我一星期零一日前識咗個女仔，我愛上咗佢。: 有心人

正係我想瞓嘅時候，手機突然響起Instagram嘅通知聲。

「 hi~你點解會搵到我嘅？」Nichole覆返我個一句好見外嘅開場白。
其實我就諗住訓覺，不過唔知點解係收到Nichole個Direct Message之後，個心就有少少激動..係莫名嘅激動。係同個ex分手之後我都真係冇咩搵過女，唔好講平時會唔會見面，直頭係網絡上都唔會冇啦啦搵女講嘢。身為一個毒撚，係呢啲情況咁緊係唔覆最好。因為...我真係好眼訓，而家都就黎朝早四點，有咩事聽日先講啦大佬。冇錯，毒撚性格就係咁架啦，麻煩啊嘛。

如果真的太好 如錯看了都好

「唉屌！」我拎咗個手機去我眼前，一嘢就熄咗個鬧鐘。
唔知點解我係突別鐘意哥哥首有心人，我之所以會去聽Nichole Busing都係因為佢唱呢首歌。聽吓聽吓又覺得佢唱歌都幾好聽，所以就有follow佢，佢有Busking我又得閒的話我就會去聽佢Busking。不過，起身嘅煩躁感比起冇我睇到嘅嘢所帶黎嘅感覺強烈。
「我聽晚都會出去Busking啊，你想可以跟埋黎。(0423)」...「再唔係可以食個飯先喎！(0435)」...




係呢一刻見到呢兩句嘢，如果我係一個普通嘅毒撚的話，肯定會覺得佢對我有嘢。不過我一直都知道以我呢個死人樣，唔好講女啦，小朋友見到我都想走。唔好玩啦~仲要我係知佢有男朋友，佢應該都只係想有比人一個好鬼nice嘅感覺人姐。所以我都只係比個like係佢個兩句嘢到，再覆句「Busking可以跟，不過我約咗人食飯啊，Sorry！」就算。然後..我又開始返我無聊嘅一日。

我平時冇咩嘢做，都係係屋企寫吓歌，不過多數都寫唔到啲咩，靈感唔會冇啦啦跌落黎比你，所以咁多人食煙隊草做通宵，唔係點趕到課比啲唱片公司。不過講開又講，啲唱片公司真係好撚chur，都話咗死線前一定比到佢，係都要我早少少比佢聽兩嘢先。即刻唔撚信我啦？咁佢唔信又有道理，我都唔係好信得過我自己嘅其實。

寫吓寫吓個天好似黑黑地，全日鐘都冇睇過...屌！已經六點幾。我即刻攞返部手機黎望吓有冇人搵我，原來Nichole係IG有搵過我。
「喂我地七點開始啊，係返旺東，你黎到就黎啦！」七點.... 仆街！
我由屋企出去都要成個鐘，而家已經六點... 為咗音樂(其實係為咗女人)我啦啦臨換咗件衫，就直接出咗去。係行快步嘅同時我打開手機，諗住是是旦旦寫個藉口話我冇睇手機所以而家先出黎。點解要講大話？咁都係同人地第一次約出黎，冇睇人message之後冇出到門口真係好撚失禮，唔講吓大話令件事好睇少少，之後比咗個唔好嘅印象人地，都真係End Game，唔使再搵人地。

呢一段車程我唔知點解覺得好漫長，可能主要係我緊張得制，同埋我都係諗唔到同咩藉口。
「喂呢到啊！」有一把好甜嘅聲向住我大嗌。




我同個個女仔對視咗一吓，再左望右望確保冇人應佢，如果佢唔係嗌我但係我應咗就真係好撚柒。
「喂呀栩！」同一把聲又嗌我，咁好撚肯定係叫緊我。
「Hello~唔好意思啊遲咗黎...」我用尷尬而不失禮貌嘅笑容去回應。
「哈哈~唔緊要啊，你準備吓先啦，我地唱多首你先再上？」
「OKAY！」我比咗個OK嘅手勢佢。
睇住Nichole彈吓彈吓咁跳返入去佢隊Band到，感覺好好笑，又好可愛。都十幾歲人啦仲係到彈吓彈吓咁行...成個大細路咁。不過佢笑嘅時候真係好正，好有一種正能量直接撞去你個心到咁樣。雖然之前都已經有同過佢講嘢，不過今日相對起我同佢都冇咁放開黎交淡，直程係有啲見外。事關佢男朋友一直佢我隔離，我嘅直覺話比我知佢唔係啲咩善男信女。咩直覺？男人嘅直覺，女人未必睇到透呢個位。不過話時話，Nichole叫我預備吓先，但係我都冇咩嘢可以準備，因為所有嘅樂器等等佢地都已經準備好曬。企係到都咪話唔尷尬，佢男朋友間唔使就睥我。

