盡訴心中情。
Anna︰「我呢邊都唔早啦仲早晨，岩岩有野忙緊所以無睇到電話搞到而家先覆到你，點呀搵我咩事？」
聽佢咁講，睇黎佢仲未知道二家姐已經返左黎既事，可能係Sarah佢地太開心未記得通知Anna啦。
不過咁仲好，我可以做第一個人講呢個消息比佢知，都有小小開心。
我︰「我…接左二家姐返屋企啦，我得左了。」
佢聽完呢個消息之後並無馬上回應我，透過webcam既畫面我見到佢馬上拎起電話碌左兩碌，之後輕輕掩住佢個嘴仔。
睇黎Sarah佢地早就通知左佢，只係佢真係太忙無睇到。
Anna︰「嘩…突然聽到你咁講我真係唔知講咩先好…個腦係閃過好多野但唔知應該講咩先…」
我都係第一次見到佢咁手足無措既樣，真係可愛。
我︰「要講既話，應該係講恭喜先啦我諗。」
Anna︰「又岩，咁…恭喜你啦傻仔明，你終於得左，帶到二家姐返黎。」
一句恭喜之後我地兩個就陷入尷尬既沉默，大家都只係透過瑩光幕注視著對方。
我無佢地咁叻有神乎其技既讀心能力唔知佢點諗，我自己係呢一刻就有好多野想同佢講，但就好似佢頭先講既咁，唔知由邊講起好。
其實…對二家姐都係，明明可以振到佢返黎我係好開心，但返到黎我又唔知應該點面對佢好。
我同佢之間總係有一層尷尬隔住，個層尷尬就猶如一片強力AA膠，你一掂到佢就會想缩手退到九尺遠。
唉我都唔知點算好，所以先黎搵Anna。
Anna︰「其實…你而家係咪唔知應該點做？一直以來努力既目標突然達到左，就唔知之後要點做，係咪咁？」
嗱我都話左佢地識讀心架啦，痴撚線架真係。
我咩都無講，只係點點頭去表示認同佢既講法。
Anna︰「順其自然就好啦，住埋同一間屋總有機會既。反正你大把時間，來日方長呀傻仔明。」
佢又講得岩，我頭先明明都係咁諗，但聽到佢講就有一種肯定既感覺。
係囉，心急啲乜啫，來日方長呀。
我︰「聽到你咁講真係好，我個心即刻定左好多，果然搵你傾係正確既。」
Anna︰「係咩？或者我有潛質做心理醫生喎，好唔好係呢邊讀返個course，返香港做個心理醫生呃下人錢都好吖~」
唔知點解一聽到佢話想係個邊留多陣之後我個心就好緊張，即刻坐都坐唔定，好似張櫈有野咬鳩我咁。
我︰「喂唔好啦我地唔係講好左兩年架咩，做咩無啦啦又要讀多個咩心理course呀，唔好啦度求下你啦。」
佢條友一見到我緊張既樣即刻笑到卡卡聲，我就知道佢係玩緊我。
好玩唔玩走黎玩呢啲，會驚架嘛。
Anna︰「講笑咋傻仔，我都想呢兩年可以快啲過，咁我就可以快啲見到你。」
我︰「我都係，其實唔係吖你可以quit，咁咪可以即刻返黎見我囉係咪先？」
Anna︰「你知我點解要讀呢個course架，你再講我就叫Ellen幫我打死你。」
我知，我當然知，都係因為我吖嘛。
我︰「嗯我知道，點都好啦你一個人係個邊要自己小心啊知唔知。」
Anna︰「我會架啦長氣，好啦你都快啲去搵Sarah佢地啦，你個邊呢個鐘數應該夠鐘開飯先係。」
去到咁遠都仲記得我地幾點食飯，真係吖…
我地既會面就係咁樣中止，無再見，無咩goodbye kiss，就只係突然從對方既畫面上消失。
不過佢咁講得，我都唔好意思再浪費時間係度為呢個發達既資訊世代傷感，我要快啲去飯廳食飯先係。
我隨便洗左個臉，換過件衫就起行，一落到去飯廳就已經見到蘭姨仲有幾位姨姨拎緊一碟又一碟餸出黎，真係時間岩岩好。
至於人呢…曹Uncle，老母以及大家姐暫時就未見人，其他人就坐哂係另一邊既梳化，有傾計既，有玩電話既，咩都唔做齋坐既都有。
傾計既當然就係Sarah ，Ellen，羽晨以及二家姐啦，無諗過佢地傾咁耐都仲有得傾，真係犀利。
不過最令我在意既都係個兩兄妹，佢地坐埋一邊緊張到好似酒樓另一家人等位咁。
唉，同我個情況一樣呢個case都係急唔黎，想當初我都唔係兩三日就完全融入到呢度，又點要求佢地兩個做到呢係咪先。
「各位少爺小姐，可以食飯啦，請各位入席啦。」
蘭姨正正係呢個時候敲響飯鐘，大家都紛紛齊集到飯桌前，就連曹Uncle，老母以及大家姐都粉墨登場。
呢次好似係我黎到之後第一次見到呢張長長既飯枱可以兩邊都幾乎坐滿人，可想而知場面有幾熱鬧，曹Uncle始乎對於呢個景象感到非常滿意，笑到見牙唔見眼。
不過呢啲都係我想見到既野，大家都開開心心。