《無啦啦多左幾個家姐同細妹Season 3》: 開始

就係咁，我等到第二朝。
 
係真係等到第二朝，完全無訓過個隻。
 
我自己都唔知點解訓唔到，可能係因為緊張？
 
但其實大家姐都已經應承左我會諗辦法架啦，我咁擔心緊張做乜呢？
 
啊，天光啦屌那星。
 




算啦一陣食完早餐同大家姐傾完就訓一陣啦，反正今日應該無乜野做。
 
距離食早餐都仲有一段時間，梳洗下玩陣電腦hea時間吧。
 
開左一缸熱水黎浸，疲憊同緊張都一下子得到釋放，隨著蒸氣一齊揮發。
 
啊，浸熱水浴真係好撚爽。
 
都咁多日，唔知Anna點呢？安頓好未呢？做乜一個Whatsapp都無send黎架。
 




屌，個心好唔安樂，一陣就Whatsapp Anna問下佢先。
 
真係好唔慣佢唔係我身邊既日子，而家既感覺就好似…
 
好似當初二家姐走個陣咁。
 
唔係唔係，應該有D唔同先係，Anna係我女朋友，二家姐係我屋企人，兩種感覺係有D分別先係。
 
唉，算啦諗咁多做乜呢，我真係on99。
 




一邊暗罵自己，一邊抹乾身體既我好快就返到去書檯，開住youtube隨隨便便播歌，自己就陷入一番思索。
 
腦入面開始模擬起一陣大家姐有機會會問我既野，同時自己亦準備緊一大堆答案同所謂既「方案」，打算一陣sell比大家姐。
 
都差唔多時間喇，早少少落去飯廳等吧喇。
 
一大清早，飯廳邊會有人，只聽到廚房蘭姨同其他工人姨姨閒聊同切菜既聲。
 
「咦少有喎，今日咁早既阿明？」
 
清靜既飯廳突然響起一把沉實既男聲，呢間屋男人可以話係稀有物種，所以我望都唔洗望已經知道係Uncle。
 
我：「早晨呀Uncle，今日唔知咩事一早就醒左又訓唔返，所以咪早上D落黎等食早餐囉。」
 
Uncle：「係呀？聽你大家姐講你想同朋友搞生意喎？係咪有咁既事？」




 
我：「係吖…只係籌備資金方面有少少困難，所以先想請大家姐幫一幫手，不過Uncle你可以放心！我唔會要…」
 
Uncle：「哎唔洗同我解釋咁多啦，我已經唔理公司野有一段時間，所有野都交哂比家晨打理，我呢個老野而家只係想同你阿媽好好過下日子，享受生活。」
 
「有乜想做就去做喇，趁後生應該去試下做多d想做既野。」
 
岩呀…所以我先…
 
過左無耐，其他人都陸陸續續落到黎飯廳，大家聚首一堂，開始食起早餐。
 
如此緊張不安既我，視線當然離不開大家姐啦，成餐早餐都係望住大家姐黎食，想等佢一開口問我野我就可以答到。
 
但世事總是不盡如人意，大家姐一直都好專心食佢既早餐，直頭連說話都無講過一句。
 




不過大家姐個樣好似好攰咁，唔會係因為幫我諗辦法諗到無訓過掛…
 
就係我沉醉係一個人既思考領域既時候，忽然有外力將我拉走，帶回現實。
 
Sarah：「阿明？做咩唔食啊？唔岩胃口？」
 
我：「哦唔係…只係…」
 
Yui：「唔舒服？我一陣去拎藥比你好無？」
 
我：「唔洗~我唔係唔舒服，只係咁岩有野諗到入神啫，我而家就食，唔洗咁擔心。」
 
我係度做乜呀…咁緊張搞到佢地都擔心我啦on9…
 
都係先食左早餐喇陳煒明。




 
清理好思緒之後，我總算可以專心食埋眼前呢份已經凍左好多既早餐。
 
係再之後送左已經成為中學生既羽晨出門口，我最期待既畫面終於都出現了。
 
大家姐主動走埋黎，講之前仲咳咳兩聲，好似想話比人知佢要講正經野咁。
 
大家姐：「嗱阿明，大家姐我尋晚就好認真咁諗過架啦，雖然你係我最最最最最錫既細佬，但始終我地係用緊公司既名義，所以應該要跟返程序好D，免得招人話柄。」
 
「所以呢，我想你同你班朋友俾心機做一份計劃書，到時再黎公司同我地present。就係咁啦~~」
 
呃…大家姐好似誤解左我既意思添，我其實只係想扮用公司個名，錢就自己出返…
 
我：「大家姐呀，其實呢我當初係打算自己出一筆錢去幫手，只係需要借公司個名去呃我朋友，等我可以有個好D既籍口去解釋錢從何來，實質上唔需要用到公司D錢架…」
 




大家姐：「係啊？哎唔緊要啦，反正支持後生仔創業都算係一種社會責任，好事黎既，你d錢就留返黎同Sarah佢地拍拖啦，好啦唔講咁多啦，我仲要返公司同班董事商量呢件事，你地加油啦~」
 
講完佢就換上一雙黑色高踭鞋，走出大門上車返公司。
 
事情好似複雜左好多，但又好似唔係咩壞事…
 
Sarah：「阿明咁事不宜遲，快d約你班朋友出黎傾下啦，呢份計劃書你地一定要好比心機做先得呀，競爭應該會相當激烈先係。」
 
我：「係呀，真係要拎返係U呢四年做project既經驗出黎搏命做先得，唉我而家就約佢地先，九萬幾樣野要傾。」
 
就係咁，我約左我係四年大學生涯入面所認識既幾位好朋友，好拍檔出黎，準備好好商量我地既「人生大計」。
 
而Sarah同Ellen得知之後都話要跟埋黎，話要睇下我地幾個男仔可以搞出咩花樣。
 
於是，七個人就齊集係一間Coffee shop。