《無啦啦多左幾個家姐同細妹Season 3》: 家人

我唔敢一黎就入正題，決定先以蛋糕作為誘飵，慢慢引誘佢入局，最後先入正題問佢二家姐既信息。
 
呢招目前睇落非常順利，大家姐只顧食Yui整比佢既蛋糕，仲食到忘哂形係咁踢腿，唔知仲以為佢學緊游水。
 
我：「點樣呀大家姐，Yui整既蛋糕好唔好食？」
 
大家姐：「嗯嗯！好好食呀！哇最近做野咁辛苦，而家食到呢個蛋糕真係咩都抵返哂！班衰妹真係抵錫！仲有幫我拎蛋糕既阿明你都係~」
 
我都未反應得切佢就已經一啖錫左落我塊臉度，當中仲夾雜住cream同唇膏。
 




我當下第一個反應係馬上彈開幾尺，之後先feel到自己對耳仔開始紅同熱，細佬都開始有反應，完全醒唔起要抹走呢個印記。
 
最後仲要比大家姐笑多一次，勞煩佢出手抹走呢個印記。
 
大家姐：「就算過左咁耐，經歷過咁多大大小小既事都好，你都仲係當初我識嗰個阿明。」
 
我：「咁係咩意思…？」
 
大家姐：「哈哈無乜特別意思，只係想話你仲係咁抵錫啫~」
 




佢講完就起左身，行埋一邊斟左兩杯水返黎，將其中一杯遞左比我。
 
當我一邊飲一邊思考點樣開口誘導大家姐講出二家姐所在既地方既時候，大家姐突然先開囗殺我一個措手不及。
 
大家姐：「我估你黎呢度都唔只係為左送外賣咁簡單架啦？講啦唔洗怕醜喎~」
 
嘩原來大家姐已經一早睇穿左我黎係另有目的，真係厲害，以前都唔覺得大家姐咁識睇人眉頭眼額既，係咪係商界打滾得多訓練出黎架呢？
 
不過既然佢都講到咁，我都無謂再轉彎抹角，開門見山問佢吧啦。
 




我：「我想知二家姐而家係邊。」
 
面對我單刀直入既提問大家姐並無一絲既驚訝，而係繼續淡定飲佢手上既個杯水。
 
大家姐：「嗯，比你知道的話你會點做？去帶佢返黎？定係你想去搵日月報仇？」
 
我：「報仇根本一D意義都無…更何況佢地係二家姐收養既細佬妹，即係都係我地既屋企人，無理由向佢地報復…我只係想好好同二家姐坐低傾下。」
 
報仇無意義…講完自己都差D想打自己一拳，如果係以前既我一定唔會咁講，不過而家…唉都係算啦唔好講咁多。
 
大家姐：「無意義啊？咁如果我話你知佢而家已經唔係香港，你又會點做？」
 
…我居然無諗過呢個可能性，我一直以黎都認為二家姐仲係香港。係囉如果二家姐已經唔係香港，我又應該點做先好？
 
我：「我…無諗過呢個問題，我直覺覺得二家姐一定仲係香港，因為日月既問題應該無咁快解決到先係，佢地無可能咁快就離開左香港。」




 
大家姐：「哈哈你真係聰明仔黎，無錯呀佢的確仲係香港，其實我都好想你可以去同佢傾下架，但佢又叫我千其唔好話你知佢而家住邊，所以我先咁爭扎，唯有避開你囉~」
 
「不過而家咁比你嚴~刑~逼~供，我諗就算我講左佢都唔會怪我既~」
 
喂我無嚴刑逼供你呀，掂都無掂到你添呀話我嚴刑逼供。
 
但係算啦大家姐都要同二家姐交代既，而家可以知道二家姐係邊度住就夠啦。
 
正當大家姐準備講出口之際，佢既電話忽然響起，一隻意想不到既攔路虎打斷左我地之間既對話。
 
大家姐望住個電話遲疑左一下，但最後都係接左。
 
由於角度同防偷窺mon貼既關係我無辦法睇到係邊個打比大家姐，但可以肯定一定唔會係熟人，如果唔係大家姐邊會有咁既表情。
 




而且電話既另一邊應該講左D好爆既野，因為我睇住大家姐表情由疑惑變到驚訝，最後仲好匆忙咁收左線。
 
直到呢一刻，我先敢問大家姐到底係邊個打黎。
 
大家姐無正面回答我既問題，而係用一把顫抖既聲音講出一個消息。
 
「阿日唔見咗…」