《無啦啦多左幾個家姐同細妹Season 3》: 相似

呢一日我同平時一樣自己一個返到鋪頭看鋪，時不時Whatsapp幾位大小姐睇下佢地既行蹤，確保佢地既安全。
 
經過呢一個月，呢一切似乎都變得平常，我地五個人都習慣左呢種模式。
 
煩擾我既唔只阿日既事，仲有之後既二家姐既事，我真係好想快D見到二家姐，但我好清楚一日未解決到呢件事一日都唔方便去搵二家姐，就算死纏爛打大家姐而見到二家姐都只會一臉尷尬無話可說。
 
而且阿日就猶如一個計時炸彈，我唔知佢癲起上黎會做D乜，話唔定會傷害到Sarah佢地。
 
只有呢件事我絕對唔可以俾佢發生，絕對唔可以。
 




我唔可以再俾佢地因為我而受傷，呢幾年我咁努力練拳操體能就係為左防止呢啲情況再發生。
 
一條頭髮都唔可以俾佢地因為我而掉。
 
我要好好諗下而家呢刻自己有乜可以做到先得，雖然而家呢刻仲未搵到阿日，但我應該仲有D野仲可以做到先係。
 
而家已經為左預防佢突然襲擊Sarah佢地而安排左保鏢，但咁等於我地只處於被動既狀態。
 
如果想主動出擊既話可以點做呢？我做餌約佢出黎話做個了斷唔知可唔可以引到佢現身呢？
 




唔…有D難度…畢竟我呢邊無可以聯絡到佢既方法，都係諗下其他方法喇。
 
阿輝：「喂阿明有人搵你喎。」
 
我：「嗯？啊唔該你我而家就過去。」
 
唉諗得太入神添，好彩阿輝叫一叫我，如果唔係我連自己變左化石自己都察覺唔到。
 
不過到底係邊個搵我呢？Sarah佢地？應該唔會吖，頭先佢地先同我話今日係去睇鋪，應該唔會黎先係。
 




咁會係邊個呢…屌行過去咪知道囉。
 
抱住懷疑既心情，我慢慢走向鋪頭門口，發現有一個熟悉既男性企左係度四圍望。
 
呢個人對我黎講真係又愛又恨，每次見到佢都唔係咩好事，永遠都有一堆麻煩。但另一方面幾乎每次都係呢個人幫我解決呢啲問題，真係矛盾。
 
無錯，佢就係已經有一段時間無見既晨哥。
 
我：「晨哥，搵我有事？」
 
晨：「係有D事既，不過你間鋪又裝修得幾好，唔錯唔錯。」
 
我：「啊你好似係第一次上黎？多謝多謝，過黎呢邊坐低傾吖。」
 
坐低之後晨哥無再周圍望，而係一黎就直奔主題。




 
晨：「你班人真係吖，我行開一排啫做乜所有野都亂哂龍，呢個係咁嗰個又係咁，你屋企真係特別鐘意俾麻煩我。」
 
我屋企…？我最近都無搵過晨哥，咁係邊個？應該都係大家姐？
 
我：「咁即係話你…已經知道左阿日既事？話時話你呢排去左邊度威？」
 
晨：「嘛要知道既都已經知道左啦叫做，我最近去左邊？去左日本一排啦，無諗過返黎之後件事居然可以仲未完，我仲以為你會再見May姐一次添。」
 
呀你真係下下拮到入肉架喎…豈有此理…
 
我：「我都係咁打算，但可惜計劃趕唔上變化，變成而家咁。一日都係我唔好，係因為我先導致咁既局面，仲要Sarah佢地擔驚受怕咁過日子。」
 
無錯，如果我當日可以處理得好d，而唔係直接比二家姐帶佢地走既話或者就唔會變成而家咁。
 




但我既內疚似乎並未得到眼前呢個人既重視，只係嘆左口氣繼續轉動手上既電話，再打左個喊露。
 
晨：「啊~~你屋企D人真係個個性格都一樣，咩都覺得係自己錯，係自己既責任。咁樣做人舒服咩，開心咩？」
 
 一樣…？講既唔通係…
 
晨：「其實諗落阿日同以前既你差唔多吖，你自己覺唔覺？」
 
我同佢似…？
 
我呆左一呆，原本想反駁但已經黎唔切，俾佢繼續講落去。
 
晨：「你地兩個都係原本一無所有，只有一個相依為命既屋企人，但係機緣巧合既情況下得到左新既屋企人，咁樣睇落唔似咩？」
 
「唯一唔同既就係你有好多屋企人，而佢就只有你二家姐一個。」




 
「所以如果有人想拎走俾左佢新希望新生活既屋企人，你覺得佢會點做？又或者如果係你，你又會點做？」
 
如果…唉我都唔sure自己會做出d乜。
 
或者我都會好似佢一樣咁瘋狂掛。
 
晨：「睇你個樣你應該已經得到答案啦？咁我都唔浪費時間啦免得人地等咁耐。」
 
人地？仲有其他人？定係佢仲約左其他人？
 
但再一次我未黎得切反應，佢就已經又有動作。只見佢起身慢慢離開鋪頭，但過左唔夠三十秒又走返入黎，仲帶左一個人入黎，一身白色長裙，馬上就引起全場注目。
 
我望真D佢個樣，黎既人居然係阿月…
 




我再望望旁邊既晨哥，想問下佢到底係咩一回事既時候，阿月就已經率先開口。
 
今日都唔知咩事，想講野既時候總係會比人打斷既？
 
月：「你可唔可以幫我搵到我阿哥？」
 
嘩屌你…呢個係咩發展黎…