《無啦啦多左幾個家姐同細妹Season 3》: 晚餐

Sarah：「返左黎嗱？坐陣先啦差唔多有得食架啦！」
 
佢一講完，旁邊既Ellen就打碎左隻碟了，碎碟既聲音猶如一個句號幫整片喧嘩劃線，大家都靜左落黎。
 
Sarah：「應該好快掛…」
 
Ellen：「喂呀阿明你係度搞到我分心啦！快啲出返去等食！」
 
Ellie：「 咁阿明未返黎之前你打爛個四隻碟又點計？」
 




Ellen：「收聲呀Ellie！你剩係攪蛋，有咩資格話我呀？」
 
哈…應該…希望今晚食到啦…
 
Yui：「阿明如果你肚餓的話可以食住呢D先架，我親手焗架…」
 
Yui既愛心曲奇，芬香撲鼻，色澤賣相已經非常吸引人，永遠都唔會食厭。
 
講起都流左兩滴口水，即刻食返兩三塊先。
 




就係我食緊Yui親手整既曲奇既同時，我亦發現Anna係一角埋頭苦幹中。
 
好奇之下我就問係我身邊既Yui，Anna到底係度做緊乜，做乜表情咁認真。
 
Yui：「我都唔係好清楚呀…佢話佢要整一個佢係英國學識既菜式喎，」
 
有新菜式食？？仲要係Anna親手整？？嘩屌真係愈諗愈期待。
 
Sarah：「乖啦唔好留係度喇，一陣Ellen打爛野又賴你架啦，上去洗個臉換件衫先啦。」
 




嗯…Sarah講野愈來愈似我老母了，對我好似教仔咁既！
 
雖然對Sara既語氣的確係有兩分抱怨，但老實講並不反感，感覺仲好溫暖。
 
點講好呢…就好似就算你返工幾忙幾攰都好，總有人係屋企等緊你，為你打點好一切，等你可以暫時放低一切好好放鬆下咁。
 
果然Sarah有成為一個賢妻良母既潛質呀…
 
我心滿意足咁跟隨呢位賢妻既指示退出眼前呢個戰場，自己一個返上房好好梳洗一下先。
 
久違咁係自己浴室浸熱水浴，感覺真不錯，感嘆在家真好。
 
係梳洗一番之後，我坐低係自己書枱前，拎出電話首先向阿Ray佢哋道個歉，畢竟自己出意外有機會拖累大家進度，雖然話贏左啫，但後績仲有好多野要搞架，應該話嬴左先係開始先岩添呀。
 
係交代好之後，我又拎出紙同筆，嘗試靜靜地梳理一下Ashley既事。




 
畢竟遲早都要面對佢，預先準備一下會比較好。
 
可惜係列出佢既行動同部分令我在意既說話之後，我仍然一頭霧水，唯一得出既結論就係我曾經對佢身邊既人做左D非常過份既事，令佢非常憎我。
 
因為Ashley既說話當中曾經強調仲有一個「佢」，而Ashley既行動亦係為左呢一個「佢」。
 
唔…有D難搞喎…我都無乜對人做過份既野，一直安守本份…嗯？
 
就係我諗野諗到幾乎冼落地之際，有人敲門並且自己走左入黎。
 
本身就唔想比佢哋知道呢件事既我立即警戒起黎，迅速收起張紙，望向門口，腦亦同時高速運轉，諗緊應該用咩理由去辯解好。
 
幸好既係入黎既係羽晨，我先鬆一口氣。
 




講起羽晨，而家既羽晨早已唔係當年個位小妹妹，過左六年佢已經蜕變成一個亭亭玉立既少女，相信佢係中學入面都係一個萬人迷，就好似佢三家姐咁。
 
羽晨：「阿哥~三家姐佢哋話可以食飯啦，叫我上黎嗌你落去~」
 
我：「嗯，我而家就落去。」
 
嗚嗚，佢已經唔再叫我明哥哥了。
 
但當我行到去房門既時候，羽晨居然伸手攔住左我。
 
羽晨：「你係醫院個陣…三家姐，泳琦姐姐佢哋全部都好擔心你，日日都喊…」
 
我都估到架啦…唉要佢哋幾個擔心我一個，仲令到Anna專登走返黎…個心真係好過意唔去…
 
我：「嗯我知道，所以我而家要做既就係盡一切努力去回報佢哋，放心啦，唔會再有咁既事架啦。」




 
我邊講邊摸羽晨個頭，最後仲同佢哋一齊返到飯廳。
 
但餐桌上既一片景象震驚了我。
 
雖然呢張餐桌上擺滿佳餚並唔係咩新奇事，但如果你話全部都係佢哋五個整既話…
 
有冇可能呀…講緊既係中台英意日都有喎…
 
麻婆豆腐，pizza，汁煮三文魚，菜脯蛋，仲有呢個包哂酥皮既唔通係…
 
Anna：「係呀，威靈頓牛柳呀。」
 
我簡直無辦法相信我雙眼同耳，佢哋居然可以整到威靈頓牛柳？？
 




我：「係Anna你整架？？」
 
Anna：「eh…咁以前陪你睇Hell’s Kitchen個陣你成日都話想食，咁我又見去到英國有D時間同設備咪自己學下囉，唔係整左好多次架咋！唔好食唔準賴我呀講明先！」
 
嘩屌今舖真係想喊，有呢份心意仲點會難食！大家話係咪！
 
Anna：「傻仔…整小小野食啫，唔洗喊呀…？」
 
你剩係識話我…你自己咪又係一樣眼濕濕…有口話人無口話自己…
 
無錯，其實我已經喊左，Sarah見到我哋兩個咁樣就行左埋黎，掃我哋兩個背脊，安撫我哋既情緒。
 
Sarah：「你兩個真係吖，開心事黎架嘛做乜要喊啫，黎！快D食啦，今餐係我哋幾個慶祝阿明成功嬴左比賽！係慶功宴！」
 
就係Sarah既帶領下，大家開始享用枱面上既佳餚。
 
佢講得岩，開心事黎架嘛，做乜要喊啫？
 
我都唔知，但就係想喊。
 
可能喜極而泣就係呢D啦。