《無啦啦多左幾個家姐同細妹Season 3》: 再等等

無諗過二家姐會住係呢啲咁普通既地方…唔怪得一直都搵唔到佢啦，我仲以為佢會好似阿日同Ashley咁住係啲獨立屋度添…

Ashley︰「地址我就比左你，去唔去就交俾你自己決定啦。」

佢個日講完呢句就離開左，病房再次得番我一個人。

廢話，我一定會去啦係咪先，問題就只係幾時去。

出院後安排下日子過去啦…





非常幸運地，唔洗幾日醫院就同我講話我可以出院，都唔知係咪夾埋既。

但當我想藉住呢個機會去睇下阿日既時候，佢原來已經先我一步出左院，聽返Sarah佢地講先知大家姐接走左佢地兩個，將佢地暫時安頓係佢地原來既大屋。

算啦，都係返屋企先，我都有啲掛住自己張床了。

一如我所料，返到屋企我受到鋪天蓋地式既問侯，上至老母，下至羽晨都係度問我點，仲有冇邊度覺得痛之類。

我今次亦好老實，清清楚楚講哂自己仲有啲乜野係覺得唔掂，可能因為返到屋企之後個人覺得好放鬆掛。






奇怪既係我返左黎之後好似唔見大家姐，唔知係咪公司有好多野忙呢？我仲有野想問佢添。

唔係，唔會係公司有野忙。

應該係想避開我，唔想我追問而家既情況啦。

但我而家有二家姐既地址，都唔洗再煩住大家姐等佢難做啦。

聽日就去搵二家姐...好唔好呢...





唔好再拖啦，再拖又有乜意義，始終都係要面對，一於聽日啦。

嗯？邊個敲門？

就係我岩岩下定左決心既一刻，就有人敲門。

我：「可以入黎呀，門冇鎖架。」

說話講出未夠一秒，門就緩緩打開，一個人影徐徐映入我既視線，Sarah。

Sarah：「Hi~做緊咩呀你？」

我：「嗯？無呀好似好耐無返黎呢度，想望多兩眼咋嘛。你搵我有事？」





Sarah並無馬上回答我既問題，而係係我房慢慢行，慢慢遊覽，望下我櫃上既模型手辦咁。

起初我都有啲疑惑，望住佢既一舉一動，直至佢經過我排模型我先一時分心，走去照料個啲好耐冇見過既模型。

冇諗過就係呢一剎那，就係呢一剎那俾左機會佢突襲我。

佢一下子就從後抱住我條腰，個份力度我從來無係佢身上感受過，大力到令我嚇左一跳，手上既巴力幾乎直跌落地。

我：「Sarah…?」

Sarah：「你又話會無事既...」

…

的確咁既結果又唔可以話無事既...





我唔敢辯駁啲乜，唯有敢做既就只有摸住佢隻手。

我：「對唔住...」

Sarah：「我唔要你講對唔住呀，我要你無穿無爛返黎咋！」

面對愈來愈激動既佢，我真係唔知可以講咩去安慰佢。

唔係，唔應該話安慰，我冇咁既資格去安慰佢，做錯野既人邊有咁既資格。

明明有人為我擔心，我卻唔知自己可以為佢地可以做啲乜，仲要一次又一次咁傷佢地既心，我真係一個差到無得再差既人。

佢地打我鬧我我都願意受，問題就係佢地無咁做，只係為我擔心為我喊，咁先令我最難受。





我：「放..我會帶二家姐返黎，到時我地就一家人齊齊整整啦。」

我唔敢講放心呢兩個字，經歷左今次咁多事之後真係唔敢。

Sarah：「二家姐？你知道佢係邊嗱？」

佢聽到二家姐呢個名之後馬上就精神抖擻，雖然因為佢背向我我睇唔到佢既樣，但聽佢把聲就知道佢好明顯開心左好多。

我要既就係呢啲，我要既就係佢地開心。

我：「嗯，Ashley話左比我知。」

Sarah：「咁你打算點帶二家姐返黎？」

我當然無辦法好似嗚門咁豪言話打斷哂佢啲手手腳腳都要帶佢返黎啦，但我咩都無，就係死淨把口，我相信我呢把口一定可以幫到我帶二家姐返黎。





我輕輕用力鬆開佢個對抱住我腰既手，令自己可以擰轉身正面面對佢。

我：「二家姐咁錫我地，一定會聽我講返黎既。」

「再等我多一陣。」

講完我就輕輕力抬起佢塊雪白而又尖削既臉龐，輕輕吻落去。

唔知點解，呢個吻好令人難過。