《無啦啦多左幾個家姐同細妹Season 3》: 你的
要點形容呢度好呢？一個好大既溫室？
頭頂係一個㘣頂玻璃，令太陽既光線可以好好咁透入黎，又唔會太曬太熱，感覺好舒服。
周圍都種左好多唔同既植物，唔同顏色唔同種類既都有，可惜我對植物既認識唔多，未能一一分辨出。
真係好靚，就好似去左一個桃花園咁，難怪Ellie會稱呢度為樂園，呢度絕對配得上呢個稱號。
但係點解一個咁似實驗室既地方會無啦啦有一個咁大咁靚既花園既？
我一邊欣賞呢片美景，一邊行向佢地個邊。
屌，而家咩都諗唔到，成個腦都只係得「好靚」呢兩個字。
無辦法，因為呢度真係好靚吖嘛。
Ellie：「點呀阿明，覺得呢度點？」
我：「仲可以點，好靚呀，但係點解既？呢度係咩地方？」
Ellie：「其實呢度…」
Ellen：「呢度咪佢個研究所囉，頭先經過咁多lab都仲睇唔出呀你。」
Ellie只係講左少少就比Ellen好粗暴咁打斷，睇黎Ellen仲係有D嬲咁喎…
唉都係扮唔知算啦，呢兩姐妹嗌既交，唔知頭唔知路叉隻腳埋去會死得好慘。
就係因為咁，我即刻擺出一個好surprise既表情，扮on9。
我呢一下完全係師承某魔術節目入面既某女明星，我諗自己都學得九成似，佢D經典對白我都學哂咁濟，係差在扮唔到把女人聲。
Ellie：「咳咳，正如家姐所講，呢度的確係我既研究所。」
我：「既然係研究所，點解又會有呢個咁大咁靚既花園既？」
Ellie：「哈哈，其實呢度都係其中一個實驗室黎架，代號「樂園」。」
樂園…哦唔怪得之前佢話要同我地黎樂園啦，原來係指呢度。
Sarah：「不過係實驗室入面種花有乜用啊，我記得Ellie你唔係研究植物架？」
坐係一邊既Sarah一邊咬住三文治一邊講，個畫面就好似日本女高中生咁，畫面太美。
不過Sarah講既又好似有D道理，我記得Ellie係做細胞研究，關植物咩事？
Ellie：「有用架，雖然我既研究重點並唔係植物，但係我研究既細胞係可以正式投入應用係人體之前，都需要係植物上實驗下先既，所以就有呢度喇。」
之後Ellie再同我地解釋多一大輪技術知識，聽到我同Sarah頭頭是道，無計啦，始終我地對呢方面既認識一定唔會夠Ellie深既。
我：「雖然唔係好聽得明，不過呢度真係好靚，俾到人一種好舒服好放鬆既感覺。啊~~好正呀呢度！」
講完我一下訓低，訓落個片綠油油既草地上。
明明係草地，但訓落去就好似棉花糖咁，成個人都會被吸入去咁。
Ellie：「愛麗絲之前黎個陣，都有講同阿明你類似既說話啊，佢又係好鐘意呢度，所以我先敢帶你地黎呢度。」
我：「吓愛麗絲都知道呢度？點解既？」
Ellie：「之前我既研究計劃需要D資金，咁家姐就幫我聯絡左愛麗絲，仲帶左佢黎呢度參觀下，睇下佢有無興趣投資，「樂園」呢個名都係佢幫我地改既。」
係Ellie提起Ellen既時候，我好清楚咁聽到係旁邊既Ellen「哼」左一聲，而我亦好清楚咁睇到Ellie望向Ellen微微笑左一笑。
哈，呢兩姐妹，口裏說不，心裏卻很誠實呢。
我：「拍拖黎呢度的話，認真唔錯呢…」
Sarah：「係呀，又靜又靚又舒服，好適合放鬆下談下心咁，嘻嘻。」
Ellen：「不過就唔係個個都有機會黎呢度拍拖囉。」
正當我仲解讀緊Ellen呢句野既意思既時候，Yui已經俾出正確答案。
Yui：「啊係wor因為呢度其實算係私人地方，一般人係入唔到黎…」
嘩一言驚醒洛克人，只係訓左一陣就已經唔記得呢度實質上係研究所，正常邊有機會黎呢度拍拖。
一意識到呢一點，我就覺得自己唔可以咁樣hea下hea下。
機會咁難得，點可以就咁係度訓呀？？一定要搵D野做下先得？
幫佢地影相打卡？同佢地一齊自拍？仲有無其他野可以做呢？？？
正當我R爆頭，坐返好個人四圍望既時候，Ellie走左埋黎，輕輕拍左我膊頭一下。
Ellie：「今日就放鬆下啦，咩都唔做都無乜所謂，更何況，只要你想，幾時都可以黎呢度喇，呢度其實都可以算係阿明你既野。」
我：「我既野？但係呢間研究所係你架喎…」
Ellie：「唔？但係我係你女朋友喎，我既野咪即係你既野囉？」
我聽到之後呆左一呆，一時三刻都唔知應該俾咩反應好。
就係呢個時候，Ellen，Sarah仲有Yui都走左埋黎，大家聚埋一齊。
Ellen：「做乜咁既反應啫，唔係一直都係咁既咩？」
Sarah：「係囉無乜所謂啦呢D野，快d一齊試下D野食仲好喇，我同Yui整得好辛苦架！」
Yui：「唔知道會唔會唔岩大家胃口呢…希望大家鐘意啦…」
Ellen：「嘛，我都肚餓啦，咁我都唔客氣喇，喂陳愛麗，呢份比你呀。」
Ellie：「唔該，呢杯野都比你啦咁，係你鐘意既蘋果汁。」
見到呢兩姐妹咁樣耍花槍，我唔忍氣咁笑左出聲，但就係笑個一下，嘴被塞左D野。
好彩係一份玉子卷，而唔係咩奇怪野啫。唔，仲幾好味添。
我回頭一望，就見到Sarah捉住Yui，兩個都用一對好誠懇既眼神望住我。
Yui：「點呀阿明，好唔好食呀？」
我咩都冇講，只係一邊食，一邊微笑地俾個like佢地。
只係一個小既動作，已經足以令我眼前呢兩個女人開心到手舞足蹈，你話佢地幾易滿足。
原來，我一直諗咁多方法想令佢地開心都係捉錯用神，明明方法就係咁簡單。
我真係傻。