《無啦啦多左幾個家姐同細妹Season 3》: 你的善良

如我所料，佢地幾個都係齊度，就連忙到甩碌既Ellie亦都在場，身上仲著住實驗室既白袍，睇黎係Ellen通知佢所以即刻趕黎連袍都唔記得除。
 
我黎到既時候Sarah同Yui已經互相依靠住係房間既一角訓著左，至於Ellen Ellie兩姊妹就坐係另一邊，Ellie繼續翻閱手上既報告，而Ellen就死掘掘咁望住我。
 
Ellen：「虧你仲可以咁心平氣和講咩我返黎啦，乜你唔知自己做左D咩架？」
 
我當然知道自己做左D咩蠢事啦，所以我先黎呢度嘗試挽救補救自己做錯既野。
 
正因如此，我決定咩都唔講，只係點點頭，以免講多錯多。
 


如果比佢發洩完所有既怒氣之後佢會原諒我既愚蠢的話，我甘願接受佢再惡毒既言語。
 
Ellen：「你知唔知佢地兩個嚇到喊住打比我？我地兩個哂左幾多心機口水先氹到佢地訓？我識左佢地咁多年我都未見過佢地咁，我自己都嚇親呀你知唔知？」
 
我知，我當然知，係Sarah摑我一巴個下我就已經知道。
 
Ellen：「你呀，到底有冇諗過後果同影響架？」
 
我：「好老實講，我當初真係無代入你地既角度去諗你地既感受，我只係自以為咁係可以令大家開心既最好方法，人地話得我好岩，我打算做既野同自己起初既目的其實係完全相反，或者我只係想自我滿足？我自己都唔知哈哈。」
 


唔知點解最後都係忍唔住講左出黎。
 
Ellen聽到我咁講之後呆左一下，之後慢慢企左起身，再慢慢行近我既方向。
 
但我卻不自控咁向後退，仲唔小心撞到房門。
 
我：「對唔住。」
 
終於都講左出口。



雙眼突然覺得有點濕潤，視綫有點糢糊，想話擦擦佢但雙腿居然不自控自己向後退，撞向牆壁。
 
基於再無退路，Ellen唔洗好耐就走到我面前。
 
我唔知點解覺得好驚，更忍唔住合埋左眼，好怕佢會好似Sarah咁打我一巴。
 
但呢個情況並沒有發生，佢反而稍稍用力按下我個個早已低下既頭，按到佢既身上，然後輕輕拍打我既背脊。
 
Ellen：「或者要講對唔住既人係我先岩，嚇親你真係好對唔住，我成日都咁chur…」
 
「但我想你知既係無論你做錯幾多次都好，我地都會原諒你，就好似你對我地咁。」
 
「我地既要求好簡單，就係要你平平安安，除左咁之外你做咩我地都會支持你。」
 
「只要你可以返黎，咁就夠喇。」


 
我完全無諗過呢番說話會係由Ellen把口講出，平時呢啲說話多數係Sarah或者Ellie講。
 
估唔到佢都可以咁溫柔…
 
雖然比佢咁樣抱住係好舒服，但總無可能永遠沉浸係呢片綿花糖中，所以我過左無耐就決定主動抽身。
 
深呼吸左一下之後下定決心，重新望住佢，不再逃避。
 
我：「嗯，我應承你我會無事。」
 
聽到我咁講，Ellen終於笑返，仲摸左我個頭一下，更輕輕錫左我一啖。
 
Ellen：「你仲要帶二家姐返黎呀知唔知？仲有阿月添。」
 


我：「我以為你地會唔想我插手咁多阿月既事添，畢竟…」
 
Ellie：「你覺得我地會妒忌？」
 
一直無出過聲既Ellie突然主動出擊，介入我同Ellen之間既對話，殺我一個措手不及。
 
我：「又唔係既…只係怕你地會誤會我對阿月會有咩非份之想啫…我想幫佢係因為二家姐當佢係屋企人，唉諗落其實我真係好多事…」
 
就係我又開始為自己既缺陷煩惱既時候，Ellie默默放低左佢一直愛不惜手既文件，同Ellen一樣行左埋黎我身邊。
 
Ellie：「你由以前開始就已經係咁貪心架啦，想樣樣都要做到100分盡善盡美。」
 
咦，做乜今日Ellie Ellen兩個角色好似掉轉左咁既，我有冇認錯人？
 
Ellie：「不過咁就係你好既地方，你總係好想大家都好，想大家都開開心心，甚至忘記左自己，令到自己周身傷。」


 
「我當然知道你只係當阿月係屋企人所以先咁上心，但無論如何我都想你安安全全整整齊齊咁返黎，我地仲有好長既路要行，要你同我地一齊行。」
 
「我相信你個份善良一定可以打動二家姐，甚至係阿日。」
 
佢兩姊妹呢番心意我心領神會，忍唔住攬住佢地表達呢份感激之情。
 
但偏偏Sarah同Yui係呢個時候訓醒，仲要一擘開眼就見到我。
 
Sarah，Yui：「阿明！！」
 
啊，同我諗既一樣，真係即刻撲埋黎，四個人壓埋黎真係幾乎抖唔到氣，好彩佢哋都唔算重。
 
唔只佢哋四個，仲有係遠方為我而努力進修既Anna，諗起佢地五個係如此愛我，我就知道自己真係唔可以有事。
 


我呢條命一早就已經唔係我一個人既野了。
 
難度雖然高，但今次真係要happy ending，我地無第二個選擇。