《無啦啦多左幾個家姐同細妹Season 3》: 我們

我地三個一直都望實個門口，等緊佢返入黎。
 
而家大廳得返我地三個人，大家都無出聲，氣氛都幾尷尬。
 
佢地遲遲都未返入黎，搞到我都開始有d緊張，唔知佢處理得順唔順利呢？
 
其實真係唔想全部交哂比Ellie，但奈何我唔識講野，如果我埋到去的話只會喊埋一份，最後咩都幫唔到手。
 
但Ellie唔同，佢冰雪聰明之餘又能言善道，之前都係佢第一個發現阿明開始有問題，主動提出要帶佢去放鬆下，阿明先可以有機會抖下休息下。
 




明明我同阿明既距離係最近，但點解每次我都無辦法最先察覺到阿明有事呢？
 
其實諗真d，我先係最無用個個，毫無建樹…
 
Ellen：「哎你唔好咁啦，交比Ellie就得，唔洗擔心咁多。」
 
我：「嗯？我咩都冇講，點解你…」
 
Ellen：「超，大家係埋一齊咁多年，好多野唔洗講到出口都知道既，而且明明佢成半個月有多無打機無玩玩具，我咁都無睇得出佢有心事我都有責任。」
 




Yui：「你地都唔好唔開心啦…甜品都差唔多整好，不如等我入去拎出黎比大家？」
 
我：「嗯，我都黎幫手喇…」
 
Yui：「唔洗啦你坐係度啦，呢D野係我做架嘛。」
 
就係因為一句話，我就被留下了。
 
咁我又有乜野係可以做…？
 




係Yui入左廚房無耐，我就聽到露台門被打開既聲音，即刻望左過去。
 
但係，返入黎既就只有Ellie一個，並未見到阿明既身影。
 
緊張起上黎，自己對腳完全唔受控制，衝左上去Ellie度。
 
我：「Ellie，阿明呢？阿明佢點呀？」
 
講完先發現自己講到好似d電視劇入面醫生岩岩係手術室出黎，d家屬湧上去問題咁，哈哈哈…
 
講完自己都笑唔出添…
 
Ellie：「佢無野架啦，同佢傾左一陣佢好返好多，而家係出面訓著左，Sarah請你一陣去拎張氈比阿明吖，廢事佢凍親。」
 
我：「嗯！我而家就去拎！」




 
終於搵到一件我可以做既事，我當然唔會怠慢，即刻跑左上樓拎，仲差d仆親。
 
我真係好想可以為阿明做到D野…
 
幫佢cum被既時候見到佢咁攰個樣差D就忍唔住喊左出黎，但又怕會嘈醒佢，唯有夾硬忍住，直至行返入大廳。
 
而Ellen亦係呢一刻，行左埋黎用擁抱迎接我。
 
Ellen：「佢唔會有咩事既，佢訓醒就會好返架啦，你唔洗太過擔心喎，我地一直都係咁架啦係咪先，埋黎食下甜品仲好啦。」
 
我：「無…我只係覺得…大家都可以係唔同既範疇幫到阿明，但唯獨係我好似咩都幫唔到手咁…」
 
Ellen：「其實你只係留係阿明身邊就已經好幫到佢手啦。」
 




我：「嗯？你話咩話？」
 
Ellen：「我係話，你既存在本身就已經可以為阿明帶黎動力吖。所以其實你比我地任何一個都更加有用。」
 
「或者你係其他事方面未必可以好幫到阿明手，但呢d時候正正係我地出場既時候。」
 
「我地六個唔係一直以來都係咁過架咩？一直互相扶持咁行落去。」
 
好似…又真係咁？