《無啦啦多左幾個家姐同細妹Season 3》: 日月

聲音響起既一剎那，我成功習得新技能「電光石火」，以前所未有過既速度搵到一個位置匿埋。
 
幸運既係，呢個位置有一絲既空隙可以睇到大門既方向，真係天助我也。
 
入黎既會係日，定係月呢？定抑或係兩個一齊返黎？
 
屌係喎晨哥佢地呢？自從入左間屋之後我就無再留意佢地，連佢地係邊我都唔知添。
 
不過應該唔洗擔心佢地既，個個都身懐異能邊會因為呢D小事暴露，都係擔心下自己好過啦。
 




言歸正傳，咔嚓既開門聲過後傳黎腳步聲，而伴隨住腳步聲既係人影，而且係兩個，一男一女。
 
咁係咪叫一網打盡呢…？但問題係佢地係咪就係我要搵既人同埋要用咩方法制服佢地…
 
呢對男女愈行愈近，我既心跳亦變得愈來愈快，個心好似想跳出黎見下大家say聲hi咁。
 
但係亦因為佢地近左，我開始慢慢睇到佢地既樣。
 
行係前面既係女性，而且可以話係熟人，Ashley。
 




後面既男性雖然戴住口罩，但我總感覺係邊度見過佢。
 
不過既然Ashley係呢度出現，就證明我地無搵錯地方，而且證實Ashley就係Moon。
 
之後要諗既就係點先可以制服佢地，佢哋總唔會乖乖地企定定聽一個闖入佢地而且係佢地視為仇人既人講野。
 
就係呢個時候，機會出現了。
 
Ashley：「我咪話左要一步一步咁黎囉！要慢慢慢慢咁折磨佢先有意思，令佢崩潰！點解你係都要咁心急？」
 




男：「我先想問你做乜要拖拖拉拉，直接D搞掂佢咪得，而家搞到開始多人注意到我地，你話係咪衰。」
 
嗯，其實Ashley講得好好，比起直接打我一身，Ashley對我做既野反而更令我感到恐懼。至少我有一排真係食唔安坐唔落。
 
Ashley：「就係因為你心急又無plan先會搞成而家咁呀你咁都唔明？而家佢日日都係咁搵我呀！」
 
男：「我都廢事同你講咁多，我就一定會繼績，你想點就隨便你，係咁先。」
 
呢個男人講完就從Ashley身邊離開，甚至離開左客廳，消失係我視綫之中。
 
而咁岩Ashley係呢個時候又背向我坐低係梳化玩電話，我就知道機會來了，開始慢慢行觔動，從背後接近佢。
 
一步一步，直至我行到去一個適當位置可以開技既時候，房個邊突然傳黎一聲巨響，嚇左我一跳。
 
被嚇到唔只我一個，Ashley都比呢下巨響嚇到，成個人彈起左。




 
起初我見到咁都唔識反應，但意識到機會難逢之後就決定把握呢個機會，即刻從後施展十字鎖，一下制服左佢。
 
估唔到練拳練左幾年比人鎖過上千次，今日居然有機會對人施展。
 
我：「你要既係咪就係呢種折磨？」
 
我都唔知點解自己會講d咁既野，但睇黎非常有效果，佢抬起頭以恐懼既眼神望住係佢背後既我。
 
呢邊就搞掂左，但仲有另一個…話時話頭先既巨響係咩事？
 
就係我仲思量緊呼唔呼叫晨哥好既時候，佢就出現左係我眼前，仲要係係房個邊既方向出黎。
 
晨：「哦？已經自己搞掂埋另一個啦？比我想像中有用喎衰仔。喂Jackson出黎鎖埋另外一件啦。」
 




另一個？唔通…
 
我既預感果然成真，其餘人押住個男仔出黎，雙手仲已經被上左一個特別既鎖，兩舊黑色既方形物體唔似係手銬。
 
好快，Ashley雙手都被上左同樣既鎖，日同月都被迫乖乖地坐係梳化，一言不發。
 
之後要點做好呢？
 
我：「點解要針對我。」
 
果然都係應該要先問呢個問題。
 
日：「為左可以令你呢個令人作嘔既人永遠消失係個一位既世界入面。」
 
莫名其妙既說話，話說由一開始我就已經覺得佢好熟口面，但隔住個口罩唔係好認得出…




 
晨哥好似知道我既心思，揮揮手做下手勢叫左人除去「日」既口罩。
 
我再凝視左一陣，終於認出呢個人。
 
我：「你係之前Party上話跟老闆黎出席既個個…」
 
知道我認出佢之後既佢並無不安，反而露出得意既邪笑。
 
日：「被你認得真係好榮幸呀陳煒明先生。」
 
呢條友…精神係咪有問題？比起佢，Ashley就顯得相當平靜，一言不發坐係度，似係一早預料到會變成咁。
 
我：「你地到底係咩人。」
 




日：「日同月，合埋就係明，即係代表我地要取代你既人。」
 
聽到呢D濕鳩野，一時之間忍唔住怒火，衝左上去捉住佢條頸。
 
我：「唔好再用呢種莫名其妙既說話黎hea我！」
 
「到底係咩人派你地黎！邊個要你地取代我！講！」