「下一首係有心人... 呼~」Nichole深呼吸咗一吓。
「1..2.. 1..2..3..4....」
隨住Nichole數嘅拍子音樂隨即響起，結他嘅勾線帶動現場嘅氣氛，令人有一種形容唔到嘅傷心。





寂寞也揮發著餘香 原來情動正是這樣
曾忘掉這種遐想 這麼超乎我想像

今日佢比起平時唱呢首嘅時候有少少唔同，係有種甜甜地又幸福嘅感覺。但係明顯唔係因為我係到，而係我隔離個男人係到。

如果真的太好 如錯看了都好 不想證實有沒有過傾慕
是無力 或有心 像謎 像戲 誰又會 似我演得更好

聽聽吓莫名地有一種係心入面嘅陣痛。「可能係因為聽到Nichole唱歌，唔知點樣又產生咗共嗚所以會咁樣心痛？」 - 我當初係咁樣認為。因為呢一刻我望住嘅係Nichole，比人打我都沒必有感覺。佢唱歌嘅時候比平時更加有吸引力，唔係講樣講身材咁膚淺，而係講緊氣質。雖然未去到有「仙氣」嘅地步，但至少係個種會令你諗「啊呢條女都有文青嘅感覺，應該係温柔又得體，出得廳堂入得廚房嘅類型」嘅女人黎。

「喂！發咩呆啊？上黎彈啦！」Nichole一邊拉住我行一邊講。
正當我回個神來嘅時候，我第一眼係望到一個男人好好好憤怒嘅眼神。
「我自己行到啊.. 」我想縮開隻手，事關啲觀眾都好似有少少唔鐘意我，但係更甚嘅係你男友好似想殺死我。
「咁見你唔理我啊嘛！嗌咗你幾聲都冇理我！」




「係啦係啦... 頂你痛架！」佢打咗我一嘢，真心有少少痛。
Nichole係我面前做咗鬼臉就冇理我，直接同其他隊友討論要唱咩歌，而我就企咗係則邊等佢地。

我對於Busking真係咩好熱心嘅想法，因為對我黎講只不過係玩同享受，音樂原本應該係一樣咁嘅嘢。至於係我上台之後嘅事，基本上冇啲咩發生，除咗覺得Nichole令我有心動嘅感覺，就係佢條仔對我不懷好意嘅眼神，係全程啤到我實一實，真係一刻令我擔心自己嘅菊花。去到走嘅時候，依舊係一班人係到圍堆，由講今晚表現到講去唔去食糖水。而我依舊企係則邊到等，因為.. 都唔熟...

「喂！多謝你喎！」一隻纖細嘅手拎咗枝水比我。
「哈哈！多咩謝啦少事！」我一手就接過枝水。
係我眼前嘅並唔係Nichole，而係頭先打木箱鼓嘅女仔，小渝。佢身高都有170，瘦低長腿，樣就普普通通，衣著係韓風少少但又有啲豪氣嘅女仔。
「做咩成日企埋一二邊啊？」小渝問我。
我冇答到佢，始終係第一次見面嘅陌生人，唔想比佢知得太多。
「咁樣係溝唔到女架喎，特別係有男朋友嘅女仔。」小渝挨係牆到望住個月亮，然後一副睇清睇透嘅表情望住我。
「個位有人就無為逼入去啦...係咪？」我好概嘆咁講。
「唔知呢？不過有樣嘢係關於佢嘅我好肯定。」佢望咗我一眼，然後懶係嘢咁講完又望返個天。
我呢一刻決定保持沉默，等佢講出黎。
「嘻...」




「你唔好以為你細細聲笑我就唔知啊，有咩快講啦，Nichole佢地過緊黎。」我拍一拍小渝個頭。
佢控咗埋黎我耳邊，細細聲咁講：「其實Nichole唔係真心鐘意佢條仔。」