《無啦啦多左幾個家姐同細妹Season 3》: 幫助

原來佢哋係我昏迷個陣已經從前黎探病既阿輝佢哋口中得知Ashley既事，當然，名佢哋當然唔知，因為只有我知。
 
不過都好，唔洗再瞞住佢哋，個人都舒服好多。
 
如是者，又過左兩日，大家同平時一樣聚集係屋企。
 
大家姐：「所以呢，你要出席呢個party啦~無得say no~」
 
面對大家姐突如其來既要求，我同Sarah佢哋都顯得束手無策，但又無法拒絕。
 




明明而家仲有好多重要既事等緊我去做，開鋪既準備仲有查Ashley既事，只係其中一件事都夠我煩，而家仲要拉我去party…
 
到底係咩party咁重要呀…
 
Sarah：「唉呀唔好咁啦阿明，當去放鬆下囉？反正我哋都有幾年無出席呢D埸合。」
 
Anna：「係囉，同埋你都要開始重新習慣呢D場面啦，遲D肯定一個接一個咁黎，今次當係熱身熟習下囉。」
 
竟然連佢哋兩個都咁講…唉睇黎真係非去不可啦…
 




其實道理我係明白，只係我想留返多D時間比自己去做自己既事啫。
 
我：「好啦好啦，咁既然要去的話，你地記得要…」
 
Ellie：「晨哥都會去喎，阿明你到時可以搵佢傾下？」
 
晨哥啊…佢咁神通廣大，如果請佢幫我查下Ashley既話應該可以有d進展？
 
唔…好似都諗得過…不過咪住先…
 




我：「點解你會知道晨哥會去既？」
 
Ellie：「哦因為佢對我既研究好有興趣，所以最近有聯絡過我打算傾下投資既事，岩岩佢就問緊我party既事啦。」
 
嘩Ellie既研究已經勁到吸引到人投資，仲要對象係晨哥，真係厲害。
 
嗯，一於就咁決定啦，咁個party就有去既價值啦，雙贏局面，皆大歡喜。
 
好，咁就可以暫時放低Ashley既事先，專心去搞好開鋪既事先。
 
鋪位係公司一早為我哋提供好，可以唔洗擔心，即係我地只需要煩入貨，裝修同D設備就可以啦？
 
好，Whatsapp佢哋傾下入貨既問題先，呢個係最麻煩既事。
 
「入貨個邊已經同行簽好哂約。」




 
咩話？已經簽好約？？佢哋會唔會太快手？？
 
望住阿輝呢個Whatsapp我第一反應係「仆街喇又做左freerider」，不過好快就清醒返，既然已經freeride左人，咁要快D幫手做埋淨低既野先得。
 
於是我召開左一次視像會議，好認真咁同大家討論下鋪頭既裝修，甚至拎出平面圖，鋪位既相傾下各式各樣既佈置應該點做。
 
點會諗到咁樣一傾就傾左三個鐘，但進度十分良好，大家都非常滿意，可惜既係大家都無相關既裝修技術，所以最後我哋都係需要搵裝修公司幫我哋處理。
 
係呢個時候，浩銘又發揮出佢既能力，話識得人做裝修，為我哋解決呢個煩惱。
 
就係咁，鋪頭既事暫時可以話告一段落，唔洗心掛掛了。
 
不過party啊…無去幾年，唔知我hand唔handle到呢？如果主角唔係我既話應該就無乜問題既我諗，最怕係…
 




「knock knock」
 
就係我雙手岩岩離開keyboard既時候，敲門聲就響起。
 
我：「入黎啦，門無鎖。」
 
說話講完都未夠三秒，門就被打開，而行入黎既係大家姐。
 
大家姐：「哦？咁勤力嘅？準備緊鋪頭既事呀？」
 
我：「係呀，都應該要把握時間準備架啦。」
 
大家姐並無馬上回應我，而係一邊漫不經心望住我枱上既筆記，一邊用公文袋拍打佢個對白滑既大脾。
 
佢手上個個公文袋一直吸引住我既注意力，而唔係佢個對白滑，有D肉地但又不失魅力既大腿，仆街今次真係gay test。




 
最後我真係忍唔住，開口問大家姐個公文袋係咩黎。
 
大家姐：「啊，係對你有用既野，你贏左比賽大家姐都未正式恭喜你，所以準備埋禮物比你，嗱，打開睇下啦~」
 
對我有用既禮物…？
 
咁引人入勝既講法我當然係招架唔住，係係大家姐手中接到公文袋既同時我就即刻打開左佢，將入面既野倒哂出黎。
 
入面並無太多野，只係有幾張相，但已經足以震撼我既每一寸神經。
 
因為相入面有Ashley，係渡假村入面既閉路電視畫面。
 
我：「呢D係…」
 




大家姐：「哂左我唔少時間先搵返出黎架，你要好好利用呢D相搵佢出黎呀，我既好~細~佬~」
 
唉呀…今次真係收左大家好多既幫助添…真係過意唔去…
 
但有左呢D相，或者就有更大既把握搵出Ashley，至少可以問下晨哥識唔識得呢個人。
 
時間再次過去，今日就係大家姐一定要我去既party既日子。
 
我當然整裝待發，我既伴侶們都一樣，Ellie甚至換上之前我同佢一齊買既個條裙，大家都話靚，心內特別好受。
 
係走入會埸既一刻，感覺非常奇怪。
 
呢一切好陌生，但又有幾分熟悉。
 
我始終都係返左黎呢個圈子。